Igiterane Korari Besalel yakoze gisigiye benshi impamba yo mu buryo bw’Umwuka

Mu mpera z’icyumweru dusoje nibwo Korari Besalel yo mu itorero rya ADEPR-Umudugudu wa Murambi muri Paruwasi ya Nyanza yakoze igiterane umuntu yavuga ko gisigiye benshi impamba y’urugendo rugana mu ijuru kubera ibihe byiza byakiranze.

Mu minsi ishize nibwo twabagejeje ho inkuru y’iki giterane cyakomeje kugira imbogamizi mu mitegurirwe yacyo kubera umwe mu baririmbyi b’iyi Korari wakuwe mu mubiri, benshi bagatekereza ko yaba impamvu yo kugihagaraika ariko ubuyobozi bw’iyi Korari buhagarariwe na Bwana Mihigo Theodore bugakomeza gushimangira ko nubwo bababajwe n’urupfu rw’umuririmbyi wabo bazakomeza gahunda yo gushima Imana nk’uko ijambo ry’Imana ribibasaba.

Ibi byatumye nk’uko byari biteganyijwe kuri iki cyumweru tariki 18 Kamena 2017 sa munani bari batangiye, nyuma y’iminota mike gusa urusengero rukaba rwari rumaze kuzura.

Urujya n’uruza rw’indirimbo z’abaririmbyi baba Korari Besalel. Korari Gibeyoni, Amahoro, Korari Holy Nation ya ADEPR Gatenga ndetse na Simon Kabera rwatumye akanyamuneza karushaho kuba kose muri iki gitaramo cyanagize ubwitabire bwo hejuru mu masaha ya kare. Ubutumwa bw’aba baririmbyi bwose bwagarukaga ku gushima Imana mu gihe gikwiye n’ikidakwiye.

Korali Holy Nation

Ibi byaje gushimangirwa n’umwigisha w’ijambo ry’Imana Nzaramba Jean Paul wibukije imbaga y’abitabiriye igiterane ko impamvu yo gushima Imana idaturuka mu byiza gusa ahubwo Imana ikwiye amashimwe bitewe n’uko iri gusa, twaba tumerewe neza cyangwa nabi.

Yifashishije ijambo ry’Imana Pawulo yandikiye Abaroma 8:28 rigira riti ‘’Ku bakunda Imana byose bifatanyiria hamwe kubazanira ibyiza.’’

Uyu muvugabutumwa yibukije iteraniro ko Imana ikora ibyo ishaka kuko imyanzuro ifata ku buzima bw’abantu bayo itandukana kenshi n’ibyo bibwira, yibutsa abantu ko hari impamvu nyinshi zikwiye gutuma Besalel ishima Imana kimwe n’abandi bose bakunda Imana agira ati ‘’untambira ishimwe wese aba anyubahiriza.’’ Zaburi 50:23 (a)

Mu mwanya muto yafashe yasobanuye uburyo Imana ikora ikintu cyose uko ishaka kandi ko ibyo twita ko ari bibi kuri twe hari ubwo biba ari ibisubizo ku bandi, kandi twese Imana iradukunda.

Yagize ati ‘’Iyo ihaye umugisha abacuruza imiti bisobanuye ko abandi barwaye. Iyo ihaye umugisha abakanika, bisobanuye ko abagira ibinyabiziga bahuye n’ibibazo, abacuruza amasanduka bashyinguramo, umugisha wabo uva mu rupfu rw’abandi.’’ Yagarutse cyane ku butwari korari yagize bwo kudasubika igiterane ku mpamvu z’ibyago, n’ubwo byumvikanaga ariko ko kutagihagarika ari ko kuri kw’ijambo ry’Imana ndetse ko abantu bose bakwiye kurebera ho, kuko Imana idusaba kuyishima mubyo tunyura mo byose.

Ibintu byaje guhindura isura ubwo Korari Besalel yakirwa nyir’izina ku ruhumbi ngo itambutse ishimwe ryayo nk’uko yari imaze iminsi iritegura, maze itangira yibutsa abantu ko nubwo bagize ibyago bagashaka no gusubika igiterane ariko baje gusobanukirwa impamvu zo gushima Imana.

Besalel mu ndirimbo zinyuranye z’amashimwe yanyujijeho n’iyo yise iy’umunsi aho bagira bati Twamenye ko nta mwenda ufitiye abantu mu isi, ibyo twifuza si amadeni ngo tukwishyuze, uko biri kose dufite byinshi tugushima. Dufashe uyu mwanya ngo tugushimire Mana, ibyo wakoze, ibyo uri gukora n’ibyo uzakora”.

Muri uyu mwanya wo gushima Imana ni nawe Perezida w’iyi Korari Bwana MIHIGO Theodore n’umufasha we Alphonsine bahise baseruka ku ruhimbi bakikiye umwana mwiza w’umuhungu maze iteraniro ryose rihagurukira icyarimwe n’ubwuzu bwinshi maze bose bafatanyiriza hamwe gushima Imana ko yabahaye umwana w’umuhungu nyuma y’imyaka 10 bubatse urugo. Aba bombi bagarutse mu makeya ku rugendo rutoroshye rw’imyaka 10 bategereje umwana n’intambara zitandukanye yagiye ahura nazo, ibintu byakoze ku mitima ya benshi maze bihagurutse amarangamutima y’abitabiriye igiterane byose biganisha ku mashima y’icyo Imana yakoze.

umuyobozi wa korali Mihigo Theodore n’umugore we Alphonsine

Ibi byose byakurikiwe n’urukurikirane rw’indirimbo za Besalel ifatanyije n’iteraniro ryose maze abantu bacinya akadiho mu munezero mwinshi cyane.

Igiterane cyakomereje mu ndirimbo zinyuranye, Besalel iza no gutungura abantu yakira iteraniro ryose basangira Fanta mu rwego rwo gufatanya umunezero.

Ahagana mu ma sa mbiri z’umugoroba nibwo igiterane cyerekeje ku musozo ariko akanyamuneza ku bantu kakiri kose ubona badashaka gutaha kubera ibihe byiza.

Tubibutse ko iki giterane cyari cyateguwe mu rwego rwo gushima Imana kubw’igitangaza yakoze igaha umuryango w’umuyobozi wa Korari Besalel umwana, bakaba baribarutse mu kwezi kwa mbere uyu mwaka w’2017 nyuma y’imyaka 10 bategereje urubyaro.



Niyondora Vedaste [email protected]