Intambwe zo kwihana nyakuri igice cya kabiri. Charles MUDAGIRI.

Mu isomo ry’ubushize, twarebeye k’ukwihana n’imbuto zikwiriye umuntu wihannye. Twatangiye tureba icyo Bibiliya ivuga ku kwihana nyako. Twasanze kwihana ari igikorwa cyangwa urugendo rugizwe n’intambwe 3 zikurikira:

1. Kwemera no kubabazwa n’icyaha wakoze
2. Kwatura icyaha cyawe
3. Guhindukira ukava mu bikorwa bibi wakoraga ugafata inzira nziza igana ku Mana.

Muri icyo kiganiro cy’ubushize twavuze ku ntambwe ya mbere ijyanye no Kwemera no kubabazwa n’icyaha cyawe.

Uyu munsi tugiye kuvuga ku ntambwe ya kabiri
2. Kwatura icyaha cyawe.

Dawidi yabaye intangarugero kuri iyi ntambwe yo kwatura. Iyo usomye amwe mu magambo yandikaga mu gihe cyo kwihana ukuramo isomo ryiza ryo kwatura.

Urugero: “Hahirwa uwababariwe ibicumuro bye, Ibyaha bye bigatwikirwa. Hahirwa umuntu Uwitaka atabaraho gukiranirwa, Umutima we ntubemo uburiganya. Ngicecetse, amagufwa yanjye ashajishwa no kuniha kwanjye umunsi ukira. Kuko ukuboko kwawe ku manywa na nijoro kwandemereraga, ibyuya byanjye bigahinduka nk’amapfa yo mu cyi. Nakwemereye ibyaha byanjye sinatwikiriye gukiranirwa kwanjye naravuze nti ndaturira Uwiteka ibicumuro byanjye nawe unkuraho urubanza rw’ibyaha byanjye.” Zaburi 32:1-5.

Muvandimwe, kubabazwa n’uko wacumuye cyangwa wakoze icyaha, bikagutera agahinda mu mutima, ntibihagije kugira ngo uhabwe imbabazi z’Imana! Nyuma yo kwisubiramo ukabona ko wahemutse imbere y’Imana ku bw’icyaha wakoze, biragusaba gutera intambwe ya kabiri ukatura icyaha wakoze.

Bibiliya ibivuze neza iti: "Ngicecetse, amagufwa yanjye ashajishwa no kuniha kwanjye umunsi ukira. Kuko ukuboko kwawe ku manywa na nijoro kwandemereraga, ibyuya byanjye bigahinduka nk’amapfa yo mu cyi".

Birumvikana neza ko mu gihe ugihishe icyaha muri wowe, (mugihe utaracyatura), uracyafite urubanza imbere y’Imana kuko ukuboko kw’Imana kuzakomeza kukuremerera ku manywa na nijoro kugeza ubwo uzaturira icyaha wakoze.

Ijambo ry’Imana riratubwiye ngo: “Nakwemereye ibyaha byanjye sinatwikiriye gukiranirwa kwanjye naravuze nti ndaturira Uwiteka ibicumuro byanjye Nawe unkuraho urubanza rw’ibyaha byanjye.”

Muvandimwe, biragusaba gutinyuka ugafata icyemezo gikwiriye gishobora kugukuraho urubanza imbere y’Imana, ukayemerera ibyaha byawe kandi ukabyatura kugira ngo uhabwe imbabazi z’Imana, maze uruhuke umutima kuko umutima urimo icyaha udashobora gutunga amahoro.

Aha twifashishe umugani Yesu yaciye uvuga ku mwana w’ikirara maze turebere icyo dusabwa gukora mu gihe twamaze kwisuzuma tugasanga twarakoze ibibi.

Luka 15:21: Uwo mwana aramubwira ati: "Data, nacumuye ku yo mu Ijuru no mu maso yawe, ntibinkwiriye kwitwa umwana wawe.”

Nyuma yo kubabazwa n’icyaha wakoze biragusaba gutera indi ntambwe ya kabiri ukatura icyaha wakoze imbere y’uwo wagikoreye n’imbere y’Imana.

