Ibintu 3 twahawe ubwo umwenda ukingiriza Ahera cyane watabukagamo kabiri

Mu rupfu rw’umwami Yesu ku musaraba habaye ikintu kidasanzwe :Umwenda ukingiriza ahera utabukamo kabiri maze duhabwa uburenganzira bwo kwigerera kuri Data wa twese.
“Maze Yesu avuga ijwi rirenga, umwuka urahera. Umwenda ukingiriza Ahera cyane h’urusengero utabukamo kabiri, uhereye hejuru ukageza hasi.”( Mariko15:37-38)

Niki umwenda wakingirizaga Ahera usobanura?

Mbere y’uko twumva icyo ibi bihe byatumye turonka, dukeneye kumva icyo umwenda ukingiriza Ahera wari umaze.
Mu gitabo cyo Kuva 26 tuhasanga Imana iha Mose amabwiriza y’ukuntu yashakaga uko Ahera hamera.Ku murongo wa 31-35 dusomako Imana yabwiye Mose

ibyerekeye uwo mwenda uko ukwiye kuba umeze:
“ Kandi umwenda ukingiriza uzawuboheshe ubudodo bw’umukara wa kabayonga, n’ubw’umuhengeri n’ubw’umuhemba, n’ubw’ibitare byiza buboheranije, bawubohemo ibishushanyo by’abakerubi, abahanga b’ibyo abe ari bo babiboha. Uwumanike ku nkingi enye zibajwe mu mushita ziyagirijweho izahabu, inkonzo zo kuri zo zicurwe mu izahabu, zishingwe mu myobo ine y’ifeza. Umanike uwo mwenda munsi ya bya bikwasi, ushyire hirya yawo ya sanduku y’Ibihamya, uwo mwenda ubabere urugabano rw’Ahera n’Ahera cyane.”(Kuva 26:31-33)

Turumva ko umwenda wari ukomeye kandi wari mwiza,utawugereranya n’imyenda yo muri iki gihe. Mu mirongo ikurikiyeho hatubwira aho wari uri:
“Umanike uwo mwenda munsi ya bya bikwasi, ushyire hirya yawo ya sanduku y’Ibihamya, uwo mwenda ubabere urugabano rw’Ahera n’Ahera cyane.”Kuva 26:33)
Duhereye hano turumvako umwenda wigabanije wari Ahera n’Ahera.Wari ufite akamaro nka k’urugi rwari ahantu hera habaga Imana muri urwo rusengero.
Mu Isezerano rya Kera hatubwirako icyubahiro cy’Imana cyabaga imbere Ahera cyane. Abatambyi bakuru nibo bonyine rimwe mu mwaka babaga bemerewe kuzana amaraso yo kwiturira no guturira ibyaha abantu.(Abaheburayo9:7).Icyubahiro cy’Imana cyabaga aho hantu , ku buryo abatambyi bakuru batari kuhinjira kuko bashoboraga gupfa.(Abalewei16:1-2)

Icyubahiro cy’Imana cyabagamo aho imbere, gikingirijwe n’uwo mwenda.Uyu mwenda watandukanyaga umuntu n’Imana,kuko wakingirizaga icyubahiro cyayo ntutume abantu bayireba igihe cyose.
Urupfu rwaYesu rwahinduye ibyo: “Ariko Yesu yongera kuvuga ijwi rirenga, aratanga. Umwenda ukingiriza Ahera cyane h’urusengero utabukamo kabiri, utangirira hejuru ugeza hasi, isi iratigita, ibitare birameneka,,,”(Matayo27:50-51)

Niki twaronse ubwo umwenda wakingirizaga Ahera watabukagamo kabiri?

1.Twemerewe kwigerera ku Mana Data wa twese binyuze kuri Kristo

Kristo yavuzeko ari we nzira yonyine igera kwa Data, kandi umwenda watabutsemo kabiri urabihamya.
Umwenda watumaga tutabona Imana ariko urupfu rwa Yesu rwatwemereye kwinjira aho Imana iri. Kubera Kristo turi abahungu n’abakobwa bakundwa na Data.

2.Isi yagize amahirwe yo kurasirwa n’umucyo w’Uwiteka

Ijuru ryatangaje icyubahiro cy’Imana, Ibyaremwe byose nabyo byari bitegereje kubona umwana w’Imana. Kugeza ubu Kristo yaraje, urumuri rw’Imana rwaturasiyeho.Mu gitabo cy’umuhanuzi Yesaya hatubwirako dukwiye kurabagirana kuko umucyo waje ku isi binyuze muri Yesu Kristo.
“ Byuka urabagirane kuko umucyo wawe uje, kandi ubwiza bw’Uwiteka bukaba bukurasiye”(Yesaya 60:1)
Kubw’ibyo rero, dukwiye gushaka Imana n’umucyo wayo cyane cyane aho umwijima uri ukirukanywa n’uwo mucyo.

3.Twahawe kwitwa abana b’Imana muri Kristo gusa
Nshuti , twabonyeko umwenda watabutsemo kabiri uhereye hejuru ukageza hasi. Nta muntu numwe wawubonye ubwo watabukagamo kabiri, byongeye kandi wari uri hejuru cyane mu rusengero byerekanako nta muntu wari gushobora kuwutabura nk’uko baca umwenda usanzwe.Ahubwo watabutse kuko umurimo wa Kristo wari urangiye.

Ubuntu bw’Imana bwemereye ikiremwamuntu kureba icyubahiro cyayo gihabwa amahirwe yo guhinduka umwana wayo, byose binyuze muri Kristo Yesu umwana w’Ikinege.
Sophie @Agakiza.org