Ingaruka zizanywa no kutagenzura ibyo ururimi rwacu ruvuga

Bibiliya itubwirako ururimi ari ikintu gifite imbaraga kandi ko kutarugenzura bishobora kuzana ingaruka zikomeretsa ndetse rushobora no kwica. Kubw’ibyo rero dukwiye kugenzura ibiva mu kanwa kacu igihe cyose tuvuga.

Mu gitabo cy’imigani hatubwirako tuzarya ku mbuto z’ibyo tuvuga: “Ururimi ni rwo rwica kandi ni rwo rukiza, Abarukunda bazatungwa n’icyo ruzana.”(Imigani 18:21)

Ururimi rushobora kuvuga iby’ubuzima, umugisha urupfu n’umuvumo. Ibyo twavuga byose, amagambo yacu niyo azagaragaza imbuto kandi tuzaba bamwe mubazatungwa na zo.

Muri iyi nkuru,reka turebere hamwe kuri zimwe mu ngaruka zo kutarinda ururimi:

1.Tuzabazwa n’Imana buri jambo ryose ry’imfabusa twavuze

Umwami Yesu ubwe yatuburiye kutavuga amagambo y’ubupfu kuko amagambo tuvuga yose azadushinja imbere y’Imana.

“Kandi ndababwira yuko ijambo ry’impfabusa ryose abantu bavuga, bazaribazwa ku munsi w’amateka. Amagambo yawe ni yo azagutsindishiriza, kandi n’amagambo yawe ni yo azagutsindisha.”(Matayo12:36-37)

2.Amagambo tuvuga ashobora gukomeretsa ndetse akanica

Dukunze kuvuga ko ‘inkoni n’amabuye bishobora kuvuna igufwa , ko amagambo adakomeretsa’ ariko ibi si byo kuko amagambo tuvuga ashobora gukomeretsa abantu, agakora ibirenze kuvuna amagufwa kuko akomeretsa imitima n’ubuzima.

« Uvuga iby’ukuri yerekana gukiranuka, Ariko umugabo w’indarikwa avuga ibinyoma. Habaho uwihutira kuvuga amagambo yicana nk’inkota, Ariko ururimi rw’umunyabwenge rurakiza.(Imigani 12 :17-18)

Amagambo akarishye,akomeretsa ashobora kuba inkota ihinguranya umutima.Ashobora kuduca intege, agatuma tubura ibyiringiro tukifuza urupfu cyangwa kwiyahura.

Ubushakashatsi bwakozwe na Yale University,bwagaragaje ko abarenga inshuro 9 biyahura kubera itotezwa ry’amagambo . Ubundi bushakashatsi bwakorewe mu Bwongerza, bwavuzeko ½ cy’urubyiruko rwiyahura, biba bifitanye isano no kubwirwa amagambo mabi.Iyi mibare iratubwirako amagambo akomeretsa ari mabi, ko tudakwiye gutuka cyangwa ngo tubwire bagenzi bacu amagambo abakomeretsa.

3.Tuba twifatanyije n’ibikorwa bya satani

Niba tuvuga ko turi abakristo ariko ntitugenzure ibiva mu kanwa kacu, tuba twishyira mu kaga kandi dushyigikira ibikorwa by’umwijima.

Abafarisayo bari abahanga mu byanditswe ari n’abatambyi babwiwe na Yesu amagambo yababaje imitima yabo.

“Mukomoka kuri so Satani, kandi ibyo so ararikira ni byo namwe mushaka gukora. Uwo yahereye kera kose ari umwicanyi, kandi ntiyahagaze mu by’ukuri kuko ukuri kutari muri we. Navuga ibinyoma, aravuga ibye ubwe kuko ari umunyabinyoma, kandi ni se w’ibinyoma.(Yohana8:44)

Abafarisayo banze kwizera ukuri kuvuye ku Mana no kuri Yesu Kristo ahubwo bakwirakwiza ibinyoma byo kumushinja ibikorwa by’ubugome .

Nk’abakristo, igihe cyose tuvuze ibinyoma cyangwa ibindi bibi dushinja bagenzi bacu, tuba twifatanyije na satani.Igihe cyose dukomerekeje bagenzi bacu tuba dushyigikiye imigambi ya satani. Igihe cyose tuzaba twifatikanyije na satani , twarangiza tukihamya ko dutinya Imana, tuba dukwirakwiza ibinyoma ndetse dukora umurimo wa satani.

Ariko kandi bibiliya idusaba kuvuga ibishimisha Imana:“Urwo ni rwo dushimisha Umwami Data wa twese, kandi ni rwo tuvumisha abantu baremwe mu ishusho y’Imana, mu kanwa kamwe havamo gushima no kuvuma. Bene Data, ibyo ntibikwiriye kumera bityo. Mbese ye, amazi meza n’akereta yabasha kuva mu isōko imwe? Bene Data, umutini wabasha kwera imbuto za elayo, cyangwa umuzabibu wakwera imbuto z’umutini? Ni ko n’isōko itabasha kuvamo amazi y’umunyu kandi ngo ivemo n’ameza.( Yakobo3:9-12)

Nshuti, dukwiye kugenzura ibisohoka mu kanwa kacu, bikaba ibishimisha Imana kandi tugahagarara neza mu mwanya Imana idushakamo.

Sophie @Agakiza.org