Icyumweru cy’umubabaro (igice cya 5) Pastor Desire

Kuwa gatanu

Nyuma yo kugambanirwa, gufatwa, kwihakanwa, imanza z’ibinyoma, gukubitwa no guhindurwa urwamenyo Yesu yategetswe kwikorera umusalaba we kugera i Nyabihanga aho yabambwe ari kumwe n’ibisambo bibiri.

Yesu yarababaye kugirango yikorere ibyaha n’imibabaro yacu

Dore imwe mu mibabaro Yesu yanyuzemo:

1. Kugambanirwa no kugirirwa nabi n’abantu yagiriye neza: Yuda yagambaniye Umwami wacu ntacyo yamuburanye. Aha Yesu yashakaga kwifatikanya nabantu bose bahura n’akagambane.

2 Uburibwe bw’umubiri: Umwami Yesu yatobowe ibiganza, yambara amahwa mu mutwe; yakubiswe inga (ikiboko kirimo utwuma).
Yesu azi ububabare bw’umubiri gukubitwa, gushenjagurwa.

3. Kwangwa na leta, idini na rubanda:
- Ubutegetsi bw’i Roma bwamuciriye urubanza buramukatira,
- Abayobozi bakuru b’idini baramutanze,
- Abantu barasakuje ngo ni abambwe.
Yesu azi icyaricyo kwangwa no gutereranwa na bose.

4. Isoni zo kwambikwa ubusa: Umwami Yesu yabambwe yambitswe ubusa.
Mbega ibintu biteye isoni! Umwami wacu yemeye kwambikwa ubusa kugira ngo yifatikanye n’abantu bose bazahura nikimwaro, n’isoni zo kwambikwa ubusa mu bantu.

- Ibindi byose Umwami Yesu atababajwe mu buzima bwe, byashyizwe kuri we ku musaraba.

Yabambwe hagati y’ibisambo 2 kimwe kiramutuka ikindi kiramuhumuriza burya abatubona bose bazi ko twakijijwe (tubambye) ariko dufite abantu babambye batukana ntukabereho kongerera abandi umubabaro.

Ageze kumusaraba isi n’izuba yaremye byananiwe kumureba yambaye ubusa byipfuka mu maso haba ubwirakabiri, ibitare birameneka binaniwe kwakira uwabiremye, umwenda ukinze ahera ucikamo, akazi k’abatambyi kari karangiye kuko umutambyi mukuru akaba n’igitambo yari yinjiye ahera ajyanye aye maraso.

Nubwo yabambwe nk’umunyabyaha ariko hejuru ye hari handitse ko ari Umwami w’Abayuda

Ujye uha agaciro icyo Imana yakwanditseho bizatuma umusaraba(umubabaro) wawe woroha kandi umusaraba si ubuturo bw’iteka Imana izagushyira mu mwanya ugukwiriye kuko ubu amavi yose arapfukama indimi zigahamya ko Kristo ari Uwiteka.

Mu gituro umurambo wa Yesu washyinguwe mu gituro mbere ya saa kumi n’ebyiri za nimugoroba, wo kuwa gatanu ubwo isabato yatangiraga n’akazi kose kagahagarara, kandi we yagumye mu mva isabato yose.

Uyu Yesu tuvuga yanyuze mu mibabaro ariko yanesheje urupfu. Mwizere nawe aguhe kunesha no gukira agahinda watewe nibyo wanyuzemo. Mwakire akubere Umwami w’ubugingo bwawe aragukiza intimba n’ibikomere byo mu mutima.

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by’abantu k’ubuntu. Sangiza ubu butumwa inshuti zawe,
Pastor Desire
www.agakiza.org
Fcbk: Agakiza.org
Chaine YouTube: Agakiza.org