Impamvu 8 mu zituma abavugabutumwa benshi bahararukwa vuba?

Iyo umuntu yabwirije bikagenda neza hakurikira ho ubutumwa bwinshi bw’abamubwira ko bamukunda, ndetse n’ubutumire bukamubana bwinshi ku buryo binamugora kuboneka aho akenewe hose. Ariko ni uko abantu batabivuga uko biri burya si we baba bakunze, baba bakunze ibintu bimuvamo. Kuko iyo bitakigenda neza nka mbere ntiyongera kubabona, habe n’ubutumire burashira. Ni bwo rero tuvuga ko bahararutswe.

Pawulo kuva igihe yaherewe umurimo wo kuvuga ubutumwa, yabikoze kugeza apfuye ntiyigezeahararukwa ngo abantu barambirwe kumwumva, sinzi impamvu mu matorero y’iki gihe wumva abantu babaza ngo : « ni nde uri bubwirize ? » wamubwira ngo ni runaka agahita akubwira ati : « apuuu uriya yari uwa kera ; Uriya yararangiye ; Nta mwanya mfite wo guta » N’izindi mvugo ziteye agahinda nk’izo zose.

Dore zimwe mu mpamvu mbona zituma ibyo bibaho kandi mu gihe gito.

1. Gushakira indamu mu butumwa bwiza

Si bibi guha umuvugabutumwa amafaranga bamwe bakunda kwita « agatike k’umukozi w’Imana ». Ariko aya mafaranga ni kimwe mu bikayura abavugabutumwa muri iyi minsi.

Akenshi iyo umuvugabutumwa atangiye kumenyekana, iyo atabaye maso satani asura umutima we akamwemeza ko akomeye ndetse akamuha imirongo ifatika y’uko ayo mafaranga ayakwiye. Iyo bigeze kuri uru rwego biba byamaze kuba bibi ku buryo ibyari ivugabutumwa biba byahindutse ubucuruzi. Birumvikana ko abadafite ubushobozi batabona ubabwiriza ubutumwa bwiza.

Pawulo yabwiye abakorinto ko bikwiriye ko uwababibye mo iby’umwuka bakwiye kumubibamo ibitunga umubiri, ndetse ko yarafite uburenganzira bwose, ariko kandi abibutsa ko bidakwiye kuba inkomyi z’ubutumwa bwa Kristo akaba ari nayo mpamvu atabikora. 1Kolinto 9 :11-12.

Uzasanga bamwe bavuga ngo ni ugusatura, bivuga ngo : « Ninitangisha bakayatanga ava mo turasatura » Ahatari mo kwitangisha bagakoresha iyi nyito yo gusatura ashaka kuvuga ko babwirije cyane. Njyewe ariko akenshi mbona uku atari ukubwiriza cyane ahubwo ari ukuvuga cyane (Gusakuza),

2. Icyubahiro no gusa n’abandi

Umuntu ugihamagarwa aba yicisha bugufi, atinya Imana yumva ko ari yo ikwiriye kubahwa. Mu ngendo zitandukanye akora z’ivugabutumwa ahuriramo n’abantu bafite imico itandukanye. Iyo atangiye kugereranya uburyo i Bunaka bamwakiriye n’uko ahandi bamwakiriye, aba atangiye kugenda asubira inyuma. Intebe bamwicaje ho, amashyi bamukomeye ahagurutse, ayo bakomye amaze kubwiriza, n’ibindi nk’ibyo.

Ubundi ugasanga umwe yibaza ngo nakora iki ngo nanjye nkore cyangwa nemerwe nka runaka. Akiyibagiza ko Iyamuhamagaye ari nayo yahamagaye uwo wundi yifuza gusa nawe, ntatekereze rero impamvu yamuhamagaye mu buryo butandukanye nawe ahubwo agashaka gusa nawe.

Dore bimwe mu byo bahera ho : Nanjye njye ngenda mu modoka nziza ihesha Imana icyubahiro nka Runaka ; Nanjye bajye bantwaza ibitabo nka runaka ; Nanjye nambaye nka Runaka byambera, Nanjye nkwiye kuvuga nk’umuntu usobanutse wize, aha ni ho usanga babwiriza bagoreka indimi bavuga amagambo uburyo bwuzuye ubwibone, Yesu agahinduka yosu, Umwami agahinduka umuwami n’ibindi nk’ibyo. Uzanasanga bavanga indimi rimwe na rimwe ziri mo n’amakosa kandi batanitaye kukumenya niba abo babwira bose babasha kumva izo ndimi.

