Iby’ingenzi twakwigira kuri Debora na Baraki mu kumvira Imana

Imana mu bushishozi bwayo yagiye iha inshingano zitandukanye abantu bayo zo kuyobora cyangwa gukora umurimo wayo yabaga ibahamagariye . Bamwe mu bagaragu bayo bagiye bahinyura ijambo ryayo ntibakore icyo ibategetse ariko na bo bagahura n’ingorane ku buzima bwabo,mu gihe abandi bivutsaga umugisha n’icyubahiro yabaga yarabageneye .

Uyu Baraki turi kuvugaho atandukanye n’umwe woheje Balamu kuvuma ubwoko bw’Imana(Kubara 22:2)

Bibiliya iduha amasomo menshi ku buzima bwa bamwe mu bantu bavugwamo bagaragaje kumvira Imana ikabaha ibyo yari yarabasezeranije. Benshi muri bo baduha urugero rwiza rushobora gutuma tubigiraho kwizera, kubaha Imana no gukomeza amasezerano yayo.

Reka turebe urugero ruboneka mu gitabo cy’Abacamanza rwa Debora umuhanuzikazi na Baraki.Imibereho yabo ya buri umwe iraduha isomo ry’uko dukwiye kwitwara niba dukurikiye Yesu Kristo.

Ese Debora na Baraki ni bantu ki?

Debora na Baraki bagaragara mu gitabo cy’Abacamanza mu gice cya 4. Debora yari umucamanza wa Isirayeli igihe Uwiteka yabatangaga mu maboko ya Yabini, umwami w’I Kanani kubera gukora ibyangwa n’Uwiteka. N’uko Yabini amara imyaka 20 agirira Abisirayeli nabi cyane.(Abacamanza 4:1-3)
Baraki yari umugabo Imana yategetse kuyobora ingabo zari kurwana na Sisera umugaba w’ingabo za Yabini umwami w’i Kanani . Ubwo Baraki yahamagariraga Debora uwo murimo, igisubizo cye cyamugaragaje nk’umuntu utiyizeye cyangwa ucitse intege.

“Baraki aramusubiza ati “ Ni ukuri nitujyana nzagenda, ariko nutagenda nanjye sinzagenda.” Abacamanza 4 :8
Mu magambo make, Debora yemereye Baraki ibyo amusabye ariko amubwirako nta cyubahiro azabona muri iryo tabaro, ko kizahabwa undi muntu w’umugore. Bidatinze umugore witwa Yayeli muka Heberi w’Umukeni niwe wakubise urubambo mu mutwe wa sisera umugaba w’ingabo za Yabini zarwanyaga Abisirayeli aramwica nyuma bituma ariwe uhabwa icyubahiro.

Ese ni irihe somo twakwigira ku byo bakoze?Muri make reka turebe ku kwizera kwabo mu kuzuza ibyo Imana yabahamagariye.


Abagore nabo bashoboye kugabura iby’Imana

Abakiristo benshi bashidikanya ku kuba umugore nawe yagira inshingano mu buyobozi bw’itorero. Ni byo barabufite ,kuko niba Imana yaratoye Debora wari umugore akaba umucamanza wa Israyeli, ninde wabasha kuvugako Imana itemera ko abagore bayobora ?
Debora yari umugore w’umugabo akaba umuyobozi udahisha ukuri.Uwo niwe Imana yahagurukirije kuba umuhanuzikazi, akajya ahamagarira abantu nka Baraki guhaguruka kugirango buzuze imigambi y’Imana.Imana yamukoresheje nk’aho ari yo yivuye muri kiriya gihe kandi ukuboko kwayo kwamuhoragaho.

Ntidukwiye kwanga icyo Imana idutegurira

Abantu ntibakwiye gufata icyemezo kibi bahinyura cyangwa banga icyo Imana ishaka ko bakora. Ku ikubitiro Baraki yahinyuye icyubahiro Imana yari yamugeneye:Icyubahiro cyo kuyobora ingabo zarwanyanga abanzi ba Isirayeli.Yatanze imbaraga ze ariko Debora ni we wari ufite inshingano zo kubayobora.
Abakristo bakwiye gukora uko bashoboye bakemera gukora icyo Imana ibahamagariye ntagushidikanya. Baraki yihungije inshingano bituma Imana iha undi muntu icyubahiro yari kugira ari we Yayeli muka Heberi.

Abagabo n’abagore bakwiye gukorera Imana, ku inshingano izo ari zose

Abakristo benshi bakunze gutekerezako abagabo bagomba guhora iteka aribo bayoboye, mu gihe abagore bagomba kuba mu gikoni.Mu by’ukuri ibi sibyo.
Mu gitabo cy’Abacamanza igice 4 tubonako Debora yari umuhanuzikazi, Baraki yarayoboye ingabo,Yayeli wishe Sisera ubwo yamusangaga iwe yari yibereye mu rugo.Tugendeye kubyo bakoze,dushobora kubonako Imana iha buri muntu inshingano zimukwiriye.Ntitugomba guhinyura imigambi n’inzira z’Imana ngo tugendere kubitekerezo bya kimuntu kuko Imana idakora nk’abantu.
Imana ubwayo iravuga iti:“ Erega ibyo nibwira si ibyo mwibwira, kandi inzira zanyu si zimwe n’izanjye! Ni ko Uwiteka avuga. Nk’uko ijuru risumba isi, ni ko inzira zanjye zisumba izanyu n’ibyo nibwira bisumba ibyo mwibwira”.(Yesaya55:8-9).
Abakristo(abagabo n’abagore) bakwiye kwigira ku bantu bahamagawe n’Imana bagasohoza ibyo yabasabaga, bakwiye kumvira icyo Imana ibasaba gukora kugirango basohoze neza imirimo yabashinze kandi barusheho gukora uko ishaka.
[email protected]