Guhitamo nabi n’ingaruka zabyo (Igice cya 1) - Kevin L. Jones

Rusi 1:1-5

Nuramuka uhisemo gukoresha amafaranga menshi aruta ayo winjiza, birumvikana ko uzagwa mu gihombo. Nuramuka uhisemo kwanga akazi, birumvikana uzaba umushomeri. Nuramuka uhisemo kurya cyane, uzabyibuha. Nuramuka uhisemo gusuzugura umufasha wawe, bishobora kugusenyera.

Amwe mu mahitamo aba agaragara nk’adafite umumaro, ariko andi abeshaho. Guhitamo iby’umwuka bigira ingaruka ku bugingo. Iyo uhisemo nabi, hari INGARUKA ZIKOMEYE ZIKUBAHO!

Baza: Nowa, Dawidi, Samusoni, Eliya, Abisirayeli, Simoni Petero, n’abandi benshi! Tugiye kuganira ku mahitamo ya Elimeleki n’umuryango we, n’ingaruka byabagizeho. Ubuzima bumaze gukomera, yahisemo guhunga igihugu. Hanyuma yo guhunga, ibyababayeho byagize ingaruka ku muryango we wose.

Rusi ni cyo gitabo cyonyine kiri muri Bibiliya kivuga ku nkuru z’umugore. Muri Bibiliya harimo ibitabo bibiri byitiriwe abagore: Esiteri na Rusi. Ubutumwa burimo bushimishije kuri aba bagore, ni uko Rusi wari umunyamahanga yarongowe n’Umuheburayo, na Esiteri wari Umuyuda akarongorwa n’umunyamahanga.

Rusi ni ubwoko cyangwa ishusho y’itorero. Yari umugore w’umunyamahanga. Bowazi yari umucunguzi, ugereranywa na Kristo. Muri iki gitabo harimo inyigisho nyinshi, ariko uyu munsi turareba ku mirongo 5 ibanza ivuga ku bantu bahitamo kugendera kure y’Imana.

Umuntu umwe yaravuze ati “Icyaha kizagutuza kure y’aho ushaka kuba, Icyaha kizakujyana kure y’aho ushaka kujya, Icyaha kizatuma wishyura ibyo udashaka kwishyura.” Ibyo turaza kubibona muri aya magambo.

Reka dutangire tureba guhitamo nabi:

I. Guhitamo nabi (1:1-2)

None se kuki umuntu yarinda guhitamo nabi? Ikibazo ni uko hariho ibisubizo byisnhi kuri iki kibazo.

Rusi 1:1 “mu minsi y’abaccamanza inzara yateye mu gihugu. Ni uko umugabo w’i Betelehemu y’i Buyuda asuhukira mu gihugu cy’i Mowabu, we n’umugore we n’abahungu be.”

Turabona ko “inzara yateye mu gihugu,” kandi tubona ko ibi byabayeho mu gihe cy’abacamanza. Ibi ubwabyo bigaragaza ko hariho inzara: Abacamanza 21:25 haranditswe ngo “Ariko icyo gihe Abisirayeli nta mwami bari bafite, kandi umuntu wese yitegekaga uko ashatse.”

Iki cyari igihe cyo gukora ibibi, gusenga ibishushanyo, gukiranirwa, kwiba, gusinda, gusambana, kwica, kwirema ibice, … Ibi bijya gusa rwose n’ibyo mur iki gihe cyacu. Abagabo n’abagore bitegeka uko bashatse!”

 Mu maso y’abantu… kubana badashyingiwe n’itorero nta cyo bitwaye.
 Mu maso y’abantu… umugabo ashobora gushyingirwa umugabo mugenzi we, n’umugore agashyingirwa umugore mugenzi we.
 Mu maso y’abantu… gusinda no kwinezeza nta cyo bitwaye.
 Mu maso y’abantu… kunywa ibiyobyabwenge no kubicuruza nta cyo bitwaye.
 Mu maso y’abantu… gusambana nta cyo bitwaye.
 Mu maso y’abantu… gukuramo inda nta cyo bitwaye.

N’ubwo ibi byasa n’ibidafite icyo bitwaye mu maso y’abantu, MU MASO Y’IMANA BIRAGITWAYE!!! Kandi bifite ingaruka. Bibiliya itubwira kenshi ko Imana yatezaga abantu bayo inzara ngo ibacishe bugufi. Iyo abantu bayo bagomaga bakayitera umugongo, akenshi habagaho inzara. Aha ni ho elimeleki n’umuryango we bari bageze… kwihanganira igihe cy’inzara.

Iyo tugeze mu bibazo, akenshi dufata ibyemezo tutabajije Imana. mu bihe bimwe na bimwe, tugomera Imana tukitegeka uko dushatse. Ushobora kuba urimo kunyura mu nzara cyangwa ikindi kigeragezo Imana ishaka kugucisha bugufi kuko wayiteye umugongo, ubu ukaba ugendera mu bibi. HARI INGARUKA ZIKOMEYE ZIZAKUBAHO!!!

Elimeleki yahisemo guhunga, ava i Betelehemu y’i Buyuda ajya i Mowabu.
 "Betelehemu" bisobanura "Inzu y’imitsima"
 "Yuda" bisobanura "Ishimwe"

N’ubwo i Betelehemu hari inzara, ariko hari heza kuruta aho bahungiye. Babonaga nta mugati uhari, ndetse nta mpamvu y’ishimwe ihari. Ariko guhunga ntibyari mu bushake bw’Imana! Iyo ukomeje gusoma muri iki gitabo, usangamo mwene wabo wa Elimeleki witwaga Bowazi, wihanganiye inzara akaguma i Betelehemu maze Imana iramushyigikira.

Elimeleki rero yahunze inzara, ahungira i Mowabu yari hakurya ya Yorodani, mu burasirazuba bw’i Kanani. Mowabu yari ituwe n’abantu basenga imana z’abanyamahanga. Mowabu hari hatuwe n’abakomoka kuri Mowabu, wo mu rubyaro rwa Loti n’umwe mu bakobwa be (Itang. 19:30-38). Ibi birenze kuba umuntu yahunga inzara.

I Betelehemu y’i Buyuda babashaga kujya mu rusengero, no kuzana amaturo ndetse bagakora n’indi migenzo itegetswe n’amategeko. Ariko i Mowabu bari batandukanijwe rwose n’ikintu cyose kirebana n’Imana. uyu mugabo yahungishije umuryango we Imana, awujyana mu byaha no mu bugome.

Igice cya 1 tubonye guhitamo nabi, mu gice cya 2 turibanda ku ngaruka zo guhitamo nabi