3. Kubura umwanya wo gusenga

Bataraba ibyamamare, bagiraga umwanya wo gusenga. Kuko ibibwirizwa biva ku Mana kandi ibiha uwayegereye mu buryo bwo gusenga. Aba bavugabutumwa rero umwanya ubabana muto bakabura uburyo bwo gusenga. Iyo ubutumwa bw’Imana bushize babura ikindi babwira abantu kubera baba badaherukana n’Imana ngo ibahe ubundi. Kuko gahunda yo kubwiriza batayihagarika rero bahita batangira gutanga ubutumwa bw’abantu, cyangwa bwabo ku giti cyabo mu mwanya w’ubw’Imana.

Ni bwo uzumva umuntu ahabwa umwanya wo kubwiriza, igice kinini cy’umwanya we akakimara avuga abantu cyangwa yivuga we ubwe. Usanga atari n’ubuhamya bwagira icyo bwungura itorero, usanga higanjemo ukuntu akomeye, atunze, ibihugu yagenze, amashuri yize, Ibitangaza yakoze igihe yabanaga n’Imana kugira ngo yemeze abantu ko akoreshwa n’Imana, Imana yo akayivuga nyuma kandi umwanya muto cyane.

Bibiliya itwereka inshuro nyinshi ko Yesu yabwirizaga ku Manywa nijoro agasenga. Niba Yesu yarasengaga atyo kandi yari umwana w’Imana, wakwibaza, umuntu umara amezi abiri atatu… abwiriza adasenga ibyo abwiriza abikura he ?

Ibi bituma abavugabutumwa benshi babwiririza hejuru y’ibyaha kuko batabona umwanya wo kwegera Imana ngo bihane, kandi iyo babikoze kenshi bakabona nta kibazo bageraho bakabimenyera, ubutumwa bwiza bakabufatanya n’ibyaha. Biza kurangira rero amakosa yabo abaye menshi akamenyekana, abo babwira ntibabe bacyumva ibyo bababwira ahubwo bakirebera gusa ibyo babaziho.

4. Gukunda idini kuruta Imana

Iyo umuntu abaye umuvugabutumwa, idini asengera mo rimufata nk’umutungo bwite waryo. Akenshi ugasanga ntibimukundira kuvuga ubutumwa mu zindi nsengero, abamuyobora bikanga ko azagenda ntagaruke. Iyo rero nawe akomeje kubakira impano ye ku kunezeza bene idini birangira atagikorera Imana ahubwo asigaye ari umukozi w’Idini. Ku buryo ashobora kubona ikibi mu itorero akacyirengagiza kubera inyungu z’idini.

Hari abahabwa ibyo bagomba kwigisha kubera icyo idini rishaka mu bayoboke. Ubwo ntibuba bukiri uutumwa bw’Imana. Iyo umuvugabutumwa abuze imbaraga zo kurwanya uyu mwuka, bituma abantu bamuhararuka vuba, kuko Umwuka uri mu itorero ry’Imana ni umwe, iyo uzanye ubutumwa butari ubw ‘umwuka rero abanyamwuka bari mu itorero baramumenya kabone n’ubwo yabeshya ko ari Imana yamutumye nk’uko abenshi babibeshya, ariko birangira abantu batagikunda kumutega amatwi.

Hari n’abandi bahindurira abantu kuba ababo aho kuba aba Kirisitu, nk’uko twabivugaga haruguru. Iyi ni nayo mpamvu tubona amadini avuka buri munsi ariko ntihaboneke ukugabanuka kw’ibyaha bikorerwa mu isi. Iyo umuvugabutumwa amaze gushinga idini akenshi abantu bamufata nk’ugeze mu rundi rwego bitoroshye ku mugera ho, bityo umubare w’abantu yabwirizaga uhita uyoyoka agasigarana umubare w’abayoboke be gusa, rimwe na rimwe usanga bahise biyita amazina aremereye cyane ku buryo bitacyorohera abantu kubageraho.

5. Kutamenya gutandukanya imihamagaro

Iki nacyo ni ikibazo gikomeye mu matorero atandukanye. Umuntu wese ugaragawe ho n’impano yo kubwiriza abayobozi b’itorero bahita bamutekereza nk’umupasiteri, umwarimu, umuyobozi w’amasengesho, n’indi myanya y’ubuyobozi mu itorero. Aha bijya gusa n’uwo babonye amaze kugira amafaranga, bamushakira inshingano batitaye ku cyo ashoboye ahubwo ari ukubera inyungu bamushaka mo.

Kubwiriza ni umuhamagaro ukwawo no kuyobora ni umuhamagaro ukwawo. Akenshi iyo umuvugabutumwa ahawe imwe mu nshingano z’ubuyobozi, yibwira ko ari iterambere agize, ndetse abenshi bavuga ko Imana yari yarabibabwiye, ariko ikibikurikira ni uko ari ukuyobora atabikora neza, ndetse no kubwiriza bikarangirira aho kuko babivangiye.

