Haranira ubuhamya bwiza imbere y’Imana n’abantu!

Muhagarare mushikamye mukenyeye ukuri mwambaye gukiranuka nk’icyuma gikingira igituza. (Abefeso 6:14)

Mu bintu byose Paulo yahuguriye abakristo, yongeyeho ngo mukenyere ukuri. Ukuri ni ikintu gikomeye ndetse kitoroshye kurindwa kuko akenshi ushobora gusanga hari aho wakureka ukabyungukiramo mu buzima busanzwe ukaba urirengeye, ariko nubwo bimeze bityo niyo ntwaro wakwitwaza umwanzi ntabone icyo akakurega, ikindi gukomera kukuri bihindura umuntu inyangamugayo cyangwa se uwo kwizerwa bitari imbere y’Imana gusa ahubwo n’imbere y’abantu.

Ukuri umuntu arabanza akakumenya bikaba intambwe yambere hanyuma kugira ngo bimuhindure inyangamugayo abishyira mu bikorwa, iyo rero ubuze ukuri uhinduka indyarya, kandi iyo wiyerekanye nk’indyarya nta ngingo iba ikurengera imbere y’Imana kuri satani, kuko ubunyangamugayo bwawe nibwo butera Imana kukwemera no kugutangira ubuhamya imbere ya satani ndetse yewe n’abantu.

Nabonye ikintu kibi kibaho ni ukuvumburwa ko wabeshyaga ugashaka kwigarura ngo uvuge ukuri birakugora ukicwa n’ikimwaro ariko ntakiza nko kurengerwa n’ukuri cyangwa abantu bakaba bose bavuga bati mubaze Runaka ntajya abeshya amakuru abaha ndemera ayo, wumva ari byiza mbega uba mwinshi wumva bikanezeza cyane, Umubwiriza yaravuze ngo kuvugwa neza kuruta amavuta atamye y’igiciro cyinshi ( Umubwiriza 7:1).

Umuntu udafite ukuri muri we ntabwo aba ari umwe burya aba arimo benshi kuko uko agaragaye none siko agaragara ejo umuntu ashobora kugira imyitwarire mu rusengero, yagera kukazi akagira iyindi, yagera murugo akagira iyaho yaba ari kumwe n’inshuti akagira indi kuburyo umubonye hamwe ashobora kukubaza ati we nonese uriya niwe ko nari ntaramubona asenga kuko bakorana, uwo kukazi, uwo kurusengero nawe ati nonese ko nari nziko ari umukristo, uyu muntu hano hose ntabunyangamugayo bamubonaho kuko aho ageze asa naho uko abonye abanyabyaha aba aho, yagera aho basenga akaba aho, ibi si ubunyangamugayo kuko burya ibintu boyse bigera aho bikagaragara ubunyangamugayo bwawe bukarangira.

Iyo satani akurwanyirije mu kubura ukuri ntibimutwara imbaraga nyinshi arahakuyobereza ukihagararaho ubundi ugatangira kubihuza n’iminsi no kugira ubwenge ariko birangira utakaje ubunyangamugayo bwawe imbere y’Imana ndetse n’abantu, ariko Bibiliya yatubwiye ngo dushikame dukenyeye ukuri.

Umaze gusoma ubu butumwa wasanga hari uko wari ubayeho bitandukanye sinasobanuye ukuri mu nyito zako zose muri Bibiliya ariko mfasha tube tugendeye muri ririya jambo kuko Imana aribyo idushakaho, twereke Imana aho tunanirirwa izadufasha kubaho mumucyo kandi ibidashobokera abana b’abantu ku Mana birashoboka. Amen