Intambwe 4 zo kunesha ibihanda biri imbere yawe! – Joyce Meyer

Wigeze utangira umushinga ntiwabasha kuwurangiza? Cyangwa se waba warahagaritse inzozi waze kubera ibindi bintu byitambitse mu nzira? Ntekereza yuko ibi byatugezeho twese mu buryo bumwe cyangwa ubundi. Ukuri ni uko rimwe na rimwe gutangira biba byoroshye. Nyamara hamwe no gufashwa n’Imana, tubasha kurangiza imishinga twatangiye kuko Bibiliya ivuga ngo "Ku Mana byose birashoboka" (Matayo 19:26 BY).

Ndizera ko hari ibyo twifuza gukora, kandi akenshi icyo twifuza gukora ni icyo Imana yadushyize ku mutima. Urugero, mfite inyota yo kwigisha abantu ijambo ry’Imana. mfite inyota nyinshi, ku buryo nabyimariyemo mu myaka 38 ishize kandi nkomeje kubikora. Ibyo ni ukubera ko Imana yavuganye nanjye, igashyira icyo cyifuzo ku mutima wanjye. Iyo nza guhitamo gukora ikindi gitandukanye n’icyo, byashoboka ko nari kumara imyaka nshigaje mu mubabaro kandi ntanyuzwe mu buzima.

Uko ni ko bigenda iyo dufite inyota yo gukora ikintu, nyamara ntitugire icyo tugikoraho. Ariko inkuru nziza ni uko n’iyo dutekereje ko twatinze gutangira gukora icyo kintu, ku Mana haba hakiri kare. Kandi Imana izaduha ibyo dukennye, cyane cyane mu gihe twugarijwe n’abanzi.

Ni ingenzi gusobanukirwa ko iyo duteye intambwe ngo dukore ibyo Imana yaduteguriye gukora, tuba tugomba kwitegura guhagarara mu mwanya wacu iyo ibiturwanya biduhagurukiye. Intumwa Pawulo yaravuze iti "Kuko nugururiwe irembo rinini rijya mu mirimo ikomeye kandi abandwanya bakaba benshi" (1 Kor. 16:9 BY).

Kunesha Ibikurwanya

Ibi bikurwanya ni ibinyembaraga, kandi birimo ibinini n’ibito. Rimwe na rimwe biza binyuze mu bitekerezo, cyangwa bikanyura mu ncuti yawe. Abantu baransetse ubwo nababwiraga ibyo numva Imana impamagarira gukora.

Ikintu gikomeye ni uko umwanzi agerageza kuduca intege, kuko aba azi yuko niducika intege ndetse tugakuka umutima turaka kumva Imana. ibyo twumva gusa ni umubabaro n’ibitekerezo, tukumva tubihiwe n’abantu bose. Ariko niba ushaka gusohoza umuhamagaro w’Imana mu buzima bwawe, ugomba kwiga uko wahangana n’ibikurwanya ukabinesha!

1 Samweli 17 hatwereka uko twanesha ibitutwanya mu buzima bwacu. Ingabo z’Abisirayeli zose zari mu kibaya, igihanda cyitwa Goliyati kirabakangisha. Nta muntu n’umwe washakaga kurwanya Goliyati, ariko umusore witwaga Dawidi agambirira kwica icyo gihanda. Umwami Sawuli yumvise ibyo Dawidi ashaka gukora, yamubwiye ko ari igitekerezo cy’ubupfu kuko yari akiri muto. Dawidi yishe icyo gihanda, kandi iki Dawidi yakoze cyatwigisha byinshi ku bijyanye no kunesha ibiturwanya.

# 1 Ima Amatwi Abaguca Intege

Ikintu cya mbere ugomba gukora ni ukwima amatwi abaguca intege, no kutizera kw’abandi. 1 Samweli 17:32-33 (BY) haranditswe ngo "Dawidi abwira Sawuli ati ’Ntihagire ukurwa umutima na we, umugaragu wawe ngiye kurwana n’uwo Mufilisitiya.’ Sawuli asubiza Dawidi ati ’Ntiwashobora gutera uwo Mufilisitiya ngo umurwanye, kuko ukiri umusore w’umugenda, kandi we ni umugabo wamenyereye kurwana uhereye mu busore bwe.’" Dawidi yasubije Umwami Sawuli ibyo Imana ibasha gukora byose.

#2 Ibuka Ibyo Wanesheje

Ikintu cya kabiri ugomba gukora niba ushaka kunesha ibihanda biri imbere yawe, ni ukwibuka ibindi wagiye unesha hamwe n’Imana. Niba ugeze mu gihe gikomeye, ibuka ibyo Imana yakunyujijemo ikagukiza. Wireba kure ujya, ahubwo reba kure wavuye.

#3 Atura Amagambo y’Ubutsinzi

Ntibishoboka kandi kuvuga Ijambo ry’Imana utavuze amagambo y’ubutsinzi. 1 Samweli 17:46-47, Dawidi abwira Goliyati uburyo agiye kumunesha. aramubwira ati "Uyu munsi Uwiteka arakungabiza, nkwice nguce igihanga, kandi ndagaburira ibisiga byo mu kirere n’inyamaswa z’inkazi zo mu ishyamba intumbi z’ingabo z’Abafilisitiya, kugira ngo abo mu isi yose bamenye ko muri Isirayeli harimo Imana, kandi ngo iri teraniro ryose rimenye ko Uwiteka adakirisha inkota cyangwa icumu, kuko intambara ari iy’Uwiteka kandi ari we uzabatugabiza."

Nkunda uburyo Dawidi yamenye icyo ari bukore. Yarirutse ajya ku murongo w’urugamba, yiringira Imana kandi yatura n’ijwi rirenga ibigiye kuba ku gihanda. Urabona iyo dushyize ubushizi bwacu bw’amanga mu Mana, tubasha ibiturwanya byose. Ushobora kwatura Ijambo ry’Imana, ukavuga uti "Nzi uwo ndi we, kandi nzi ko Imana ari Imana yanjye. Ndi umwana w’Imana Ihoraho. Nta kibasha kunesha. Iri ni isezerano ry’Imana, kandi nzikomeza kuri ryo. Sinzacogora!"

#4 Ubaha Imana

Ikirenze byose, Dawidi yari yiringiye Imana yonyine kandi ni yo yahaga icyubahiro cyose. Ibyo yagomba gukora nta cyo byari bimubwiye, kuko yari azi icyo Imana iri bukore. Ntidukwiriye kwirebaho, dukwiriye kureba ku Mana kandi tukamenya ko hamwe na yo byose bishoboka.

Ntugomba kuneshwa n’ibinyoma bya Satani, kandi ntugomba gusubira inyuma. Ubasha kunesha ibihanda biri imbere yawe, ukabona intsinzi yuzuye. Imana ntishaka ko ucogora, ahubwo irashaka ko uhaguruka. Hamwe no gufashwa na yo n’ubutwari bwawe, ubasha gusoza ibyo watangiye!

Joyce MEYER