Imbaraga zidushoboza guca mu bikomeye Pastor Bimenyimana

Mugenzi uragana mu ijuru ujye utumbira Yesu… (No 189 Indirimbo zo Gushimisha Imana)

IMBARAGA ZIDUSHOBOZA GUCA MU BIKOMBE DUCAMO

Zaburi 84:5-8 5Hahirwa ababa mu nzu yawe, Babasha kugushima ubudasiba. Sela. 6Hahirwa umuntu ugufitemo imbaraga, Hahirwa abafite mu mitima inzira zijya i Siyoni. 7Iyo banyuze mu gikombe cyitwa Baka bagihindura ahantu h’amasōko, Imvura y’umuhindo icyambika imigisha. 8Bagenda bagwiza imbaraga, Umuntu wese wo muri bo aboneka mu maso y’Imana i Siyoni.

Zaburi 23:4 4Naho nanyura mu gikombe cy’igicucu cy’urupfu, Sinzatinya ikibi cyose kuko ndi kumwe nawe, Inshyimbo yawe n’inkoni yawe ni byo bimpumuriza.

Ibyahishuwe 1:9-10, 17 9Jyewe Yohana, mwene So musangiye amakuba n’ubwami no kwihangana biri muri Yesu, nari ku kirwa cyitwa Patimo bampōra ijambo ry’Imana no guhamya kwa Yesu. 10Ku munsi w’Umwami wacu nari ndi mu Mwuka, inyuma yanjye numva ijwi rirenga nk’iry’impanda… 17 Mubonye ntyo mwikubita imbere nk’upfuye, anshyiraho ukuboko kw’iburyo arambwira ati “Witinya. Ndi uwa mbere kandi ndi uw’imperuka

Ibyanditswe bigaragaza ko isi n’inyanja byagushije ishyano kuko Satani yabimanukiye afite umujinya mwinshi, akaba azi kandi ko afite igihe gito. Mu bikombe no mu misozi niho duca tujya ibwami. Imana izi neza ko aho dutuye ariho intebe ya Satani iba. Nubwo afite umujinya mwinshi, Imana izi neza ko ubumara afite ntacyo buzadutwara. Yesu yadusezeranije kutadusiga nk’impfubyi kuko azatwoherereza Umufasha uzahorana natwe.

Hari igihe umuntu yibaza impamvu Imana yemeye ko tujya duhura n’ibibazo muri uru rugendo, Ni uko Imana yaremye umuntu imuhaye ubushobozi bwo guhitamo, yemera ko haza ibintu bimugereza ngo apimwe kugirango irebe urukundo ayikunda. Kandi yaduhaye n’ubushobozi bwo kurwanya Satani nawe akaduhunga.

INKOMOKO Y’IBIKOMBE DUCAMO : Imana yaremye umuntu imushyira muri Edeni , imubwira ko izajya imusura ariko aza gushukwa na Satani. Uyu azi neza ubwiza bw’ijuru ; ntabwo yifuza ko umuntu yazarigeramo. Umuntu amaze kuneshwa, wa muvumo wa Satani umujyaho, nibwo icyaha n’urufpu byinjiye. Kuva ubwo umuntu atangira kunyura mu bikombe byinshi bitandukanye.

Njyuma yo gukora Icyaha, ubutaka ntibwongeye kwera umwero wabwo, haboneka ibihanda umuntu kuko Imana yategetse amahwa kumera. Kuva ubwo abantu babaye mu buzima bukomeye bafite amarira menshi, kuko icyaha cyari cyinjiye. Nubwo isi ari mbi ariko iyo icyaha cyinjiye mu buzima bw’umuntu irushaho kumubera.

Amarira yabo yarakomeje kubw’ingaruka z’icyaha abana ba mbere babyaye nabo baricana, Kayini yica murumuna we Abeli. Kayini aratorongera baramubura, umubabaro n’agahinda birushaho kwiyongera. Nubwo ibirushya umuntu ari byinshi, Yesaya yahishuriwe ko abategereza Imana bo bajyenda bagwiza imbaraga.

Ibanga ryo guca mu bikombe ni ukwizera Yesu, kuko niwe nshuti nziza ihorana natwe ibihe byose. Dawidi we agira ati n’aho nanyura mu gikombe cy’igicucu cy’urupfu sinzatinya kuko ndi kumwe n’Uwiteka. Tube kumwe na Yesu kuko we nta na kimwe kimukanga. We, atandukanye n’abakomeye, rimwe na rimwe dutabaza kandi nyamara nabo si byinshi bashobora gukemura kuko nabo ari abantu nkatwe. Abafite Imana yabo nk’umutabazi, banyura muri iyi si yuzuye imiruho n’amahane, aho icyo ukeneye ataricyo ubona (nk’uko umuririmbyi abivuga), hakabahindukira ah’amasoko.

Zaburi 46:2-3 2Imana ni yo buhungiro bwacu n’imbaraga zacu, Ni umufasha utabura kuboneka mu byago no mu makuba. 3Ni cyo gituma tutazatinya naho isi yahinduka, Naho imisozi yakurwa ahayo ikajya imuhengeri,

Pawulo ari mu bwato ubwo yoherezwaga muri Italiya yabwiye abo bari kumwe ko bari buhure n’akaga banga kubyumva. Bibashyikiye, birabayobera ; ariko kuko we yagendanaga na Yesu, yohereza marayika aramuhumuriza nabo bamugiriraho umugisha bituma badapfa.

Emera kuba inshuti na Yesu, jya ubana na we kuko afite ubushobozi kuri buri gikombe cyose unyuramo. Mureke dutandukane n’ikibi cyose twemere kugendana na Yesu.

Pastor Bimenyimana Claude