Intambwe 3 zo gusubira inyuma

Mu gitabo cy’umugenzi cyanditswe na Yohana Bunyan mu mwaka 1676-1678 ubwo yari muri gereza. Muri iki gitabo havugwa abantu benshi kandi bari mu rugendo ,nubwo ingendo za bamwe zari zitandukanye. Harimo abajya mu nzira abandi bayivamo, harimo abacantege mu rugendo. Harimo uwitwa Mukristo inkuru itangira yirukanka ahunga umudugundu witwa Rimbukiro ashaka kugera ku musozi Siyoni.

Ibi bitwerekako ubuzima bw’umukristo ari urugendo rwo kuva ahabi ugana aheza, kuva mu bibi ujya mu byiza, kwitandukanya n’ibyaha ukora ibishimwa n’Imana kandi wirinda ibica ntege.
Na none mu Itangiriro ibice 12 hatubwira uko Imana yabwiraga Aburahamu kugenda akava iwabo agasiga byose agatera intambwe yerekeza aho Uwiteka yagombaga kumwereka hanyuma agahabwa umugisha n’Imana.

Imana ibwira aburahamu ati” Va mu gihugu cyanyu, usige umuryango wanyu n’inzu ya so, ujye mu gihugu nzakwereka. Nzaguhindura ubwoko bukomeye, nzaguha umugisha, nzogeza izina ryawe, uzabe umugisha. Kandi nzaha umugisha abakwifuriza umugisha, kandi uzakuvuma nzamuvuma, kandi muri wowe ni mo imiryango yose yo mu isi izaherwa umugisha.”(Itangiriro 12:1-2)

Hari imbaraga ziba mu masengesho, hari imbaraga z’abantu bakunda Imana

1.Kwiyibagiza iby’Imana

Hano umuntu yiyibagiza ko urupfu rubaho, akibagirwako azacirwaho iteka. Iyo umuntu atangiye kwiyumvishako atagishoboye iby’Imana, akumvako gutamba atakigushoboye,akumva gutaramira Imana atakigushoboye, akumvako guha Imana icyubahiro atakigushoboye, agatangira kwiyibagizako urupfu ruhari, ntakunde nicyamwibutsako urupfu rubaho, akyibagizako azashyirwa no mu rubanza nyuma y’ibyo akora. Ukora ibi aba amaze gutera intabwe ijya inyuma (reverse).

Uyu atangira gutakaza impano zimwe na zimwe z’Umwuka Wera, ntaba akigira urukundo n’ibyishimo n’amahoro, no kwihangana no kugira neza, n’ingeso nziza no gukiranuka, no kugwa neza no kwirinda. (Abagalatiya 5:22-23)

2.Kureka gukora ibigukwiriye

Umukristo hari ibintu abakwiye gukora bisaba ko atabikorera mu iteraniro nko gusoma ijambo ry’Imana yiherereye, kubabazwa n’ibyaha biri mu mutima we. Iyo umukristo ageze ku rwego rwo gukora icyaha akacyiriranwa akacyirarana aba atangiye kuzima, aba yegera urupfu.

Umugabo umwe yigeze kubaza mugenzi we ati ‘Ese ko turi abavugabutumwa twembi , njye ndabwiriza abantu ntibakizwe ariko wowe wabwiriza muri sitade ibitangaza bigakoreka, abantu bagakizwa ni ukubera iki ? Njya kubwiriza ngataha uko nabwirije ariko wowe wabwiriza akanya gatoya abantu bagahaguruka ibihumbi n’ibihumbi kwakira Imana, wowe wabitewe ni iki? Undi na we aramusubiza ngo narunguruke mu idirishya,amubaza icyo abonye, undi nawe umusubizako abonye abantu mu muhanda, uti ongera urunguruke aramubwirango abonye abagore n’abagabo, abahungu n’abakobwa batembera mu muhanda nuko wamugabo arahaguruka ararira cyane, aramubwirango ubona abantu bari mu muhanda ukabona basa n’abafite amahoro ntiwababwiriza ngo bakizwe, njye simbabona nk’abari mu muhanda, mbabona basa nabagana inzira y’urupfu bajya kurimbuka.

