I wawa : Chorale la Trompete ya ADEPR Carmel yataramiye Imana, 300 bari barabaswe n’ibiyobyabwenge barihana

Kuri uyu wa Gatandatu tariki ya 22 Nyakanga 2017 ku isaha ya saa 6:15 za mugitondo nibwo Ubwato bwari Butwaye chorale la Trompete ikorera umurimo w’Imana mu itorero rya ADEPR Rubavu umudugudu wa Carmel, bwahagurutse I Rubavu bwerekeza ku Kirwa cya I Wawa mu giterane cy’ivugabutumwa, iyi Korali yari iherekejwe na Rev Past. Twagirimana Antoine umushumba wa Paroisse Nyabirasi (ADEPR), Past Iriho Seraphin na Ev Nshizirungu Emmanuel, ni urugendo rw’amasaha abiri n’iminota 15 uri mu bwato utareba umusozi cyangwa ubundi butaka iruhande rwawe, ibi nabyo bituma ugenda urushaho kubona imbaraga z’Imana.

Nk’uko basanzwe bohereza abaza gusanganira abashyitsi, iyi Korali yari kumwe n’abakozi babiri ba Ministere y’urubyiruko n’ikoranabuhanga (MYICT) aribo Bwana NTASHYENEZA Theophile na Bwana MUPENZI Desailly, bari baje gusanganira chorale la trompete, bakaba bose hamwe barambutse mu bwato ari abantu 54, Bakigera ku nkombe basanganiwe n’abayobozi batandukanye b’ikigo ndetse na Chorale Inshuti za Yesu ikorera umurimo w’Imana muri iki kigo cya IRVSDC (The Iwawa rehabilitation and vocational skills development centre).

Igiterane cyamaze amasaha 4, cyaranzwe n’indirimbo nyinshi harimo na cumi n’imwe (11) za chorale la trompete, Gushima Imana, ndetse n’ijambo ry’Imana ryari rifite intego ivuga ngo "Ibyarenze inkombe ntibiba byarenze ijambo", byagaragaye ko ryakoze Ku mutima urubyiruko rurererwa muri iki kigo n’abandi bari bahateraniye, birangira hasengewe abihannye bagera kuri 300 ndetse benshi mu urubyiruko rwabaswe n’ibiyobyabwenge biyemeza kutazabisubiramo..

Bwana BIZIMINANA Servilien Umuyobozi ushinzwe amasomo (Director of training) wari uhagarariye ubuyobozi bw’ikigo yatangaje ko igiterane cyageze ku ntego yacyo, yongeraho ko basanze nyuma y’uburyo butandukanye basanzwe bakoresha ngo bahindure urubyiruko ruba rwarabaswe n’ibiyobyabwenge basanze ijambo ry’Imana ari ryo ribasha guhindura umuntu akareka ingeso mbi burundu! Igiterane cyasojwe saa 14h00, nyuma yo kwiyakira ubwato bucyuye choral la trompete bwahagurutse saa cyenda bwerekeza Rubavu.

Chorale Inshuti za Yesu ya i Wawa hamwe na chorale la Trompete ya Carmel

Intego y’ivugabutumwa yajyanye Chorale la Trompete Yayigezeho
Src: Inkuru ya NTASHYENEZA Theophile