Imbaraga zitera abantu kubeshya Pastor Desire

Isi igendera ku kinyoma kuko Satani ari we se w’ibinyoma byose. Mu by’ukuri iyo umuntu ari umunyabinyoma murumva uwo aba akorera ikibabaje n’abakristo benshi barabeshya utuntu duto duto nta n’inyungu turi bubazanire ex: Kuri telephone, kubeshya abana, mu kazi wakererewe ugasinya ko wahageze kare, abacuruzi bakijijwe bakakubesha ayo baranguye atari byo, abana babeshya ababyeyi babo, abubakanye hagati yabo bakabaho ubuzima butarimo ukuri n’ibindi.

Tugiye kurebera hamwe icyo Bibiliya ivuga ku kinyoma.

Yesu yavuze muri Matayo 5:37 ati: ijambo ryanyu ribe ‘Yee, Yee’, ‘Oya, Oya’, ibirenze ibyo bituruka ku Mubi. Aha Yesu yashaka kuvuga ko ibyo tuvuga bikwiye kuba aribyo dukora.

Hari inkuru imwe muri Bibiliya ivuga ingaruka mbi zo kubeshya, ni inkuru ya Ananiya na Safira bagerageje kubeshya intumwa Petero ko ibyo bagurishije babizanye byose ( Icyo gihe abakristo basangira ibyabo ubishatse wese yaragendaga akagurisha isambu ye akazana ibiguzi akabishangira n’abandi kuko bose babaga hamwe).

Ananiya akihagera Imana ihishurira Petero ko abeshye bagabanije bakanyegeza bimwe bituma apfa, n’umugore we nawe abigenza atyo bituma apfa (Ibyakozwe n’Intumwa 5:1-11.)

Ibyabaye kuri Ananiya na Safira bikwiye kutwigisha ko Imana idakunda ikinyoma kuko Yesu ari inzira, ukuri n’ ubugingo. Dukwiye kwigisha ururimi rwacu kuvugisha ukuri kuko indwara zose, imibabaro yose n’urupfu byaje ku isi kubera ikinyoma igihe satani abeshya Eva akarya ku giti Imana yabababujije.

Ntibitangaje kubona Yesu yaravuze ko Satani ari “umunyabinyoma, kandi ari we se wabyo”! Ni we watangiye kuvuga ikinyoma. Igihe umuntu wese avuze ikinyoma, aba akora ikintu cyatangiye gukorwa na Satani. Dukwiye kuzirikana kuri icyo kintu igihe cyose tugeragejwe ngo tubeshye. (Yohana 8:44.)

Abantu babeshya kubera iki?

1. Hariho bamwe babeshya bivuye ku muvumo wo mu miryango:

Icyaha cyose umuntu akoze aba abibye imbuto izagira ingaruka Urugero: Aburahamu yigeze kugira integer nke abeshya ko Sara ari Mushiki we kugira ngo abanyegiputa batamwica bagatwara umugore we. Igitangaje umuhungu we Isaka nawe amanutse muri Egiputa nawe yabeshye ikinyoma kimeze nk’icyo se yabeshye ko Rebeka ari mushiki we, byarakomeje kugera ku rubyaro rwa 3 Yakobo yabeshye Se ko ari Esawu yiba umugisha, ku rwa 4, Amunoni yabeshye ko arwaye arembye kandi ashaka gufata ku ngufu mushiki we.

Byarakomeje kugera ku rubyaro rwa 7 umuvumo ni ikintu kibi cyane, hari imiryango usanga yaraboshywe n’ikinyoma naho yakizwa zikaba arizo ntege nke agira, agahora arwana no kubeshya, hari n’abifata bakibeshera ibintu bitigeze bibaho.

2. Hari ababeshya bitewe nabo babanye nabo kuko biri muri kamere yabo:

Hari ikintu kijya kintangaza ibice bimwe by’isi birimo abantu batabeshya nk’abazungu hamwe n’ibice bimwe bya Aziya abantu benshi ntibazi ijambo kubeshya, kwiba ntibiba mu buzima bwabo ariko Abanyafurika n’abakijijwe icyo kintu kirabagora cyane ku buryo atari Imana igira imbabazi kwizera ibyo Umunyafurika akubwiye biragoye.