Igihe utabona abantu bagana iy’urupfu ntushobora kubabwiriza bakizwe,igihe ureba abahungu,ukareba abakobwa, abagabo n’abagore ukareba abatware ukabona isi ya none isa n’idamaraye ifite amahoro,ntushobora kuyibwiriza ikizwe.

Intwaro zimwe na zimwe z’uyu nguyu ziba zitagikora akazi kazo, izo ntwaro ni izi ” Mwambare intwaro zose z’Imana, kugira ngo mubashe guhagarara mudatsinzwe n’uburiganya bwa Satani. Kuko tudakīrana n’abafite amaraso n’umubiri, ahubwo dukīrana n’abatware n’abafite ubushobozi n’abategeka iyi si y’umwijima, n’imyuka mibi y’ahantu ho mu ijuru. Nuko rero mutware intwaro zose z’Imana, kugira ngo mubashe gukomera ku munsi mubi, kandi murangije byose mubashe guhagarara mudatsinzwe.

Muhagarare mushikamye mukenyeye ukuri, mwambaye gukiranuka nk’icyuma gikingira igituza, mukwese inkweto, ari zo butumwa bwiza bw’amahoro bubiteguza, kandi ikigeretse kuri byose mutware kwizera nk’ingabo, ari ko muzashoboza kuzimisha imyambi ya wa mubi yose yaka umuriro. Mwakire agakiza kabe ingofero, mwakire n’inkota y’Umwuka ari yo Jambo ry’Imana.(Abefeso 6:11-16)

3. Gutangira kwitandukanya n’abakirisito bakijijwe by’ukuri

Nubona umuntu ageze ku rwego rwo guhunga abana b’Imana abo basenganye, abo baririmbanye, abo yabwirije n’abo yasenganye na bo , uzamenyeko ari gutera intambwe ya gatatu yo gusubira inyuma. Bibiliya iravuga ngo “ Hahirwa umuntu udakurikiza imigambi y’ababi, Ntahagarare mu nzira y’abanyabyaha, Ntiyicarane n’abakobanyi. Ahubwo amategeko y’Uwiteka ni yo yishimira, Kandi amategeko ye ni yo yibwira ku manywa na nijoro. “ (Zaburi 1:1-2)

Umukiristo utakibwira iby’Imana, utakibwira amatekeko yayo atangira kuba incuti n’abapani, uwizera n’utizera bahuriye hehe ? Uyu atangira kumva arambiwe n’ibiganiro by’abakrisito akumva ntabishaka, akumva ntibagezweho, akumva batajyanye n’igihe.

Umukiristo wateye iyi ntambwe yo kwihunza abakijijwe ntabwo aba akinejejwe no guterana kwera kw’abana b’Imana. Dawidi yaravuze ngo narishimye cyane naranezerewe ubwo bambwira njye mu nzu y’Imana.

Uyu mukiristo wateye iyi ntambwe atangira kumva afite isoni zo kwitwaza Bibiliya mu muhanda, atangira kubana n’abakunda iby’isi. Ntaba agifashwa n’ibihimbano by’umwuka wera n’indirimbo zo guhimbaza no kuramya Imana ahubwo atangira kwifatanya n’ibimwongerera ubusabane n’isi, kandi atangira gukinisha ibyaha bitaremereye ku mugaragaro mu butumwa bugufi yohererezanya n’inshuti, yoroshya ibyaha akabihindurira amazina, iyo abona abakijijwe n’ababimubwira gukizwa abyita gukabya agakiza cyangw gukomeza ibintu.

Uwiteka Imana ibakomeza gukiranuka

[email protected]