KWIHANA N’IMBUTO ZIKWIRIYE UMUNTU WIHANNYE . Charles Mudagiri


Tumaze iminsi tuganira k’ukwihana nyako Bibliya ivuga, aho twasanze ko kwihana Bibliya ivuga bigizwe n’intambwe eshatu zikurikira:

1. Kwemera no kubabazwa n’icyaha wakoze
2. Kwatura icyaha cyawe
3. Guhindukira ukava mu bikorwa bibi wakoraga ugafata inzira nziza igana ku Mana.

Benedata twibukiranye ko:

1. Kwihana kuzuye ni urugendo, si igikorwa umuntu akora mu munota umwe.

2. Iyo wamaze kwihana biragusaba kwizera no kwakira imbabazi z’Imana muri wowe.

Ni kenshi abantu bihana ariko bagasigarana urugamba rwo kwemera no kwakira imbabazi z’Imana. Satani umuriganya, ashukisha abantu benshi kubabwira ko Imana itabababariye abereka ibyaha bakoze, bikabatera kutegera Imana nk’uko bikwiriye bagahorana imitima ibacira urubanza.

Imana yerekanye urukundo rwayo idukunda, ubwo Kristo yadupfiraga tukiri abanyabyaha. Nkanswe none ubwo tumaze gutsindishirizwa n’amaraso ye, ntituzarushaho gukizwa umujinya w’Imana na we? Ubwo twunzwe n’Imana ku bw’urupfu rw’Umwana wayo wadupfiriye tukiri abanzi bayo, none ubwo tumaze kungwa nayo, ntituzarushaho gukizwa ku bw’ubugingo bwe ? Ariko si ibyo byonyine, ahubwo twishimira Imana ku bw’Umwami wacu Yesu Kristo ikiduhesha kuzura na yo na bugingo n’ubu (Abaroma 5 :8-11).

Urupfu rwa Yesu, amaraso yamenetse ku musaraba, nibyo biduhesha kungwa n’Imana, kandi si ukutwunga na yo gusa, ahubwo biduhesha no kwegera intebe y’Imana. Abakolosayi 1 :20-22.

Hanyuma igikurikira kwihana ni ukwera imbuto zikwiriye umuntu wamaze kwihana.

Iyo wafashe umwanzuro wo guhindukira ukihana ukava mu byaha, ugakurikira inzira y’Imana, uba ufashe icyemezo cyiza, ariko ntibirangirira aho, biragusaba kwera imbuto zerekana ko wabaye icyaremwe gishya muri Kristo.

Ukwiye guhamya ko utakiri umuntu utwarwa na kamere yawe wahoranye, ahubwo ko uyoborwa n’undi Mwami kandi wubaha ukanakurikiza amabwiriza aguha.

Yesu ubwe aragi ati: “Si mwe mwantoranije, ahubwo ni jye wabatoranije kandi mbashyiriraho kugira ngo mugende mwere imbuto, imbuto zanyu zigumeho kugira ngo icyo musaba Data cyose mu izina ryanjye akibahe” ( Yohana 15:16)

Umwami wacu Yesu aradusaba kwera imbuto! Nicyo yadushyiriyeho kuri iyi si. (Matayo 5:13-16).

Kwihana kwiza kandi kuzuye kurangwa n’impinduka zigaragara haba mu bikorwa umuntu akora no mu myitwarire ye. Nk’uko twabivuze mu nyigisho za mbere, aho twavugaga ku kwihana nyako Bibliya ivuga, twasanze ko kwihana ari uguhindura imitekerereze, imyifatire n’imico. Ibyo byose rero bigaragazwa n’imbuto umuntu yera zitandukanye n’izo yeraga mbere yo kwihana kwe.

Umuntu wihannye rero arangwa no kwera imbuto zitandukanye, ariko reka tuvuge zimwe muri zo:

1. Guca bugufi (Humilité) ( Matayo 18 :1-4, Imigani 11 :2)

Guca bugufi ni ikimenyetso kiranga umuntu wihannye. Umuntu we wa kera (Kamere) aba atakimuyobora ahubwo ayoborwa n’umwuka w’Imana.

Ku yoborwa n’Umwuka w’Imana, bivuze iki ?

Bivuze gushyira hasi ibya kuyoboraga byose, gusezerera umwami wakuyoboraga mbere, ariwe satani, ukayoborwa n’undi mwami mushya ariwe Yesu Kristo.