Iki ni kimwe mu bikunze kugora abantu benshi, aho usanga umuntu yarahemukiye mugenzi we, umugabo agahemukira umugore we, cyangwa umugore agahimukira umugabo we, umwana agahemukira umubyeyi cyangwa umubyeyi agahemukira umwana, muri make umuntu agahemukira mugenzi we, ariko akagira intege nke zo kumwegera ngo amusabe imbabazi, ahubwo akaba yajya kucyaturira kure y’aho yagikoreye, cyangwa akaba yakwatura yiherereye akaturira Imana gusa! Yeee, nibyo wagize neza kwatura ariko ntibyuzuye rwose!

Birakwiye ko utera intambwe ukegera uwo wahemukiye ukamwaturira, ukamusaba imbabazi hanyuma ukabona gufata umwanya wo kwaturira Imana. Nk’uko twabivuze haruguru. Uyu mwana yabanjye kwaturira Se ati: “Data nacumuye ku yo mu ijuru no mu maso yawe”Luka 15:21.

Iyo wafashe icyemezo cyo kwihana uba wagaye ibyo wakoze, ntibyari bikwiriye ko utinya ku byatura. Hari benshi bicuza rwose ku bw’ibyaha bakoze ariko kwegera abo bahemukiye ngo babasabe imbabazi bikaba ikibazo! Bibliya iravuga iti: “Uhisha ibicumuro bye ntazagubwa neza, ariko ubyatura akabireka azababarirwa
Imigani 28:13

Ntibishoboka rwose ko wagumbwa neza ugihishiriye icyaha cyawe!

Bibiliya yongera kuvuga iti “ Ntamahoro y’umunyabyaha niko Uwiteka avuga”.

Niyo mpamvu Dawidi yavuze ya magambo twabonye haruguru, biriya bigaragaza ko nta mahoro y’umunyabyaha. Icyakora umuntu ashobora kwiha cyangwa kwihesha amahoro, ariko ntibikunda umutima uhora umukomanga. Kwinangira gukabije rero niko bita amahoro kuko iyo utinze mu byaha ugeraho ukabimenyera. “Ngicecetse, amagufwa yanjye ashajishwa no kuniha kwanjye umunsi ukira. Kuko ukuboko kwawe ku manywa na nijoro kwandemereraga, ibyuya byanjye bigahinduka nk’amapfa yo mu cyi” Zaburi 32:3-4.

Mwenedata, igihe cyose ugicecekanye icyaha cyawe menya ko udashobora kugira amohoro, ukuboko k‘Uwiteka kuzakomeza kukuremerera ku manywa na nijoro kugeza ubwo uzaturira icyaha cyawe. Sigaho guhishira ibyaha ahubwo utinyuke ubyature kandi wegere uwo wahemukiye cyangwa uwo mufitanye ikibazo umusabe imbabazi nibwo uzabona imbabazi z’Imana, naho ubundi nubwo wakwishakamo amahoro ni iby’igihe gito ntibizarama!

Ariko nitwatura ibyaha byacu, ni yo yo kwizerwa kandi ikiranukira kutubabarira ibyaha byacu no kutwezaho gukiranirwa kose. 1Yohana 1:9.

Uko biri kose, turasabwa kwatura ibyaha kugira ngo tubone imbabazi z’Imana, kandi twibukiranye ko dusabwa kwegera abo twahemukiye tukabasaba imbabazi, tukabaturira hanyuma tugasanga Imana ikaduha imbabazi zayo.

Intabwe yambere yo kwihana nyako Bibliya ivuga ni ukwemera icyaha cyawe kandi ukababazwa nacyo.

Ariko na none tumaze kubona ko kubabazwa n’icyaha gusa bidahagije ngo ubone imbabazi z’Imana ahubwo usabwa no gutera intabwe ya kabiri ukatura ibyaha byawe kugira ngo ubone imbabazi z’Imana.

Ubutaha tuzakomeza turebera hamwe intambwe ya gatatu ari nayo ya nyuma mu rugendo rwo kwihana kuzuye Bibliya idusaba ariyo: Guhindukira ugafata icyerekezo gishya.

Dusenge .
Mana data, tugushimiye ijambo ryawe rizima tumaze kumva, tugusabye umwuka wera wo kudushoboza kwegera no gusaba imbabazi abo twahemukiye kugira ngo tubashe kubona imbabazi zawe. Komeza kandi utwigishe kumenya no kwitondera ijambo ryawe kugira ngo turusheho kumenya ubushake bwawe kuri twe. Tubisabye mu izina rya Yesu Kristo Umwami wacu Amen !