Inshamake y’igitabo cya YOBU

Yobu mu rurimi rw’igiheburayo risobanura ngo kugaruka, kwihana; ni ukuvuga ugarukiye Imana. Uyu Yobu Bibiliya yahinduwe n’abagabo 70 (LXX) imugereranya na Yobu umwami wa 2 wa Edomu (Itang 36:33). Kubera ko nawe akomoka kuri Esawu. Uyu Yobu yari ikirangirire mu karere yari atuyemo.Yobu yari umukiranutsi.

Abayuda bavuga ko igitabo cyanditswe na Mose igihe yari mu buhungiro i Midiyani; batekereza ko ubwo butayu bwari bwegeranye n’igihugu cya Edomu. Mose ashobora kuba yarumvise inkuru za Yobu ku bamukomokaho, kubera inkuru nziza za Yobu zakwiye mu gihugu hose, zikwira mu mpande zose (7: 3) kugeza ubwo umuntu yagerageje kwerekana icyo abitekerezaho mu magambo cyangwa mu nyandiko (13 :26).

Igitabo cya Yobu gishobora kuba ari cyo gikuru muri Bibiliya kubera ko kitagira icyo kivuga ku mategeko y’Imana cyangwa ku buretwa bw’umuryango wera, igihe cyandikiwe ntikizwi neza.

Iki gitabo twakigabanyamo ibice 5 kugirngo ugisobanukirwe neza:

a)1-2: Ibigeragezo bya Yobu muri uyu mugabane tubonamo ukuntu Yobu yari yarahiriwe muri byose, ariko umunsi umwe akagwirirwa n’ibyago byatumye abantu bose bakuka umutima.
b) 3-31:6: Igisigo kirekire kirimo impaka Yobu ajya n’inshuti ze, buri muntu avuga ubugira gatatu yemeza Yobu kwihana.
c) 32-37: 4: Elihu nawe yaje ubwa kane avuga ibisa n’iby’abamubanjirije.
d)38:1-42:6: Imana ubwayo ifata ijambo yereka Yobu ko ubuhanga bwayo busumba kure ubw’ abantu.
e)42:7-17: Imana igaya inshuti za Yobu. Imana isubiza Yobu umunezero yari afite mbere.

Abisirayeli basanzwe bazi ko Imana ihemba abakiranutsi ibyiza naho ababi nabo ikabahemba ibibi.

Inkuru za Yobu zateye ikibazo gikomeye. Ni mpamvu ki umukiranutsi yababazwa? Igitabo cya Yobu kirateganya ibisubizo bine:

a) Ikigeragezo ni igihano: niko inshuti za Yobu zibwiraga;
b) Ikigeragezo ni icyigisho: niko Elihu yibwiraga;
c) Ikigeragezo tugomba kukemera uko kiri tutagira uwo tucyerekezaho,
uko niko Yobu yabibonaga.
d) Gusuzuma abana b’Imana: Ni cyo cyigisho cy’igitabo.

Inyigisho wakura muri iki gitabo

Ibigeragezo n’umubabaro ntibyoherezwa buri gihe kubera kuduhana ariko bifite akamaro ko kutwigisha no kuduhugura (Abah 12:1-2). Ibyiringiro byari muri Yobu byari birenze igihe yarimo.Yobu arahamya neza nubwo umubiri we waba waraboze, umurengezi we azahaguruka nyuma ya bose amurengere. Kubw’ibyo usanga Yobu ahamya kwizera kwe muri Kristo no ku muzuko wa nyuma (19:25-27).

Umusaraba wa Yesu Kristo ni wo waje gusobanura neza kiriya kibazo cyo kubabazwa k’ umukiranutsi. Twabonye umuntu w’umunyakuri utarigeze aboneka ari we ubabazwa kurusha bose. Umukristo nageragezwa akwiriye kumenya ko Kristo akomeje umurimo we wo kwezwa muri we kugira ngo abivemo akomeye muri Kristo no mu ijambo rye (2 Kor 10:13; 2 Tesal 1:4-5).

[email protected]