Inshingano z’ubupasiteri n’izindi nk’izo ni umuhamagaro wo kuragira umukumbi. Nta kubishidikanyaho rero, uragiye umukumbi aba ari umuyobozi wawo. Ibi bitandukanye cyane no kubwiriza. Mose yari umuyobozi w’abisiraheri nyamara ntiyari azi no kuvuga neza, Imana imuha Aroni nk’uzajya amufasha gutambutsa ubutumwa.

Ibi bisa neza nko gufata umuntu wize kuvura ukamujyana mu mategeko. Ese yabibasha? Ari ukuvura ntabikora ari n’amategeko ntayashobora kuko atari impuguke muri yo.

Abayobora amadini bakwiye kumenya gutandukanya ibi bintu, bagashyira ho urwego rw’abavugabutumwa rugatandukana cyane n’urw’abapasiteri, abarimu n’abandi bayobora umukumbi. Iki nacyo ni ikibazo gituma abavugabutumwa benshi bahararukwa vuba.

6. Akamenyero

Yesu uko yari ari ejo n’uyu munsi ni ko akiri kandi ntazahinduka, uko ni ukuri. Ariko ntibivuze ngo tumumenyere. Kuki abavugabutumwa benshi usanga bafite ibintu bamenyereye ko bigomba kubaho igihe babwiriza kandi aho babwiriza hatatandukanye ?
Niba yarabwirije i bunaka yatera haleluya akabona bakomye mu mashyi cyane, ajya n’ahandi yabona batari gukoma mu mashyi cyane akagira ngo ntibafashijwe, kandi mu by’ukuri ikimenyetso cyo gufashwa si amashyi menshi n’akaruru, niko gutera ya haleluya umwanya ugashira ari muri haleluya zidashira. Ikibazo si uko abantu batafashijwe, ahubwo ikibazo ni ugushaka ko bigenda nk’uko ubushize byagenze.

Aha ni ho uzasanga bamwe barabahimbye amazina ya bimwe mubyo bakunda kugarukaho babwiriza ngo bituma abantu bafashwa. Abantu ntibafashwa n’udutendo yakoreshejwe mu kubwiriza ahubwo bafashwa n’umwuka w’Imana uherekeza ibyo avuga.

7. Ubuhanuzi bw’ibinyoma

Abantu benshi bagenda batakariza icyizere ubuhanuzi kubera umubare munini w’ibyo babahanuriye bababeshya ntibibe cyangwa bikabagiraho ingaruka mbi. Usanga umuvugabutumwa yabwirije neza abantu bafashijwe, ariko satani akababeshya ko kugira ngo yemerwe kurutaho ari uko yongeraho ngo : « Imana iravuze ngo… » n’ubwo yaba itavuze.
Hari n’ababihimbira aho kugira gusa ngo bemeze iteraniro, cyangwa akabikora kubera abandi yabonye babikora. Ibi bintu bibabaza Imana n’abantu cyane, kuko bituma abantu b’Imana batabasha gutandukanya imvugo y’Imana nyakuri n’iz’abantu.

Umubare munini w’abahanuriwe, babitse amasezerano menshi y’ibinyoma ndetse birirwa mu butayu basenga bayishyuza Imana kandi atazasohora kuko atari yo yayatanze. Hari n’aho bahanura bakabaha amafaranga bigatuma aho abonye bishoboye hose bajya kubahanurira kugira ngo abone uko abakuramo amafaranga.

Iyo babikoze kenshi rero abantu barabibwirana bagata agaciro batyo. Kandi uretse n’ibyo, bazabona ishyano abahanura ibinyoma, Imana ubwayo ndikishije ko ibibasiye. Ezekiyeli 13:1-8

8. Kutagira amahugurwa

Abavugabutumwa ntibakunda kugira aho bahurira ngo bahugurwe ku bijyanye n’umurimo bakora, usanga buri wese yimenya ni naho kuyoba bituruka kuko ntawo kubayobora. Akenshi n’amwe mu makosa yabo usanga avugwa hanze ariko nta muntu utera intambwe ngo abahugure, n’ubwo rimwe na rimwe nabyo biba bitoroshye, iyo bamaze kugira umubare munini w’ababakomera mu mashyi usanga ubabwira igitandukanye no kubashimagiza bamufata nk’ubarwanya ndetse nk’udakijijwe neza. Ariko bishobora kuba bigirana isano n’uburyo byakozwemo.

Rero guhugura, guhugurwa no guhugurika, ni imirimo myiza ikwiye kwitabwaho mu ivugabutumwa kandi igakorwa mu buryo bwiza butuma itanga umusaruro. Abayobozi b’amadini ntibakwiye kurebera gusa ngo birengagize uwo murimo mwiza.

Niyondora Vedaste [email protected]