Isengesho rya Nehemiya

Mana yanjye ujye unyibuka kandi ntuzahanagure imirimo yanjye myiza nkoreye inzu y’Imana yanjye, n’ibihe bifatwa muri yo “Nehemiya 13:14”

Iri sengesho ryasenzwe n’umugabo witwa Nehemiya ubwo yaramaze kwirukana Tobia umwe wari waracuditse na Eliyashibu akamutunganyiriza icyumba mu nzu y’Imana… ntabwo umurimo yakoze wari woroshye namba, gufata umuntu w’umugabo byongeye twavuga ko yari yaragafashe akamusohorana n’ibye byose ntanakimwe asize.

Reka dutekereze uko byari byifashe reba imbaraga yakoresheje asubiza ibintu mu mwanya wabyo igihe yezaga urusengero, imbaraga ‘umwanya yakoresheje ajya gushaka abarewi n’abaririmbyi bari baratataniye kure akabagarura mu rusengero, n’iyindi mirimo itandukanye.
Nyuma y’ibyo byose rero niho yasenze ririya sengesho ati “Mana yanjye ujye unyibuka kandi ntuzahanagure imirimo yanjye myiza nkoreye inzu y’Imana yanjye, n’ibihe bifatwa muri yo”

Birashoboka ko Atari iki yari guhita avuga wenda akavuga ati ahwi Eliyashibu we wabibonye ko ntakina? Njye ndakaze! Erega ndi umunyembaraga! Erega sinjya ncika intege, Ndabemeje n’ibindi, ariko siko byagenze ahubwo yahise yihuta imbere y’Imana ashinganisha imirimo yose akoreye imbere yayo ayisaba kutazayihanagura.

Aya magambo akwiriye gutera umuntu wese kwitekerezaho no kwibaza kumirimo yose akorera imbere y’Imana niba koko yabasha gusenga nka Nehemiya asaba Imana kutazayihanagura cyangwa wayisaba gusiba ikongera igatangira?
Benedata imirimo yose dukora ijambo ry’Imana rivuga ko izanyuzwa mu ruganda cyangwa se mu muriro yaba ari imyiza cyangwa se imibi.

Mbese imirimo dukora tuyikorera guhesha Imana icyubahiro cyangwa nukugira ngo tugaragare neza? Reka dufate gusura abarwayi, gufasha imfubyi n’abapfakazi, gutabara ababaye, Kwitanga mu rusengero dutanga icyacumi n’amaturo, Gusurana n’ibindi bitandukanye. Niba rero tubikorera guhesha Imana icyubahiro no kogeza izina ryayo reka dufatanye na Nehemiya Dusenge nkawe tuti “Mana yanjye ujye unyibuka kandi ntuzahanagure imirimo yanjye myiza nkoreye inzu y’Imana yanjye, n’ibihe bifatwa muri yo”.

Niba atariko bimeze reka twisubireho aho gukora ibyitwa imirimo myiza kandi izatwikwa twitoze gukora imirimo myiza kandi tuyikorera Imana izatubera urwibutso ku munsi mubi.

Imana ibahe umugisha.

[email protected]