Imana ikunda ko abantu bahamya imirimo y’imbaraga zayo.


Imana idushakaho guhamya ibyo yakoze mu buzima bwacu kugira ngo ihabwe icyubahiro mu bayizi no mu batayizi. Akenshi iyo dusenga turi mu bibazo tuyisezeranya ko tuzabwira abantu ineza yayo igihe izaba yaradutabaye. Igihe abana b’Imana bateranye rero habaye hari ufite ubuhamya kubutanga ni byiza hanyuma kubwumva bikaba akarusho, kuko ni ukumva ubutwari bw’umwami wacu.
Abafilipi 2 :11

Mu buhamya bw’abana b’Imana haboneka mo amashimwe y’Imana kandi gushima Imana ni itegeko ku mukirisitu wese w’ukuri.
Zaburi 34 :3 « Uwiteka ni we umutima wanjye uzirata abanyamibabaro bishime. »

Nimushime Imana yacu mwa mbata mwe zayo mwese, namwe abayubaha, aboroheje n’abakomeye ! Ibyahishuwe 19 :5

Iri jambo rirategeka, gushima Imana ni itegeko benedata mureke tujye dushima Imana uko twibutse imirimo yayo. Gushima Imana ni byiza iyo bikozwe n’umuntu ufite umutima Imana yishimira. Hari ibihe umuntu ageramo bigoye akumva nta shimwe yabona nyamara Imana itegereje ishimwe ryawe ibihe byose, birakomeye, ninayo mpamvu ubikora na we Imana imwishimira mu buryo budasanzwe.

Gutanga ubuhamya byongera kuba byiza cyane kuko bituma abantu b’Imana bari bacitse intege basubizwa mo intege bagakomera.
Ikindi bituma abantu bongera kugarurira Imana icyizere mu buzima bwabo, nkuko n’amagambo menshi yo mu ijambo ry’Imana (Bibiliya) ahanini usanga uri ubuhamya bw’abatubanjirije muri uru rugendo. Tito 3 :8

Kuki abantu bagenda bacika intege zo gutanga ubuhamya ndetse no kubwumva ?

1. Satani umwanzi w’ibyiza akimara kubona umumaro w’ubuhamya mu itorero yahise yohereza mo imyuka mibi ituma abantu badukwaho n’umwuka w’ubwirasi, mu mwanya wo guhamya Imana bagatangira kwihamya ubwabo no guhamya abandi bantu. Yohana 5 :31.

2. Abandi bitiranije ubuhamya n’amateka muri rusange, bagatanga amateka yabo gusa bikarangira abantu bumva abataye umwanya nta kintu bungukiye mu mwanya bafashe wo kubumva.

Amateka y’umuntu ahinduka ubuhamya bw’umukirisitu igihe agaragaramo guhamya Imana. Ubuhamya wabwita amateka, ariko amateka yose si ubuhamya, kuko bwitwa ubuhamya kuko buba bugamije kugira icyo buhamiriza ababwumva. Rero ubuhamya bw’umukirisitu bugomba kuba nabwo buhamya Kirisito.

Hari igihe umuntu atanga ubuhamya mu rusengero ukumva higanjemo imbaraga za satani, amakosa y’umuntu, intege nke ze, ugategerezamo icyatuma uha Imana icyubahiro ukakibura.
Hariho ubuhamya bw’uburyo butandukanye muri rusange,
ariko ubuhamya bw’umukirisitu bwakagombye gushingira nibura kuri iyi mirongo itatu :
-Urugendo rwo gukizwa
- Intambara zo kwizera Imana yaneshereje umuntu
- Imirimo n’ibitangaza Imana yakoze mu buzima bw’umuntu.

3. Abatanga ubuhamya babeshya cyangwa bashyira mo amakabyankuru ku buryo ababyumva binubira gukomeza kubyumva. Si byiza kubeshya ngo ukunde wemeze abantu ko ufite amateka akomeye.

