Inama zifasha abakristo kwizihiza Noheli bishimye


Muri iyi minsi abantu benshi baruhijwe n’ubuzima babayemo , benshi babuze ababereka urukundo, abana babuze urukundo rw’ababyeyi kubera imiryango ihora mu makimbirane, imfubyi, abapfakazi, kubura inshuti n’abavandimwe n’ibindi byinshi bituma abantu bazinukwa ubuzima, bakaba babuze ibyishimo mu mitima yabo.
Muri iki gihe cy’iminsi mikuru ya Noheli n’umwaka mushya. Noheli ni umunsi mwiza abakristo bishimira ivuka ry’umukiza waje kubacungura ukaba n’umunsi w’ibyishimo byinshi kuko bahura n’inshuti n’abavandimwe bakishimana.

Gusa abenshi bakomeretswa no kubura ababereka urukundo muri iyi minsi mikuru ngo bishimane bityo agahinda n’amaganya akaba ari byo biranga imitima yabo.
Nshuti ese waba ubuze umuntu ukwereka urukundo muri iyi minsi mikuru kandi ukumva ntanicyo ikubwiye? Humura Imana irakuzi. Izi agahinda kawe, izi uko uba umeze iyo ubuze abawe, ububabare bwawe kandi yifuzako iteka wahora unezerewe. Imana ituba hafi ibihe byose kandi yifuza ko abakristo bayemerera ikomora ibikomere byo mu mutima yabo.

Iyi ni imwe mu mirongo ya bibiliya igufasha kwishima muri iyi minsi mikuru n’ubwo waba ubabaye:

1.Menya ko ukuboko kw’Imana kuguhoraho

Akenshi iyo umuntu ahuye n’ibibazo akabura n’uwo yatakira yumva yatakaza n’ubuzima. Muri iyi minsi mikuru abakristo ntibakwiye gutinya ikibi cyose kuko Imana iba yiteguye kubagirira neza.
“Uwiteka ni we mwungeri wanjye sinzakena,andyamisha mu cyanya cy’ubwatsi bubisi, anjyana iruhande rw’amazi adasuma. Asubiza intege mu bugingo bwanjye, anyobora inzira yo gukiranuka ku bw’izina rye. Naho nanyura mu gikombe cy’igicucu cy’urupfu sinzatinya ikibi cyose kuko ndi kumwe nawe, inshyimbo yawe n’inkoni yawe ni byo bimpumuriza, untunganiriza ameza mu maso y’abanzi banjye, unsize amavuta mu mutwe , igikombe cyanjye kirasesekara. Ni ukuri kugirirwa neza n’imbabazi, bizanyomaho iminsi yose nkiriho,nanjye nzaba mu nzu y’Uwiteka iteka ryose.”Zaburi 23

2. Ibuka ko Imana ikiza ibikomere ikomora inguma

Umutima ubabaye utuma nyirawo atentebuka ariko abakristo bakwiye kwibuka ko muri iki gihe twizihiza ivuka ry’umukiza bakwiye gutekereza ku rukundo Imana yabakunze kandi ko kimwe mubyamuzanye harimo kubakiza ibikomere bityo bagasingiza imbaraga n’ubushobozi bwayo bwinshi.
“Uwiteka yongera kubaka Yerusalemu, ateranya abimuwe bo mu Bisirayeli. Akiza abafite imitima imenetse, apfuka inguma z’imibabaro yabo. Abara inyenyeri, azita amazina zose, Umwami wacu arakomeye, ni umunyambaraga nyinshi, ubwenge bwe ntibugira akagero.”

3. Ibuka ko muri we harimo uburuhukiro.

Muri iyi minsi abakristo benshi bararushye: baruhijwe n’uburwayi, ubukene ,gushaka. Aho usanga n’iyi minsi mikuru ntacyo ibabwiye, ariko ni ngombwa ko basubiza amaso inyuma bakamenyako muri Yesu abarushye bose ariho baruhukira.
“Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, kuko kunkorera kutaruhije, n’umutwaro wanjye utaremereye.”Matayo 11:28-30

Mu kwizihiza umunsi mukuru wa Noheli, abakristo bakwiye gufata igihe bakicara bakongera bagatekereza ku ivuka rya Yesu Kristo n’ubutumwa bwamuzanye hano ku isi, bakamwikoreza agahinda n’imibabaro yabo akabomora inguma zo mu mutima. Kandi bakurushaho gutekereza ku buzima bw’iteka ryose kuruta ibibagora bitari bimwe bya hano mu isi.
Imana iduhane umugisha

[email protected]