Impamvu 7 zituma dutanga icyacumi n’amaturo/ Pastor Desire HABYARIMANA

Abantu benshi bafite umutima ubacira urubanza ku cyacumi n’amaturo kandi ntakuri bafite guhagije kuko buri wese afite umurongo we. Bamwe bumva bakwiye kugitanga abandi bumva badakwiye kugitanga, abandi inyigisho zo kuri radiyo zimwe na zimwe zagiye zibabwirako kugitanga ari bibi.

“Umuntu nankorera ankurikire, kuko aho ndi n’umugaragu wanjye ari ho azaba. Umuntu nankorera Data azamuha icyubahiro”( Yohana 12:26)

Hari abantu benshi bavugako Yesu atigeze yigisha icyacumi ariko yaravuzengo ntiyaje gukuraho amategeko ahubwo yaje kuyakomeza. Nubwo atigeze abivuga muri aya magambo avuge ngo mutange icyacumi ariko ntabwo yakuyeho gutanga icyacumi, na we ntekerezako yagitangaga kuko yubahaga umuco wa kiyuda wose uko umeze. Ni ukuri reka mbabwize ukuri iyo umuntu yagize intege nke ntabura imirongo yo muri bibiliya imushyigikira ariko rimwe na rimwe umutima uba ugucira urubanza, ukubwirango ibyo ukora ntabwo ari byo.

Izi nizo mpamvu zituma dutanga icyacumi:

1.Urukundo dukunda Imana:
Ntabwo dutanga icyacumi kugirango tutagira umuvumo, ahubwo ni urukundo dukunda Imana. Niba ukiranirwa ku cyacumi, ntutange amaturo, ni ikimenyetso cy’aho ugeza gukunda Imana, ibisigaye ni ukubeshya. Hari abantu bageze ku rwego rwo gutanga icyenda ku icumi, batagitanga icyacumi. Itegeko rya mbere riravugango ukundishe Uwiteka umutima wawe wose. Guha ikintu umuntu ukunda ntabwo bigusaba imibare kuko ikintu cyiza cyose uba ubona ariwe gikwiriye, ibyo ubiterwa nuko umukunda. Niba ugihatirwa gutanga icyacumi n’amaturo ni ikigero ugezeho cyo gukunda Imana, ubaye ukundisha Imana umutima wose ntiwayima amafaranga.

Hari ukuntu batatwigishije gukunda Imana , ahubwo twebwe twikundira mu mana. Urugero Yesu yatanze imigati abantu benshi barenze 20.000, hanyuma Yesu aherako arabakwepa ajya hakurya y’inyanja, bamushaka iminsi 3 bataramubona , bamubonye baramubwirango Yesu mwigisha mwiza kuki twakubuze ? Murabiziko iyo aduhaye imigati aherako aba mwiza, hanyuma iyo yabuze ?

Bibiliya iravugango abasitaza abishaka, arababwirango sinjye mushaka ni imigati nabahaye ejo bundi, yari yigishije inyigisho igoye kuyumva “ Ninjye mutsima w’ubugingo, undya azabaho” baravuga ngo mbega umusazi.

Hari abantu binkundira mu mana ariko batayikunda, usanga iteka iyo baje ku Mana baba basaba gusa, biragoye kubona umuntu asenga Imana imisi 3,7,21, 40, 120 arimo ayishimira, iteka duhora muri Mana mpa. Bibiliya iravugango abantu banjye bitiriwe izina ryanjye nibaza bashaka mu maso hanjye, nzamanuka mbakize, mbakirize n’igihugu. Aho gusenga dushaka mu maso h’Imana dusenga dushaka mu ntoki zayo kuko mu ntoki zayo hari ibifatika: abagore, abagabo, amazu, amafaranga, promotion ariko mu maso h’Imana hari imbabazi, hari ubuntu, hari ubumwe, hari ubusabane. Imana ishobora kuguha ibiri mu ntoki zayo ikakwima mu maso hayo. Ugatera imbere, ukarongora, ukarongorwa ariko ntuzigere ubona mu maso h’Imana. Niko byagendekeye ab’Isirayeli yabahaye ibyo imitima yabo yifuza ariko barimbukira mu butayu, hari ivangirwa abarokore dufite, dutekerezako ufite ibifatika byinshi ariwe ubana n’Imana neza.

Ikintu kibabaje umuntu wese uza mu rusengero abaje gushima ibifatika: Gutera imbere, kubyara, akazi…noneho abari mu iteraniro badafite nk’ibyo bakagirango bo Imana ntibumva. Burya uwashima neza yakongeraho ko hari n’ingeso za kamere Imana yamukijije ariko kubera guhora dushima ibifatika gusa bizana urujijo mu mitwe y’abantu.

2. Intambara Imana yaturwaniriye:
Aburahamu ni we muntu wa mbere watanze icyacumi n’amaturo, yagihaye amutambyi , ubwo yatabarukaga amahoro avuye gutabara Roti. Yarwanye n’abasirikare 300 abasha kubohoza Roti n’ibintu bye, uwo munsi niwo wambere yatanze icyacumi.

