Gufashwa kuzana impinduka igice cya 1/ Egide Bizima

Nuko benedata, ndabinginga ku bw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ari ko kuyikorera kwanyu gukwiriye. Kandi ntimwishushanye n’ab’iki gihe, ahubwo muhinduke rwose mugize imitima mishya, kugira ngo mumenye neza ibyo Imana ishaka," ari byo byiza bishimwa kandi bitunganye rwose. Abaroma 12:1-2

Akenshi iyo tuvuye mu materaniro usanga tuvuga ko umwigisha/ (uwabwirije) cyangwa abaririmbyi badufashije, mu ijambo rimenyerewe ngo "Twafashijwe!" Hanyuma ariko ntumenye ari iki cyafashije abantu, kandi ntumenye nyuma yo gufashwa icyakurikiyeho , cyangwa uko gufashwa kwatanze musaruro ki!

Hari umuntu duherutse kuvugana ku murongo wa telefoni, ambwira itsinda rimwe ry’abaririmbyi ngo bakoze ibitangaza, ambwira ko rwose yafashijwe cyane.

Nshingiye ku mbaraga yabivuganye nari niteguye ibintu bigera kuri bibiri:

1. Ijambo ry’Imana ryamumenaguye umutima atari azi cyangwa atumvaga kuri urwo rwego yaryumvisheho

2. Ingamba nshya yafashe mu rugendo rwo guhinduka asa na Yesu kubw’ubutumwa yumvishe agafashwa

Noneho maze kumwumva namusabye kunsangiza ijambo cyangwa ikindi cyamufashije bene ako kageni ngo nanjye mfashwe, natunguwe cyane n’ukuntu ikiganiro cyahise gihinduka!

Yarabanje akubita igitwenge, bisa naho icyamufashije yacyibagiwe cyangwa yakibuze, nuko arambwira ati : "Ariko nawe ukunda kumenya buri kantu..!"

Nyuma yo kuganira nawe umwanya naje gutekereza ku cyo abenshi bita gufashwa aho gihurira no guhinduka.

Ubundi Ijambo ry’Imana, Indirimbo, Amasengesho, n’ibindi twumva ko byadufashije, byakagombye kuzana n’impinduka zo mu mutima cyangwa gufata ingamba nshya ziganisha ku guhinduka tugira wa mutima wari muri Kristu Yesu (Abafilipi 2:5)

Pawulo yandikiye Abaroma abahendahenda cyane, abasaba ikintu gikomeye cyane ari cyo « gutanga Imibiri ngo ibe Ibitambo....! »

Iki si ikintu umuntu yashobozwa no gufashwa gusa, ahubwo impinduka zikomeye zo mu mutima nizo zatuma umuntu ashobora ibyo akanabasha gutanga bene icyo gitambo.

Muvandimwe ndakwifuriza kugera ku mpinduka zingana cyangwa ziruta uko Ufashwa.
Mbararikiye kugumana natwe mu Ijambo ry’Imana, muhabwe umugisha!

Bizima Egide
[email protected]