Icyo gihe abigishwa begera Yesu baramubaza bati: umukuru mu bwami bwo mu Ijuru ninde? Ahamagara umwana muto amuhagarika hagati yabo arababwira ati : Ndababwira ukuri yuko nimudahinduka ngo mumere nk’abana bato, mutazinjira mu bwami bwo mu ijuru. Nuko uzicisha bugufi nk’uyu mwana muto, ni we mukuru mu bwami bwo mu ijuru. Matayo 18 :1-4.

Umuntu wese wihannye by’ukuri arangwa no guca bugufi. Kwishyira hejuru no kwikakaza, ni ikimenyetso cy’uko umuntu akiyoborwa na kamere.

Ubwibone bwumuntu buzamucisha bugufi, ariko uwicisha bugufi mu mutima azabona icyubahiro Imigani 29:23.

Guca bugufi rero ni imwe mu mbuto zigaragaza umuntu wihannye mu buryo bwuzuye nk’uko Bibliya ibivuga. Birakwiriye kwiga guca bugufi kugira ngo unezeze uwaguhamagaye, kandi igihe gikwiriye Imana ubwayo izagushyira hejuru.

Kuko muntu wese wishyira hejuru azacishwa bugufi, kandi uwicisha bugufi azashyirwa hejuru. Luka 14:11
.
Reka dusabe Imana idushoboze kwicisha bugufi mu izina rya Yesu.

2. Ukuri

Ijambo ry’Imana ritugaragariza neza ko umuntu ushobora kubana n’Imana bagatindana agatura ahera hayo no mu bikari byayo ari umuntu ufite ukuri muri we.

Uwiteka ni nde uzaguma mu ihema ryawe ? Ni nde uzatura ku musozi wawe wera ? Ni ugendera mu bitunganye agakora ibyo gukiranuka akavuga iby’ukuri nk’uko biri mu mutima we. Zaburi 15 :1-2

Ukuri ni iki ?

 Ni uburyo bwo kuvuga ikintu uko kiri . Imana ubwayo ni ukuri kuko ikiranuka mubyo ivuga byose.

 Ukuri ni ikinyuranyo cy’ikinyoma, iyo utavuze ukuri uba uvuze ikinyoma

 Satani ni umunyabinyoma, nta kuri kuba muri we, satani niwe se w’ibinyoma, iyo ubeshye njya umenya neza ko ibyo ukoze ubikomoye kuri satani.

Mukomoka kuri So satani, kandi ibyo so ararikira ni byo namwe mushaka gukora, Uwo yahereye kera kose ari umwicanyi, kandi ntiyahagaze mu by’ukuri kuko ukuri kutari muri we. Navuga ibinyoma, aravuga ibye ubwe kuko ari umunyabinyoma, kandi ni se w’ibinyoma. Yoh 8 :44.

Imana iduhamagarira kuba abanyakuri mubyo tuvuga no mubyo dukora. Kugenda nk’abanyakuri, gukora nk’abanyakuri.
Intumwa Pawulo mu rwandiko rwe rwa kabiri yandikiye Timoteyo agaragaza neza uko abantu bazaba bameze mu minsi y’imperuka , agaragaza ko nta kuri bazaba bafite muribo (2 Timoteyo 3 :2-5).

Ijambo ry’Imana ritubwira neza ko Imana yanga urunuka ikinyoma. (Imigani 6 :16-17), ariko Ikishimira ukuri (Imigani 12 :22).

Biratangaje ko muri iyi minsi abantu benshi bafashe ikinyoma nk’ibintu bisanzwe, batera urwenya bakabeshya, mu biganiro bitandukanye umuntu arabeshya akumva ari ibisanzwe, mu mirimo ya buri munsi abantu barabeshya kugira ngo bagere ku bintu runaka, babone ubutunzi, icyubahiro, imyanya y’akazi n’ibindi, ariko ibyo byose bifite ingaruka mbi zikomeye ku muntu ubikora.

Ubutunzi bushakishwa ururimi rubeshya buyoka nk’umwuka, Ababushaka baba bashaka urupfu. Imigani 21 :6.

Dusenge.

Mana Data, tugushimiye ijambo ryawe rizima uduhaye, tugusabye Umwuka Wera wo kudushoboza kumva neza icyo utubwiye muri ryo.. Tubisabye mu izina rya Yesu Kristo Umwami wacu, Amen !

Komeza ubane natwe kandi Yesu aguhe umugisha!