Intambwe zo kwihana nyakuri igice cya gatatu. Charles Mudagiri

Mu nyigisho yacu y’ubushize twari twavuze ku ntambwe ya kabiri muri eshatu zigize kwihana nyako Bibliya ivuga. Kuri uyu munsi turavuga ku ntambwe ya gatatu ari nayo ya nyuma mu rugendo rwo kwihana kuzuye.

Mbere yo gukomeza reka twongere twibutse ko kwihana nyako Bibliya ivuga kugizwe n’intambwe ashetu zikurikira:

1. Kwemera no kubabazwa n’icyaha wakoze
2. Kwatura icyaha cyawe
3. Guhindukira ukava mu bikorwa bibi wakoraga ugafata inzira nziza igana ku Mana.

“Guhindukira ukava mu bikorwa bibi wakoraga ugafata inzira nziza igana ku Mana”

Pawulo yaravuze ati: « Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza ituruka ku Mwami Mana » (Ibyakozwe n’Intumwa 3 :19).

Nyuma yo kubabazwa n’icyaha wakoze (intambwe ya mbere mu rugendo rwo kwihana), ndetse ukongeraho kwatura icyo cyaha (intambwe ya kabiri), intambwe ya nyuma yo kwihana kwuzuye, ni ukureka ibyo wakoraga ugahindukira. Ni ukuva mu nzira mbi wari urimo ugafata indi nzira nziza igana ku Mana, ni uguhindura icyerekezo wari urimo ugafata ikindi cyerekezo.

Reka twifashishe aya magambo yo mu rurimi rw’igifaransa ( Faire demi-tour, changer de chemin, se détourner du monde pour se tourner vers Dieu, échanger ou transformer la vie mondaine en une vie d’obéissance à la parole divine, quitter le chemin du péché pour suivre celui de Jésus ).

« Arahaguruka ajya kwa se, agituruka kure, se aramubona aramubabarira, arirukanka aramuhobera, aramusoma » (Luka 15 :20).

Na none dukoze isesengura ry’uyu mugani Yesu yaciye, tukareba urugendo rw’uyu mwana wiswe ikirara, turasanga ko mu kwihana kwe izi ntambwe zose uko ari eshatu yaziciyemo kugira ngo agere aho aza guhererwa imbabazi na se.
Reka twongere twibukiranye ko mbere y’uko uyu mwana ava mu rugo rwa se yari umwana ufite uburenganzira bwuzuye mu rugo kwa se, yari afite byose, ntacyo yari yabuze kwa se kugira ngo ave mu rugo ajye kure y’umuryango we.

Ni ko iyo abantu bajya mu byaha biba bimeze, baba bavuye mu rugo kwa Data (Imana) bakayoboka inzira mbi bayobowemo na sekibi (Satani). Iyo Satani amaze kukuzuzamo ubugome ukagomera Imana, ugakora ibyangwa nayo, uba wamaze kuva mu muryango rw’abana b’Imana, uba wavuye mu rugo rwa So.

Iyo ugiriwe ubuntu bwo gutekereza ko wataye inzira ugahitamo kugaruka kwa so, biba bigusaba kunyura muri izi ntambwe turimo kuganira. Mbere na mbere uyu mwana yafashe umwanya wo kwisubiramo, arisuzuma, arigaya, asanga yarahemutse (intambwe ya mbere). Icyakabiri afata umwanzuro wo kujya kwaturira se akamusaba imbabazi ku bw’ibyo yakoze bidakwiriye (intambwe ya kabiri).

Ibi byose yabitekereje akiri aho yari yarazimiriye, ariko kugira ngo agere ku mwuzuro wo gusubizwa uburenganzira bwose nk’umwana mu rugo no guhabwa imbabazi na se, byamusabye gufata icyemezo cyo guhaguruka, agahindukira akongera agaca muri ya nzira yari yaciyemo agenda, agasubira mu rugo kwa se.

Igihe cyose wisubiyemo ugasanga warateshutse ugakora ibyangwa n’Imana, bigusaba gutera intambwe yo gusubira mu nzira wahozemo ukongera ukabana neza nayo.

Guhindukira bivuze guhindura imitekerereze, imyumvire, imigendere, ingeso n’ibindi byose wakoraga bibi ugafata wa murongo mwiza wahozemo wo kubana n’Imana ukaba umwana mu rugo rwa so, ukongera ukagira uburenganzira bwose mu muryango wawe.

ICYITONDEWA : Uku guhindukira ukava mu nzira wari urimo ugafata ikindi cyerekezo, ni wo mwuzuro wo kwihana nyako Bibiliya idusaba. Kwicuza icyaha kwiza no kwihana kuzuye kurangizwa no gufata icyerekezo gishya.

Waba waragize ingorane ugakora icyaha ukababaza Imana yawe? Waba se warababajwe nabyo ukumva ko wahemutse? Waba se warateye intambwe nziza yo gusaba imbabazi kubw’amakosa yawe?

Niba warageze aho hose, igisigaye ni ugufata umwanzuro wo guhindukira ukamaramaza kwanga urunuka icyaha ni bwo buryo bwiza bwo kukinesha. Naho nibitagenda gutyo, uzajya wisanga wongeye kugikora byongere bikubabaze yewe unature, hanyuma n’ejo wongere gutyo gutyo, kugeza ubwo icyo cyaha kizakuzanira akaga gakomeye ndetse kikakubuza kujya mu Ijuru.

Dusenge.
Mana data, tugushimiye ijambo ryawe rizima uduhaye, tugusabye umwuka Wera wo kudushoboza kumva neza icyo utubwiye muri ryo. Tubisabye mu izina rya Yesu Kristo Umwami wacu, Amen !