IBYO USHAKA ABE ARIBYO BIBA Ev. Adda

Yongera kugenda ubwa kabiri arasenga ati"Data, niba bidashoboka ko iki kindenga, ngo kereka nkinywereyeho, ibyo ushaka abe ari byo biba." (Matayo 26:42)

Yesu ni Umwana w’Imana ikunda cyane nkuko yabihamije humvikanye ijwi ryavugiye mu kirere igihe Yesu yabatizwaga muri Yorodani.( Matayo 3:17, maze ijwi rivugira mu ijuru riti"Nguyu Umwana wanjye nkunda nkamwishimira.")

Yesu uwo tuvuze haruguru ukundwa n’Imana cyane yanyuze mu buzima bukomeye kuva yavuka aba mu muryango uciriritse w’umubaji. Yabayeho abantu bamwe bamukunda abandi bamwanga. Kenshi abayuda babaga bashaka kumwica. Hari n’ingendo yasubikaga kuko yabaga azi ibyamubaho aramutse agiyeyo. (Yohana 7:8, Mwebweho nimujye muri iyo minsi mikuru, ariko jyeweho sinjyayo ubu kuko igihe cyanjye kitarasohora.")

Igihe cyarageze rero igikombe yari yabikiwe kunyweraho kiraza kiramwegera. Abonye cyaje koko arasenga. Gusenga niwo muti mwiza wo guhangana n’igikombe cy’imibabaro. Gusenga niwo muti mwiza wonyine wo guhangana n’igikombe cyitwa " ntibishoboka."

Ikigaragara muri aya magambo Yesu yavuze nuko hari igihe bidashoboka koko. Ariko nkibaza nti ese iyo bigaragara ko bidashoboka umuntu yakora iki? Wakiheba? Warira? Wasakuriza mu mihanda se ukajya kuvugirizayo induru? Wakiyahura se?

Kenshi abatwigisha batubwira ko byooose muri Yesu byemera. Ndetse tugahimba nama chorus tuti Muri Yesu biremeraaa, simbihakanye ariko se ni buri gihe? Ni nka buton ukandaho gusa bigahita byemera?

Kugeza ubu abantu benshi barakariye Imana, bayifitiye umujinya mwinshi kuko badasoma ijambo ry’Imana. Yewe hari n’abigisha batavugisha ukuri kw’ijambo ry’Imana. Bityo ugasanga abantu babuze bimwe bashaka babaye indakare muri Yesu kuko bategereje igihe kirekire ko biba uko bo bashaka.

Mbese wambwira impamvu bariya basore Meshaki, Saduraka na Abedenego (Daniyeli 3) Imana itaje ngo ibakize batarajya muri uriya muriro ahubwo ikajya kubarindiriramo? Buriya niyo basenga bati Mana dukize ntibatujugunyemo ntibyari gushoboka. Imana yari ibategerereje mu muriro kugira ngo nizo mbaraga nazo zigaragare.

Icyo gikombe utinya cyangwa wanga kunyweraho impamvu aho wahereye usenga kitakurenga nuko wananiwe kuvuga uti Data bibe uko wowe ushaka. Birakubabaje kuko ushaka ko biba kwa kundi ushaka. Kuko ushaka ko nawe Imana ibigukorera nkuko yabikoreye runaka na runaka. Bibe uko nshaka

Senga uti Data niba bidashoboka ko kindenga bibe uko ushaka ntibibe uko jye nshaka. Kuko hirya y’igikombe hari intsinzi, hirya y’igikombe hariho kuzuka. Ikibazo tuba twarigishijwe nabi tukagenda mu buryo butandukanye nuko Yesu yabigenje. Yesu ati niba bidashoboka ngo kereka nkinywereyeho basi bibe uko ushaka. Aba arabyemeye. Mu kwemera kwe niho twakiriye. Nawe mu kwemera kwawe hariho ibyakira ku ruhande rwawe no ku ruhande rw’abakuzi bazi igikombe ufite. Si ukwemera gusa ngo birangirire aho. Oya imbere hari intsinzi.Imana ishimwe cyane.

Ntibibe uko nshaka ahubwo bibe uko wowe ubishaka Data.

Imana ibahe umugisha cyane. Twihangane tureke Imana ibikore uko ishaka tuzabona ibyiza bituruka ku Mana yacu.

[email protected]