Inama zagufasha kugumana ubwiza bw’Imana

Muri iki gihe, usanga abakristo bavuga ubwiza bw’Imana,bakabuhamagara ngo buze bubane na bo mu rusengero, mu nzira bagenda,mu mirimo yabo ya buri munsi ariko ugasanga hari ibikorwa bakora Imana yanga urunuka bigatuma ubwiza bw’Imana butaboneka muri bo.

Mu minsi ya kera Imana yajyaga ihana abantu bayo iyo babaga bayigomeye,ikabateza ibyago ndetse ikabagabiza abanzi babo bakabarimbura ariko kuko Imana ari inyembabazi ikagira impuhwe, iyo bemeraga guhindukira bakava mu byo barimo,umucyo wa yo wongeraga kubarasira,ubwiza bw’Imana bukongera kugaragara muri bo .

No muri iki gihe abakristo hari ibintu bakwiye kureka kugira ngo ubwiza bw’Imana bwongere bubane na bo kandi umucyo wayo wongere kubarasira:

1.kwihana :Imana yajyaga ihana umuryango wa yo,ubwiza bwayo bukabavaho ariko iyo bihanaga bagaca bugufi, Imana yabagiriraga ubuntu ikumva gusenga kwabo.( 2Ngoma 7 :13-15).

Muri iki gihe usanga abakristo benshi bibeshya ko bihannye nyamara barabaswe n’ibyaha bahamagara ubwiza bw’Imana ntibuze bakagira ngo Imana nticyumva,ariko birakwiye ko abakristo babanza kwihana, ubwiza bwayo n’umucyo wayo bikabona kubarasira.

2.Gusenga :Gusenga ni intwaro ikomeye cyane ku mukiristo,kuko guhindura ibyanze guhinduka kandi bugatuma ubwiza bw’Imana bugaruka.Mu gitabo cy’umuhanuzi Yesaya 62 :1-7 ,hagaragaza neza ko kudahwema kwinginga Imana bituma ubwiza bwayo bugaruka kandi abantu bayo bakagira uburinzi bukomeye.

3.Gukora ibikorwa byiza :Birakwiye ko ibikorwa byiza(kwita kubabaye,kugaburira abashonji,gufasha imfubyi n’abapfakazi,,,,) bigomba kuranga abakristo kugirango ubwami bw’Imana bugume muri bo babana neza kandi bagafashanya nk’abavandimwe (Yesaya 58 :6-12).

4.kwisuzuma : Birakwiye ko abakristo bisuzuma mu byo bavuga ,bakora bakareba niba batagira uruhare mugutuma ubwiza bw’Imana buva muri bo (Zaburi 51:3-6).

Muri byose dukwiye guhora twinginga Imana kandi tukemerera umwuka wera akaba ari we utuyobora muri uru rugendo turimo kandi ubwiza bwayo n’umucyo wayo bikaturasira.

Imana ibahe umugisha!

Sophie Bakwiye