Imana izabacira akanzu.

"Nta kigeragezo kibasha kubageraho kitari urusange mu bantu; kandi Imana ni iyo kwizerwa, kuko itazabakundira kugeragezwa ibiruta ibyo mushobora, ahubwo hamwe n’ikibagerageza izabacira akanzu, kugira ngo mubone uko mubasha kucyihanganira." 1 Abakorinto 10:13

Iyo umuntu ari mu bigeragezo akenshi icya mbere kimubaho ni uguterwa n’ubwihebe ndetse agatangira kwibwira ko Imana yamutaye, akaba yashidikanya ku mbaraga n’ubushobozi bw’Imana ndetse rwose ukwizera kwe kukaba kwanacika intege. Ariko Yakobo yagiriye inama Itorero ati “Bene Data, mwemere ko ari iby’ibyishimo rwose nimugubwa gitumo n’ibibagerageza bitari bimwe, mumenye yuko kugeragezwa ko kwizera kwanyu gutera kwihangana. Ariko mureke kwihangana gusohoze umurimo wako, mubone gutungana rwose mushyitse mutabuzeho na gato” Yakobo 1:2-4

Pawulo nawe aramwunganira ati burya si n’umwihariko wawe ahubwo ni urusange mu bantu. Kandi mwizere ko hamwe n’ikibagerageza Imana izabacira akanzu, kugira ngo mubone uko mubasha kucyihanganira. Imana ishimwe.

Ijambo "hamwe" ni iry’ingenzi. Ibi bitwigisha ko ibigeragezo n’uburyo bwo kubinesha bijyana iteka. Imana ntizabakundira kugeragezwa ibiruta ibyo mushobora, uzaneshwa n’ikigeragezo gusa igihe utazita ku mbuzi z’Imana.

Mumenye na none ko umurongo uvuga uti "akanzu" si "ubuhungiro. Akanzu ni inzira yo kugufasha kwihanganira ikigeragezo. Ni uburyo bwo kugufasha guhagarara utaneshejwe n’ikigeragezo.

Ariko dore Inama Ijambo ry’Imana riguha kugira ngo ushikame mu bikugerageza
Imigani 3:5-6 "Wiringire Uwiteka n’umutima wawe wose, we kwishingikiriza ku buhanga bwawe; 6 Uhore umwemera mu migendere yawe yose, na we azajya akuyobora inzira unyuramo."

Hari ubwo umuntu ahagarara mu kigeragezo aho kwiringira Imana agashaka kwicira inzira, agatangira kwibwira ko yakwitabaza amaboko y’abandi bantu, akibwira ko ubwo asumbirijwe nawe yakora nk’abandi akirwanaho, agatanga ruswa, akabeshya kuko nta kundi yabigenza…, akibwira ko hari aho umuntu agera gukiranuka bikaba bitagishoboka. Uba utaye umurongo, nyamara hamwe n’ikikugerageza Imana yari igiye kugucira akanzu

Ahari ibi bitwigisha ikintu ku busobanuro bwa akanzu: Uburyo bwacu bwo gutabarwa cyangwa uburyo bwo gucirwa akanzu si ukwarurwa mu bigeragezo. Nubwo rimwe na rimwe ibyo nabyo bibaho, iryo si ryo sezerano. Ibi bivugwa mu ijambo rya nyuma, "kwihangana." Si ukudukura cyangwa kutwarura mu bigeragezo Imana idusezeranya, ahubwo ni ubushobozi bwo kubyihanganira. Ni ubushobozi bwo guhangana n’ibigeragezo nta gucumura.

Muri make, ibi bitwigisha ibintu bibiri ku birebana n’ibigeragezo byacu:

(1) "Akanzu" ubwako ni imbuto z’ikindi kintu. Ni ingaruka zo gukomera ku mahame yo mu Ijambo ry’Imana buri munsi no kuyoborwa n’Umwuka Wera. Uko dukura kandi uko turushaho kwegera Umwami mu mibereho yacu ni ko turushaho kugira ubushobozi bwo guhangana n’ibigeragezo.

(2) "Akanzu" gasobanura ubushobozi bwo guhangana n’ibigeragezo, si ukubivanaho byanze bikunze, nubwo ubushobozi bwo guhangana n’ibigeragezo bishobora no kuvuga ubushobozi bwo kwirinda ibigeragezo.

Incamake y’ibyo usabwa ngo uce mu kanzu k’Imana

(1) Kuyoborwa n’Umwuka Wera.
"Ndavuga nti muyoborwe n’Umwuka, kuko ari bwo mutazakora ibyo kamere irarikira." Abagalatiya 5:16. Soma kandi Abaroma 8:2-10
(2) Kubaho mu Ijambo ry’Imana.
"Umusore azeza inzira ye ate? Azayejesha kuyitondera nk’uko Ijambo ryawe ritegeka." Zaburi 119:9
(3) Kuzibukira ibyaha.
"Ariko wehoho, muntu w’Imana, ujye uhunga ibyo: ahubwo ukurikize gukiranuka, kubaha Imana, kwizera, urukundo,kwihangana, n’ubugwaneza." 1 Timoyeyo 6:11
(5) Gusengera mu kuri no mu Mwuka.
"Ntuduhane mu bitwoshya, ahubwo udukize Umubi; (kuko ubwami n’ubushobozi n’icyubahiro ari ibyawe, none n’iteka ryose. Amen)." Matayo 6:13
(6) Kubaho mu kwizera
Nk’uko byanditswe ngo “Ukiranuka azabeshwaho no kwizera!” Abaroma 1: 17
Hamwe n’ibikugerageza uhagaze ute? Imana itwigishe!