Igihe cyo kumurika undi muzingo w’indirimbo z’amashusho za Korari Besalel cyamenyekanye

Korari Besalel ibarizwa mu itorero rya ADEPR Murambi mu Karere ka Kicukiro mu mujyi wa Kigali, nyuma y’uko mu mwaka ushize yashyize hanze umuzingo w’indirimbo z’amajwi zigera kuri 15, ndetse nyuma baza no gukora izindi ebyiri ziba 17, ubu ngo bari gutegura igiterane kizamara iminsi itatu kizatangira tariki 12 kugeza14 Mutarama 2018, ari nacyo bazamurikamo umuzingo mushya wa kabiri w’indirimbo z’amashusho.

Besalel ni korari imaze gukora ku mitima ya benshi mu myaka itari mike ishize, ndetse n’ubu hirya no hino aho uhuriye nayo mu bitaramo cyane ko yitabira ibitari bikeya, usanga abantu ari benshi kandi banezererewe uburyo bakoramo umurimo wabo w’ivugabutumwa mu buryo bw’indirimbo.

Korari Besalel ubwo yaririmbiraga abo mu karere ka Nyabihu

Iyi korari yamamaye cyane mu myaka itambutse, ubwo yashyiraga hanze Alubumu yabo ya gatatu y’amajwi ikaba yari iya mbere y’amashusho bitiriye imwe mu ndirimbo ziyigize « GOLOGOHTA », iyi ikaba ari imwe mu ndirimbo zakunzwe bitangaje kuri iyi Album kugeza na magingo aya.


Besalel ubwo yamurikaga Album yabo yitwa "Golgoth"

Kuri ubu bagiye gushyira ahagaragara umuzingo wa kabiri w’amashusho, akaba ari n’uwa kane w’amajwi.

Mu itangazo ry’impine bageneye inshuti n’ababakurikirana bose, « Save the Date » baragaragaza ko italiki basaba kuzigamirwa ari kuva kuya 12 kugeza kuya 14/01/2018.

Iki gitaramo cyaciriwe amarenga menshi mu bitaramo bitandukanye iyi korari yagiye ibamo muri uyu mwaka ndetse cyari gitegerejwe igihe kitari gito ukurikije igihe indirimbo z’amajwi zasohokeye.

Iri tangazo twagendeyeho dukora iyi nkuru, ntirigaragaza izina ry’iyi Album nshya izaba imurikwa, icyakora hagaragaraho ko bazaba bari kumwe na Korari Siyoni guturuka mu itorero ry’Akarere ka Nyabihu, ku mudugudu wa Jenda.

Korari Siyoni guturuka Nyabihu izafatanya na Besalel

Tugiye kubakurikiranira vuba byinshi kuri iki gitaramo, haba aho kizabera, abandi batumirwa n’ibindi, tuzabibagezaho birambuye mu minsi ya vuba.

Komeza kubana natwe Imana iguhe umugisha !