Ijambo "Hallelujah" si iryo gushyushya urugamba/Ntibayizi Samuel

Ijambo Halleluya rifite inkomoko ku nteruro y’Igiheburayo ( ‘hallelu yah’ ) bisobanura ngo mushime Imana. Iri jambo rikaba rikoreshwa n’abantu batari bake basenga kandi bakemera Imana.

Kurikoresha cyane mu nsengero, mu biterane n’ahandi mu buryo bumeze nko gushyushya urugamba byagiye bituma hari abaryikiriza badasobanukiwe ubusobanuro bwaryo , abandi bakarifata nk’ijambo ryo gukangura abantu ari nako baritesha agaciro .

Ibyo berekanwa n’uko hari abigisha benshi barivuga kenshi no mu gihe kidakwiye , barivuga bagategereza ko basubizwa ‘Amen ‘ ariko bikaba iby’ubusa. Hari n’abandi bize amayeri yo kurivuga bagasaba abari mu iteraniro ngo babavugire ‘Amen’ kuko bazi ko ibyo bavuze ntawabihaye umwanya mu matwi ye.

Ntibayizi Samweli ni umunyamakuru akaba n’umuhanga mu bya Tewologiya aratubwira uko iri jambo rikwiye gukoreshwa.

Mu kiganiro yagiranye n’Umunyamakuru wa Ibyishimo.com dukesha ubu butumwa yagize ati :” Halleluya ni ijambo rikwiye kubahwa, iyo urivuga uba ugamije guha Imana icyubahiro, ikindi ni ukwishimira Imana. Kuvuga Halleluya nk’umuntu ushyushya urugamba nta kibazo kirimo, ahubwo ikibazo ni ukubikora utazi ibyo ukora. ”

Yakomeje asobanura ko hari uburyo bwiza bwo kuyikoresha bwatuma umuntu arushaho kwishimira Imana bikaba byatuma n’abaryumva buzuzwa.

Ati: ” Ijambo Halleluya rikwiye kuvugwa rivuye ku mutima, kuko Halleluya ari ijambo ryo kubahwa umuntu adakwiye kuvuga uko abonye kose. Mu baheburayo ho ntago bapfa kuyivuga kubera gutinya Imana, bayivuga ari uko umutima wabo wuzuyemo ishimwe. ”

Twababwira ko ijambo Halleluya warisanga muri Bibiliya cyane cyane mu gitabo cya Zaburi n’Ibyahishuwe. Iri jambo kandi rikaboneka inshuro makumyabiri n’enye muri Bibiliya.


Source: ibyishimo.com