Kuko ahenshi mu materaniro ntawe ubaza cyangwa ngo asobanuze cyangwa ngo anyomoze, abatanga ubuhamya babeshya abantu, abantu nabo bakababeshya ko babyemeye ndetse banafashijwe. Ikibigaragaza ni uko hari ubwo haboneka abazi wa muntu neza kandi bakavuguruza ibyo yavugaga. Imigani 21 :28

4. Hari n’abihagararaho ku mpamvu zabo bwite zifite aho zihuriye n’icyubahiro bafite mu bantu bakumva gutanga ubuhamya byaba ari ukwitesha agaciro. Nyamara si ko kuri kuko aho gukomera ku cyubahiro wakomera k’uwakubahishije, kuko we afite ubushobozi bwo kugusubiza aho wahoze wanga kuvuga, cyangwa akakwigiza imbere kuruta aho uri.

Ikibabaje, ushobora kwanga kuvuga aho wavuye ariko ntushobora kwanga kuhasubira. Ntukabikorere iterabwoba, ahubwo uzabikorere urukundo ukunda Imana n’uburyo wumva ubuzima bwawe bwahesha Imana icyubahiro.
Mu buhamya, abantu benshi barahayobera bumva ibitangaza by’Imana akaba ari byo bakurikira aho gukurikira Imana ikora ibitangaza, bagera imbere babona mu bibazo byabo batabonye nka bimwe bumvishe mu buhamya bikabatera kuzinukwa. Ubuhamya buberaho kwizeza abantu Imana, si ukwizeza abantu ibitangaza.

Uzasanga umuntu ashingira ku buhamya bwe, akabwira abantu ati: “Mujye mugenza uku n’uku muzabona igitangaza cy’Imana.” Hanyuma kuko Imana itajya imenyerwa bya bindi babikora ntibigende uko babibwiwe bigatuma abantu bazinukwa. Imigani 14 :25

Umuntu yumva ubuhamya bw’abandi bikamwongerera ukwizera ko nawe azatabarwa, ntabwo umuntu yumva ko uko ibya mugenzi we byakemutse ariko nawe ibye bizakemuka. Ababyigisha gutyo nabo basiga amateka mabi atuma abandi bacika intege zo kongera gutanga ubuhamya kuko bazi ko abantu bahinyuye ibijyanye n’ubuhamya.

Hirya y’ibyo byose twavuze ariko, ubwinshi bw’ibibi ntibubuza ibyiza kuba byiza, kabone n’aho cyaba kimwe, gikomeza kuba cyiza ibihe byose. Gutanga ubuhamya bw’ibyo Imana yakoze mu bantu bayo ni byiza cyane iyo bikozwe mu buryo bwiza binezeza Imana n’abantu.

Umuntu wese uyoborwa n’umwuka wera akwiye no guhamya ibyo Imana yakoze, ndetse n’ibyo yamukoreye ubwe. Ibyakozwe n’intuma 1 :8
Ubuhamya wabutanga uvugira mu iteraniro, wa bwandika abantu bakabusoma, wabushyira mu mivugo n’ibisigo cyangwa mu ndirimbo,…

Dore amagambo ari mu ndirimbo ya Islael Mbonyi irimo igice gitoya cy’ubuhamya.

« SINZIBAGIRWA »

Mbonyi: Ayiyeee! Ndatangayeeeeeeh Sinzibagirwa. Menye ko utarobanura ku bubutoni, uwagukiranukiye wese uramwemera, ineza yawe nyinshi yamenyekanye
Abandi: ku isi hose...,
Mbonyi: Ku ivuko iwacu naho bararirimba
Abandi: Banezerewe.

