Imana ikurinde kugaruka kwa dayimoni wirukanye

Luka 11: 24-26

[24]“Dayimoni iyo avuye mu muntu, azerera ahadafite amazi ashaka uburuhukiro, akabubura akavuga ati ‘Reka nisubirire mu nzu yanjye navuyemo.

[25]Yagerayo agasanga ikubuye kandi iteguye,

[26]akagenda akazana abandi badayimoni barindwi bamurusha kuba babi, bakinjira bakayibamo. Nuko ibyo hanyuma by’uwo muntu bikarusha ibya mbere kuba bibi.”

Iyo umuntu yihannye aba asezereye satani n’ingabo ze zakoranaga nawe. Iyo asubiye inyuma aba yongeye kugururira satani, noneho agarukana ingamba n’imbaraga zikomeye cyane ku buryo bigorana cyane kwongera kuhikura.

Hari abarokore bibeshya cyane ko dayimoni ipfa, kandi dayimoni ni umwuka ntabwo ipfa ntan’ubwo izigera ipfa, irindiriye kuzahananwa n’umwami wayo Satani, ndetse n’abanze kwihana bose. Nabwo ntibazapfa gusa bazabaho ubuzima bubabaje burutwa no gupfa kuko bazarwifuza barubure, ruzaba rwambuwe ububasha bwo kwica.

Usanga abarokore bavuga ngo bishe igini, ngo bagiye kwica igini, cyangwa ngo igini ryarapfu. Umuntu wazanye iyi mvugo yarabeshye cyane. Igini ntiripfa rirahunga kandi ntirihungira kure riguma ricungiye hafi ko urangara gato. Iyo urihaye urwaho rigarukana n’itsinda rikaze nk’uko twabisomye.

Mwenedata niba ufite icyaha wihannye ujye usaba Imana iguhe imbaraga ntazagaruke. Kuko kugaruka kwe ni akaga.

Niyo mpamvu kubwiriza umuntu waguye bigoye cyane kuruta kubwiriza utarigeze kumenya. Utarigeze kumenya niba afite abadayimoni 10, iyo yihannye abirukana bose. Ariko iyo bagarutse baza ari 80, kuko umwe azana abandi 7 bamurusha ubukana nawe wa munani, izo mbaraga rero kurwana nazo biteye ubwoba.

Impamvu z’iri jambo zishobora kuba nyinshi bitewe n’uko umwuka arisobanuriye buri wese uryakiriye, ariko njyewe nagiraga ngo kibe icyifuzo cyacu. Dusengere abatarakizwa kandi tubabwirize ubutumwa bwiza bakizwe ariko kandi twe ubwacu twisengere menshi kurutaho kandi twirinde ntituzagwe ngo dayimoni twirukanye agaruke kuko iyo agarutse kumwirukana biragoye yaduhitana.

Imana ishimwe ko imbere yayo imbaraga za dayimoni zose ziburizwamo. Niyo yonyine yadufasha kurinda imitima yacu imbaraga mbi za dayimoni.

Rwose gusubira inyuma biragatsindwa ntibikatubeho! Ibaze niba warigeze kugwa ukaba warabyutse, ubu wongeye kugwa koko wumva wabyuka? Niba ubwa mbere Imana yarakuneshereje abadayimoni 10, ubwa kabiri ikakuneshereza 80, ubwo ubutaha uzaba uhanganye na 640, kandi nkwibutse ko kugira ngo Imana ikuneshereze ibyaha, ni wowe ikoresha.

Biradusaba gusenga cyane no kwirinda kugira ngo tudasubira inyuma.

Vedaste [email protected]