I Rubavu: Korari Impuhwe mu gusoza igiterane cy’icyumweru, yaremeye imiryango y’aburiye ababo mu ivugabutumwa ry’iyi korari

Mu isozwa ry’igiterane cyari kimaze igihe cy’icyumweru kibera muri Paruwasi ya ADEPR Gisenyi haremewe imiryango y’abaririmbyi n’abaterankunga ba korali Impuhwe baburiye ababo mu mpanuka iyi korali yakoze ubwo bajyaga mu rugendo rw’ivugabutumwa mu mwaka wa 2002 ,ibiribwa n’amafaranga iyi miryango yahawe bikaba bifite agaciro ka Miliyoni imwe y’amafaranga y’u Rwanda .

Kuva kuwa mbere w’italiki ya 24 kugeza ku cyumweru taliki ya 30 Nyakanga 2017 mu karere ka Rubavu mw’itorero rya ADEPR Paruwasi ya Gisenyi haberaga igiterane cyateguwe mu rwego rwo kuzirikana intwari z’amateka abaririmbyi ba korali Impuhwe baburiye ubuzima bwabo mu mpanuka iyi korali yakoze ubwo yajyaga mu rugendo rw’ivugabutumwa mu cyahoze ari Gitarama muri Paruwasi ya ADEPR Mukingi.


Imiryango y’ababuze ababo mu gihe cy’impanuka yahawe ibyo kurya n’amafaranga yo kubafasha

Iki giterane kuva ku munsi wacyo wa mbere kugera ku munsi wa nyuma cyagiye kigaragaramo amakorali atandukanye yo muri ADEPR Paruwasi Gisenyi nka Bethrehem, Amahoro, Alliance , Bethifage, Evangelique, Bether, Reoboth, Maranatha n’izindi nyinshi ndetse na korali Baraka guturuka mu gihugu cya Kenya yahageze kuwagatandatu. Naho umuhanzi Alex Dusabe abana nabo ku Cyumweru aho yafashije bikomeye iyi korali gusoza neza iki giterane dore ko yarakumbuwe cyane muri aka karere ka Rubavu.


Rev.Kajyibwami Tharcisse umushumba wa ADEPR mu burengerazuba na Rev.Akoyiremeye Claver w’akarere ka Rubavu

Uyu muhango wo gusoza iki giterane abaririmbyi n’abaterankunga ba korali Impuhwe bagera ku bantu 12 baburiye ubuzima bwabo mu mpanuka yabaye bajya murugendo rw’ivugabutumwa, witabiriwe n’ubuyobozi bwa ADEPR burimo Rev.Karangwa John umuvugizi wungirije wa ADEPR, Rev. Kajibwami Tharsisse umuyobozi wa ADEPR mu ntara y’Iburengerazuba, Rev.Claver Akoyiremeye umushumba wa ADEPR mu karere ka Rubavu, ndetse n’abayobozi b’itorero muri Paruwasi ya Gisenyi bifatikanije n’imbaga y’abakristo kuzirikana izi ntwari z’amateka.

Bwana Ruzindana Gad umuyobozi wa korali Impuhwe yavuzeko bafite umunezero kuko basoje neza igiterane cy’icyumweru bari bateguye kuko cyagiye kitabirwa kandi abantu barahembutse mu kumva ijambo ry’Imana n’indirimbo z’abaririmbyi batandukanye bitabiriye.


Ufite Microphone ni Bwana Rubazinda Gad umuyobozi wa korali Impuhwe

Muri aya magambo uyu muyobozi yagize ati :"Iki giterane twagiteguye mu ntego yo kuzirikana abariririmbyi n’abaterankunga bacu baguye mu mpanuka ubu hakaba hashize imyaka 15 ,ikiduhumuriza imitima nuko bitadutunguye Imana yari yaratubwiye ko ari abageni Yesu agiye kwishyira bityo niyo mpamvu mu kubibuka twateguye iki gikorwa cyo gufasha imiryango basize tukaba twabahaye ibyo kurya bitandukanye ndetse n’amafaranga kandi birumvikana ko twabahaye ibitangana kuko bose badafite ubushobozi bumwe." Bose hamwe ibyo bahawe bifite agaciro k’amafaranga agera kuri Miliyoni imwe y’amanyarwanda.