Mbonyi: Bazerereye mu butayu nta mudugudu wo kubamo, bicwa n’inyota n’inzara badafite uwabarengera. Abandi baboheshejwe ibishakwe n’umubabaro, bari baguye ku gasi nk’abatagira gakondo, umunsi bahamagaye izina ryawe
Abandi: Warabibutse,
Mbonyi: Ubuhorereza ijambo ry’ubuzima
Abandi: Ribarengera.

Mbonyi: Erega si bo bonyine buzuye uwo munezero, hari ho n’abandi benshi badafite uko babivuga, ineza yawe nyinshi yamenyekanye
Abandi: Ku isi hose,
Mbonyi: Ku ivuko naho iwacu bararirimba banezerewe.
Mbonyi: Ningera yo nzicara mbabwire ibyo yankoreye,
Abandi: Ningera yo nzababwira ya ndirimbo nzaririmba rwa rukundo wanyeretse, uko iminsi ihaye iyindi sinzibagirwa.
Mbonyi: Ningerayo sinzaceceka, nzavuga ibyo yankoreye
Abandi: Ningerayo nzababwira yandirimbo nzaririmba rwa rukundo wanyeretse, uko iminsi ihaye iyindi sinzibagirwaaa.

Mbonyi: Ayiiiiiiyeeeee Ndatangaye eeeh! Sinzibagirwa, twari mu mpinga z’ejuru, twambaye ubushwambagara, imisatsi yatonze ikime utwereka imbabazi, uvunagura ya miheto abanzi baduteranye, ushingura ya macumu mu bibanza byacu turubaka, uvumura imirima yacu turahinga tureza...
Abandi: Uratwibukaaa
Mbonyi: Ohhh utwoherereza ijambo ry’ubuzima
Abandi: Riturengera..

Mbonyi: Erega si twe twenyine, twuyuzuye uyu munezero, hariho n’abandi benshi badafite uko babivuga, ineza yawe nyinshi yamenyekanye
Abandi: Ku isi hose
Mbonyi: Ku ivuko iwacu naho bararirimba banezerewe.

Mbonyi: Ningerayo, sinzaceceka, nzavuga ibyo Yesu yankoreye,
Abandi: Ningerayo nzababwira ya ndirimbo, nzaririmba rwa rukundo wanyeretse,
Abandi&Mbonyi: Uko iminsi ihaye iyindi sinzibagirwa.
Mbonyi: Ni ukuri we nzayivuga iyo neza yangiriye..
Abandi: Ningerayo nzababwira ya ndirimbo, nzaririmba rwa rukundo wanyeretse, uko iminsi ihaye iyindi sinzibagirwa.

Mbonyi:
Ayiiiyee Dore ibindi nibutse!....Burijoro numvaga asenga cyane agutakira Mana we
avuga ngo: “Mana nunkiza ukankura kuri ubu buriri nzagushimira …”
None dore ni muzima , Kandi nawe ntazibagirwa

Buri gitondo numvaga asenga asenga cyane asengera abana be
avuga ngo: “Mana ubarinde amajya n’amaza”, wumva gusenga uramwumvira ..

None dore ni bazimaa , kandi dore ni abagabo ..

Erega ubutayu bwatumye ibiganza byabo bisigara mo ubusa, bagatonekwa cyane ngo ntibahirwa kandi batungishije benshi, ariko Mana icyo ngukundira
Abandi: Nuko utameze nk’abantu…
Mbonyi: Washyize ibanga ryanjye nawe
Abandi: Kure y’amaso y’abantu.

Mbonyi: Erega na burya babahimishaga inzandiko nyinshi z’ibinyoma, bakabasiga ibyasha kugira ngo batazongera guhanuraaa.
Ariko Mana icyo ngukundira ,

Abandi: Nuko utameze nkabantu.
Mbonyi: Washyize ibanga ryanjye nawe
Abandi: kure yamaso y’abantu.

Umva hano indirimbo ya Islael Mbonyi, SINZIBAGIRWA.
https://www.youtube.com/watch?v=aT4o6Y_SjO8

Niyondora Vedaste [email protected]