Ese Imana ikubwiyengo irakuzamuye ntawundi iba imanuye? Iyo ikubwiyengo ikwicaje ku ntebe hari undi iba iyikuyeho. Imana iturwanira intambara zikomeye, ubu Imana igukoze ku maso ukareba intambara ikurwanirira: Ikakwereka ishyari, impanuka yagusimbukije wahahamuka. Iyo dutanga icyacumi dushingira ku ntambara zose Imana yaturwaniye, iyo ubona umaze ukwezi kose uhembwa, ucuruza ukunguka hari abakureba bakona utari ukwiye kuba aho.

3.Umugisha Imana yaduhaye:
Ntabwo dutanga icyacumi kugirango Imana iduhe imigisha, kuko ntabwo tugura n’Imana. Iyo urebye abantu batizera batunze ibirenze ibyo abarokore bafite, dutanga icyacumi dushimira Imana umugisha yaduhaye. Hari ibintu biri mubuntu bwayo ukabyara abandi baratinze kubyara, ugacuruza ukunguka n’abapagani irabibakorera. Gutura i Kigali ntabwo abantu benshi batunzwe n’imishahara, batunzwe n’Imigisha Imana ibaha. Idasizemo umugisha wayo na duke uhembwa wapangira ukagirango wayataye, ntabwo ukwezi kwashira ariko rero kubw’umugisha w’Imana ibeshaho n’abadakora. Ibyo ubitekereje ntacyatuma udatanga icyacumi n’amaturo.

4.Gutanga ni ihame ryo kubiba no gusarura:
Bibiliya iravugango Imana ntinegurizwa izuru icyo umuntu abiba n’icyo asarura. Gushaka gusarura aho utahinze ntaho bitaniye no kurota ukanuye, abantu barashaka gusarura aho batabibye. Hariubwenge Imana izaha abantu bayo kugirango ubwami bw’Imana bwaguke.
Ni twiga kubiba tuzasarura ariko nitutiga kubiba mu bwami bw’Imana ntabwo tuzigera dusarura. Nta muntu uzava mu isi adasaruye: Niba wimana abandi bazakwima, niba wangana abandi bazakwanga, niba uvuga abandi nawe bazakuvuga, niba utanga nawe bazaguha, niba usengera abandi nawe bazagusengera. Ubu usaruye aho wabibye urumva wakishima ?

5. Kwamamaza ubwami bw’Imana:
Mu isengesho rya Data wa twese uri mu ijuru harimo ngo ubwami bwawe buze, nta bwami budaturisha, ubwami bubeshwaho n’imisoro y’abaturage. Ntabwo rero ubwami bwa Kristo bwabaho budaturisha. Ibyo dukorera Imana tuba twubaka ubwami bw’Imana. Iyo uriye icyacumi n’amaturo uba uvuzengo ubwami bwa Kristo nibuhagararire aho bwari bugeze. Ntibuzongere gutera intambwe. Kugirango ubwami bw’Imana bwamamare tugomba gutanga amafaranga.

6. Gushyigikira abakozi b’Imana kugirango babone ibyo kurya:
Higeze kubaho ikibazo mugihe cy’abatambyi, abantu bose barifata ntibaba bagitanga icyacumi n’amaturo, abatambyi bose baherako bava kuruhimbi, bajya gushaka ubuzima, ntekerezako hari havuye abavugabutumwa n’abapasiteri babakorerabushake. Mushobora gutunga abakozi b’Imana ntabwo bajya gushugurika. Gucuruza uri pastiri wirirwa urwana na rwandareveni ,urwana n’abakugurira ugahita uza wiruka wihanagura icyuya ujya kuyobora amateraniro , mbega ibintu bibishye we.

Ukajya gukina n’abantu diru(gahunda) zimwe zigapfa izindi zigakunda hanyuma bakakubona kuruhimbi ku cyumweru ! Abantu bananiwe gukora ibyo bagomba gukorera abatambyi, hanyuma nabo bakorere Imana. Rimwe abakristo batazi ibyo bakora babona Pasiteri yambaye ishati nshyashya bakavugango si icyacumi cyacu se, pasteri yambaye inkweto nziza bibatwaye iki ? Iyo urebye uburyo dusazisha abakozi b’Imana, abari inyuma ntab muhate bagira wo gukorera Imana. Bibiliya iravugango muzane icyacumi n’amaturo inzu yanjye ibemo icyo kurya.

7. Ubwishingizi ku mirimo yacu dukora:
Nzahana indyanyi nyibahora, ntizarimbura imyaka yo ku butaka bwanyu, kandi n’umuzabibu wanyu ntuzaragarika imbuto mu murima igihe cyawo kitaragera.
Ni ko Uwiteka Nyiringabo avuga. Kandi amahanga yose azabita abanyamahirwe, kuko muzaba igihugu kinezeza. Ni ko Uwiteka Nyiringabo avuga.( Malaki 3:11-12). Iyo dutanga icyacumi n’amaturo tuba dushinganisha ibyacu. Ushobora kwanga kuyatanga mu rusengero ukayatanga kwa muganga.Icyacumi tugitanga ku kintu cyose twungutse, umuntu aguhaye 5000 bya fanta 500 ntabwo ari ayawe.

Ubwo bubakaga ihema bakiraga ituro ry’umutima ukunze, n’umuntu wakozwe ku mutima akamenya intambara zose Imana imurwanira akabikora, nta muntu umuhase. Akamenya umugisha Imana yamuhaye.

[email protected]