Rev.Karangwa John umuvugizi wungirije w’itorero rya ADEPR ari nawe wari umushyitsi mukuru muri uyu muhango yabwiye abakristo ko igikorwa nk’iki ari cyiza kuko kuzirikana bagenzi babo bazize impanuka bifite imimaro ibiri ikomeye, harimo ko bigira ingaruka nziza ku miryango y’ababuze ababo kuko babona ko itorero rizirikana, kuko baguye mu murimo w’Imana mw’itorerero rya ADEPR , ikindi bigira inyungu ku bantu bazengurutse itorerero kuko babonako ADEPR izirikana abapfakazi n’incike zaryo. Ibi kandi bifite akamaro gakomeye mw’ivugabutumwa kuko n’ubusanzwe kora ndebe iruta cyane vuga numve.


Rev.Karangwa John umuvugizi wungirije wa ADEPR

Muri aya magambo uyu muyobozi yakomeje agira ati: "Aba bantu batabarutse bajya murugendo rw’ivugabutumwa nukuri babaye intwari kandi twizeye ko tuzabasanga mu Ijuru kandi korari Impuhwe nayo turayihumuriza ngo n’ikomere cyane itorero rya ADEPR riyiri inyuma mu gukomeza kubafata mu mugongo kandi ibi bigomba gusigira isomo umuntu wese w’umukristo ko agomba guhora yiteguye kuko tutazi umunsi n’igihe Imana yahamagarira buri wese cyangwa igihe impanda y’Imana izavugira."

Korari Impuhwe ikorera umurimo w’Imana mu karere ka Rubavu mw’itorero rya ADEPR Paruwasi ya Gisenyi imaze imyaka 30 ikora ivugabutumwa, muri iyi myaka imaze ifite Album zigera kuri 6 harimo eshatu zifite amashusho. Yagiye ikora ingendo z’ivugabutumwa mu turere twose tugize igihugu cy’u Rwanda ndetse no mu bihugu nk’u Burundi ,Kenya na Tanzaniya. Iki giterane yakoze kikaba cyari mu rwego rwo kuzirikana abairirmbyi n’abaterankunga bayo bagera kuri 12 bamaze imyaka 15 baguye mu mpanuka iyi korali yakoze ijya murugendo rw’ivugabutumwa muri Paruwasi ya ADEPR Mukingi mu cyahoze ari Gitarama.


REBA AMWE MU MAFOTO Y’IBYARANZE IBI BIROLI





Iki giterane ku munsi wo gusoza cyari kibereye ijisho ubuna akanyamuneza ari kose kuri buri wese


Rev.Nsonera Razard umushumba wa Paruwasi ya Gisenyi niwe wayoboye ku munsi wa nyuma usoza iki giterane



Korari Impuhwe yasoje igiterane cyayo ishimisha benshi haba mu myambarire imirimbire ndetse n’ibikorwa byindashyikirwa


Korari Baraka kuva mu gihugu cya Kenya nayo yakanyujijeho



Korali Bethrehem ya ADEPR Gisenyi yafashije korali Impuhwe gusoza neza igiterane



Alex Dusabe yafashije korari Impuhwe gusoza igitarane cyayo abantu bafashwa n’ibihnagano bye



Igiterane cya korari Impuhwe mu musaruro gisize harimo no kuba haragiye haboneka abakira agakiza


Ubuyobozi bw’itorero mu burengerazuba nabwo bwashyigikiye iki gikorwa


Rubazinda Gad umuyobozi wa korali Impuhwe ashyikiriza umwe mu baburiye ababo mu mpanuka


Umuvugizi wungirije wa ADEPR yavuzeko ADEPR izakomeza kuba hafi yiyi miryango yabuze ababo muri iyi mpanuka


Imiryango yababuriye ababo mu mpanuka korali Impuhwe yakoze muri 2002 yahawe ibyo kurya bitandukanye

Niyondora Vedaste [email protected]