Kigali: Harategurwa conference izahuza abana b’abashumba b’amatorero ya gikristo yose

Mu muryango mugari w’Agakiza harategurwa igiterane kidasanzwe kizitabirwa by’umwihariko n’abana bavuka mu ngo z’abakozi b’Imana « Abapasitori ; Abarevera ; Ababishop na ba Apotere » hatitawe ku itorero (idini) iryo ari ryo ryose. Kizaba taliki 29 Ukwakira 2017 kuri SOLACE Ministries Kacyiru kuva isaa munani z’amanywa (14h00).

Itsinda riri gutegura iki giterane abenshi bazi ku izina « Agakiza Family » ni abakunzi b’urubuga rw’ivugabutumwa Agakiza.org bari hirya no hino ku isi, akaba ari nabo bagize umuryango wa Gikristo wo gushaka no gukiza icyazimiye « Seek and Save Humanity Ministries » (SSHM). Bakora ivugabutumwa hifashishijwe urubuga rwa interineti www.agakiza.org n’izindi mbuga nkoranyambaga kimwe n’ibindi bitangazamakuru bitandukanye.

Abagize uyu muryango, bategura bakanatanga inyigisho z’ibyiciro bitandukanye: Abubatse ingo, urubyiruko, abakozi ba Leta, abacuruzi, isanamitima ubumwe n’ubwiyunge, inyigisho z’abashumba n’abayobozi b’abandi bakanakora ibiterane binini haba mu Rwanda no mu mahanga. Ibi byose biba bigamije ko abantu babwirwa ubutumwa bwiza bwuzuye bukiza ibyaha, indwara, ibikomere n’imivumo bugakiza Umwuka, ubugingo n’umubiri. Abatarakira Yesu bakamwakira bakabona ubugingo buhoraho, ndetse n’abakijijwe bakarushaho gukomera mu gukiza.

Agakiza.org twaganiriye na Past. Desire Habyarima umuyobozi wa SSHM, akaba ari nawe ukuriye umuryango utegura ukanakora ibi biterane n’amahugurwa, tumubaza byinshi kuri iki giterane adusobanurira ku mpamvu zacyo, ndetse anadutangariza icyo bizaba bisaba kugira ngo umuntu azinjire.


Past Desire Habyarimana umuyobozi wa SSHM n’Agakiza Family

Yadusubije agira ati: Kuri iyi nshuro twateguye amahugurwa y’ abana b’Abapasitori kugira ngo bahugurwe ku bintu byinshi bitandukanye ariko icyo tugamije nukubatoza kubaho ubuzima bw’ubaha Imana nkuko insanganyamatsiko y’igiterane ivuga Itangiriro 18:19”


Past Desire Habyarimana n’umufasha we Ev. Adda Darlene Kiyange n’abana babo bombi Dan na Divin hagati.

Abana b’Abapasitori banyura mu buzima butandukanye bumwe abantu bamenya n’ubwo batamenya guhurira hamwe bizatuma bisanzura bamenyane babe hamwe cyane ko nubwo basengera mu matorero atandukanye ariko umurimo ababyeyi babo bakora numwe n’ivugabutumwa.

Kwinjira bizaba ari ubuntu ubu turi kwandika abifuza kwitabira iri huriro kugira ngo tuzabashe kubakira neza bige bisanzuye. Buri wese ahawe ikaze cyane ko uyu muryango uhurirwamo n’abava mu matorero yose ya gikristo.

Iki giterane kibaye nyuma y’ibindi biterane bitandukanye byagiye bitegurwa n’uyu muryango kandi bigatanga umusaruro utari mukeya kubabyitabiriye ndetse no mu mibereho isanzwe ya buri munsi. Aha twavuga nk’icyiciro cy’abubatse ingo bamaze guterana inshuro zirenze imwe biga ku gukira ibikomere byo mu ngo, icyiciro cy’urubyiruko, Abacuruzi n’abandi.

Iki giterane kizahuza abana bavuka mu miryango y’abashumba b’amatorero kizitabirwa n’abakozi b’Imana batandukanye, nka Ev. Emmanuel Kwizera uzaba ari n’umwigisha w’uwo munsi; Umuryango wa Past. Desire Habyarimana, korari New Melody.


Ev. Emmanuel Kwizera niwe uzabwiriza abana b’abakozi b’Imana


Korari New Melody izabafasha guhimbaza Imana mu ndirimbo