Niki dukwiye kwigira kuri Namani wakijijwe ibibembe na Elisa?

Imana ni inyabuntu kandi ni nziza no kubantu batari abayo.Urukundo rw’Imana n’ubuntu bwayo irugaragariza abantu bose batuye isi, nta n’umwe uhejwe ku rukundo rwayo.urukundo rwayo yarugaragarije no ku mugaba w’ingabo z’I Siriya witwaga Namani.

Namani ni muntu ki?

Inkuru ya Namani tuyisanga mu 2 Abami 5:1-19. Yari umugaba w’ingabo z’umwami w’i Siriya akaba yari umutoni kuri shebuja akaba umunyacyubahiro kuko ari we Uwiteka yaheshaga Abasiriya kunesha.(2Abami5 :1) Ibintu 2 twakwitaho ni uko Namani yari umugabo ukomeye kandi w’umunyacyubahiro ariko yari umubembe.N’ubwo Uwiteka yamuheshaga insinzi, ariko yari umugaba w’umupagani waramyaga ibigirwamana by’i Siriya.
Namani yari umubembe,ariko Imana yaramukijije.

Mu gitabo cy’ 2 Abami 5 :1-19 hatubwirako umukobwa muto w’umunyagano wo muri Isirayeli yari umuja wa muka Namani , yabwiye nyirabuja ko muri Isirayeli hari umuhanuzi wabasha gukiza ibibembe bya shebuja(Namani). Namani acyumva amagambo y’uwo mukobwa yagiye ku mwami w’i Siriya amwohereza muri Isirayeli amuha urwandiko n’impano ashyira umwami.Umwami wa Isirayeli muri icyo gihe, Yehoramu ashishimura imyambaro ye igihe yasomaga urwo rwandiko, maze aravuga ngo :
« Umwami w’Abisirayeli amaze gusoma urwo rwandiko, ashishimura imyenda ye aravuga ati “Ariko uwo mugabo kunyoherereza umuntu ngo muvure ibibembe, ni jye Mana yica kandi ikabeshaho? Nuko nimubitekereze ndabinginze, mumenye ko ari ukunyendereza.”(2Abami5 :7)

Elisa umuhanuzi yumvise ko umwami yashishimuye imyambaro ye asaba ko bamwoherereza Namani kugira ngo amenyeko muri Isirayeli harimo umuhanuzi .Namani ahagarara iruhande rw’inzu ya Elisa arakazwa no kumva ubutumwa bw’umuhanuzi aho kuza ubwe ngo amwisangire. Arakazwa no kumva ibyo aho kumvira ibyo amutegetse, Elisa yari yamutegetse kujya kwiyuhagira inshuro zirindwi muri yorodani, utari n’umugezi mwiza kurusha iyindi(2 Abami5:9-11).

Byongeye kandi,Namani yari yizeyeko ahura na Elisa akamuramburiraho ikiganza ku mubiri we wabembye agahamagara Imana ikamukiza.Ariko abagaragu ba Namani bamubwira gukora ibyo Elisa yari amutegetse(2Abami 5:12-13) aragenda arabikora umubiri we uba nk’uw’umwana asubira uko yari ameze(2Abami5:14).

Uretse gukira uruhu rwe rugasubira uko rwari rumeze, Namani yahawe n’ibindi bintu byinshi:

1.Yahishuriwe ko Imana ya Isirayeli ariyo Mana yonyine

Mu 2 Abami 5:15 hatubwirako Namani amaze gukira yavuzeko ntayindi Mana uretse Imana ya Isirayeli.Yamenye Imana kuko yari imaze kumukiza.
Ni gute tuzi Imana bitewe n’ibyo yadukoreye?

2.Yahawe ubushobozi bwo gushima

Nk’umugaba w’ingabo, Namani yari akomeye.Yari yizeyeko Elisa amusanga agahita amukiza ako kanya, ndetse arakazwa nk’uko bitagenze uko yabyifuzaga, ariko kubera kwicisha bugufi akumvira abagaragu be byatumye ahumanuka akira ibibembe.
Mu gihe icyubahiro yari afite cyamuteye kurakarira Elisa, kumvira kwe kwatumye akira, na nyuma yo gukira byatumye agaruka gushimira umuntu w’Imana Elisa.
Ese duha agaciro ibyo Imana yadukoreye n’ubwo inzira zayo n’imyitwarire yayo bishobora kutadushimisha?

3.Yafashe icyemezo cyo kuramya Imana yonyine

Kuko yakize ibibembe, Namani yafashe icyemezo gikomeye cyo kuramya Imana gusa:
“Nāmani ati “Ubwo utabyemeye, ndakwinginze uhe umugaragu wawe imitwaro y’ibitaka ihetswe n’inyumbu ebyiri, kuko uhereye none nta zindi mana umugaragu wawe nzatambira igitambo cyoswa cyangwa ikindi gitambo cyose, keretse Uwiteka wenyine.(2Abami5:17)

Ese twe duhagaze gute?ese twahisemo kuramya Imana yonyine?

Abakristo bakwiye kwibuka ibyo Imana yabakoreye n’ubwo byaba byaranyuze mu nzira zidashimishije kuko inzira zayo ni nyinshi, bityo bikabatera kuramya no guhimbaza Imana yonyine.

Sophie @agakiza.org