Imirire yagufasha guca ukubiri na kanseri

Mu nyandiko yabanje twavuze kuri kanseri, tuvuga icyo ari cyo ndetse n’ibishobora kongera ibyago byo kuyirwara, cyane ko ikiyitera kugeza ubu kitaramenyekana 100% twagaragaje bimwe mu byo wakora ukagabanya ibyago byo kuyirwara, muri byo twavuze ko hari imirire ishobora kugabanya ibyago byo kurwara Kanseri,

nkuko twabibasezeranije rero mu nyandiko yabanje tugiye kugaragaza bimwe mu biribwa byifitemo ubushobozi bwo kugabanya ibyago byo kurwara iki cyago. ushaka kumenya byinshi mu byo twavuze mbere wasura iyi link: http://agakiza.org/?Sobanukirwa-indwara-ya-Kanseri-n-uburyo-bwo-kuyirinda.

Ntitwabura kongera kubabwira ko muri rusange kanseri ari indwara iteye ubwoba kandi ihangayikishije cyane ko itarobanura waba ukuze cyangwa uri muto, umuntu wese ashobora kuyirwara ariko kandi kugabanya ibyago byo kuyirwara birashoboka.
Abahanga batandukanye bavugako umubyibuho ukabije ufata umwanya wa kabiri (2) mu bintu bishobora kongera ibyago byo kurwara kanseri. nibyiza kurya indyo yuzuye igizwe n’ibirinda umubiri, ibiwubaka ndetse n’ibiwutera imbaraga ariko kandi ugomba kuyifata mu buryo bugufasha kuringaniza ibiro bikanakurinda kugira umubyibiho ukabije(Obesite).

Dore bimwe mu biribwa bifasha mu kugabanya ibyago byo kurwara Kanseri:

1. Kurya imboga zifite ibara ry’icyatsi kibisi nk’imboga rwatsi, dodo, broccoli, amashu,..izi mboga ndetse n’izindi zifite iri bara tutabashije kurondora ziba zikungahaye ku ntungamubiri zitandukanye nka VitaminC, B zitandukanye ,imyunyungugu itandukanye ndetse n’uturemangingondodo(Fibres) ndetse na phytochemical ibi byose bigafasha mu kugabanya ibyago byo kurwara kanseri.

2. Inyanya: nkuko bigaragazwa n’ubushakashatsi bwakozwe n’abanyeshuri bo mu ishuri rikuru ryitwa Harvard bugaragaza ko kurya inyanya bigabanya ibyago byo kurwara kanseri y’ibihaha, amabere, inkondo y’umura. inyanya zibishobozwa n’uko zikungahaye ku binyabutabire bifasha mu kubungabunga ubuzima bw’ uturemangingo mfatizo dukoze umubiri ,utu turemangingo mfatizo iyo tudafite ubuzima bwiza niho twabonye hava intandaro yo kurwara Kanseri.

3. Ibihumyo: nabyo biri mu biribwa bifasha mu kugabanya ibyago byo kurwara Kanseri zitandukanye ndetse bikongerera umubiri ubwirinzi kamere bw’umubiri bityo umubiri ukabasha kwirinda indwara zitandukanye ziterwa na virusi, bagitera n’ibindi, izi ndwara nazo kandi zishobora kuba imbarutso yo kurwara kanseri, mu gutoranya ibihumyo bisaba kwitonda kuko hari ubwo ushobora kubyitiranya n’iminyege kandi iminyege iteza ibibazo byinshi mu mubiri.

4. Sezame: ndetse n’utundi tubuto dukurwa mu biribwa bitandukanye aha twavugamo nk’imbuto z’ibihwagari, iziva mu gihaza ndetse n’izindi mbuto ziribwa kuko hari n’iziva mu biribwa ariko zikaba zitaribwa, izi mbuto rero zifasha mu guhangana n’iki cyago bitewe nuko ziba zifitemo ubushobozi bwo guhagarika uturemangingomfatizo tw’umubiri dushobora gukorwa tubaka twatera Kanseri.

5. Kunywa icyayi cy’icyatsi kibisi benshi bazi nka Green tea: cyongerera umubiri ubwirinzi kamere ndetse kinakungahaye ku binyabutabire nka catechins , Antioxidant na polyphenol ibi byose bifasha ku gugabanya ibyago byo kurwara kanseri ndetse bigafasha no gusohora uburozi mu mubiri bushobora kwangiza uturemangingomfatizo

6. Karoti: zikungahaye kuri carotene ihindukamo vitamin A iyo igeze mu mubiri w’umuntu bifasha mu gukumira kanseri zitandukanye, karoti zifite umwihariko wo kurinda kanseri y’ibihaha ku kigero cya 40%.

7. Imbuto zitandukanye cyane cyane pome,amacunga,indimu n’izindi zikungahaye kuri Vitamin C zifasha mu kongerera umubiri ubwirinzi kamere, si ibyo gusa izi mbuto ziba zikungahaye kuri vitamin zitandukanye ndetse n’imyunyu ngugu itandukanye ibi byose bifasha mu kugabanya ibyago byo kurwara kanseri.

8. Ibitunguru bitandukanye ndetse tungurusumu biba bikungahaye kuri vitamin C ndetse byifitemo ubushobozi bwo kurinda kanseri zitandukanye
9. Amafi : yo mu bwoko butandukanye cyane cyane akungahaye kuri binure bizwi nka Omega -3 fatty acids bifasha mu kongerera umubiri ubwirinzi kamere no gukumira kubyimbirwa ndetse n’ibindi bibyimba bitandukanye bishobora cyane gutera kanseri.

10. Ibiribwa bikungahaye kuri Vitamin D: ubusanzwe iyi vitamine tuyikura ku zuba cyane cyane kuri ririya riva mu gitondo ariko bitewe n’uko hari amezi aba atavamo izuba nko kuva mu kwa10 kugera mu kwa5 tuba tugomba kurya ibintu bibonekamo iyi vitamin kuko ifasha mu kurinda kanseri bimwe mu biribwa dusangamo iyi vitamin nko mu mata ndetse n’ibiyakomokaho,amagi,amafi ,ibihumyo n’ibindi.

Nubwo tugaragaje ibiribwa icumi 10 gusa ntabwo ari ibi, gusa bifasha mu kugabanya ibyago byo kurwara kanseri, twagerageje kwegeranya ibiboneka mu bice bitandukanye ndetse bikaboneka ku giciro kidahambaye mu rwego rwo guca ukubiri n’iyi ndwara nibura kuri buri funguro hakagombye kubonekaho bimwe muri byo nubwo hatabonekaho byose.

Source: Prevention.com

[email protected]