Mu muco w’abanyafrika kubeshya ni ubuzima, ku buryo kubesha wagira ngo biremanye nabo iyo wumvise n’imigani abantu baca uhita umenya abo ari bo.

Umuntu aguhisha ko akwanga nawe ukamuhisha ko ubizi, nta guhandwa ku rurimi ibirenge bihari, umurenzaho wera ibijumba, arakubwira ngo sinzi aho mvuye ngo ariko bantumye ngo nkuramutse akakwemeza ko ukuri kose kutavugwa, etc
- Iyo umuntu aje kuri Yesu ntiyibuke kwitandukanya n’iyo migozi aguma aboshye.

3. Abantu benshi babeshya kubera ubwoba bw’ubuzima n’ejo hazaza:

Yesu mu nyigisho ze yakundaga kubuza abantu kwiganyira iby’ejo hazaza, ariko abantu benshi icyo kintu cyarababoshye ku buryo gitera abantu kubeshya kugira ngo babone ibizabatunga ejo hazaza. Yesu yaciye umugani w’umubibyi aza kugera ahantu ku mbuto zaguye mu mahwa akaziniga yaje kuvuga ko ari abantu bafite amaganya y’isi n’ibihendo by’isi bituma ijambo ry’ Imana ritagera ku ntego zaryo. Dukwiye kugirira Imana ikizere igaburira inyoni, ikambika uburabyo, ntiyabura kugaburira wowe.

Urugero: Abantu bajya i Burayi bakavuga ibinyoma ngo babone impapuro zituma baba i Burayi, ukabesha amazina yawe y’ukuri n’ay’ababyeyi, naho uvuka ukabona impapuro ariko ufite ikinyoma udashobora kuzihana habe na rimwe umutima ugahora ukubwira ko uzarimbuka kuko umutima nturya ruswa, ukuri uba ukuzi.

Dukwiye gukora iki?:

Dukwiye kumenya ko gukizwa ari ugutera intambwe yo guhinduka. Igihe cyose utuzuye Umwuka wera ngo ube ufite ijwi riguhana rikubwira ko ibyo uvuze bizagira ingaruka mbi uzakomeza kubeshya, ariko niwuzura Umwuka wera ukaba ufite ijambo ry’Imana muri wowe uzatsinda ikinyoma. Ikindi ukwiye kumenyereza ururimi rwawe kuvugisha ukuri kugeza igihe ruzagororoka rukamenyera kuvuga ukuri.

Iyi mirongo yagufasha uramutse ubonye akanya wayisoma ukayiyumviraho:

1. Nuko mwiyambure ibinyoma, umuntu wese avugane ukuri na mugenzi we, kuko turi ingingo za bagenzi bacu. (Abanyefeso 4:25);
- Ntimukabeshyane ubwo mwiyambuye umuntu wa kera n’imirimo ye, (Abakolosayi 3:9.)
- “Ntugashinje ibinyoma mugenzi wawe. (Kuvayo 20:16)
- Hariho ibintu bitandatu ndetse birindwi, Uwiteka yanga bimubera ikizira ni ibi: Amaso y’ubwibone, ururimi rubeshya, Amaboko avusha amaraso y’utariho urubanza, Umutima ugambirira ibibi, Amaguru yihutira kugira urugomo, Umugabo w’indarikwa uvuga ibinyoma, N’uteranya abavandimwe.
(Imigani 6:16-19)
- Ikivuzwe cy’ukuri kiraramba, Ariko iby’ururimi rubeshya bishira vuba 12:19;
NB: Imana izashira ikintu cyose mu rubanza n’ijambo ryose twavuze kubw’iyo mpamvu twirinde.
- Nta cyaremwe kitagaragara imbere yayo, ahubwo byose bitwikuruwe nk’ibyambaye ubusa mu maso y’Izatubaza ibyo twakoze. (Abaheburayo 4:13.)

Pastor Desire