Gufashwa kuzana impinduka igice cya 2 / Egide Bizima

Nuko bene Data, ndabinginga kubw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ari ko kuyikorera kwanyu gukwiriye. Kandi ntimwishushanye n’ab’iki gihe, ahubwo muhinduke rwose mugize imitima mishya, kugira ngo mumenye neza ibyo Imana ishaka ari byo byiza bishimwa kandi bitunganye rwose. Abaroma 12:1-2

Dukomeje kuganira kuri ya magambo atuganisha kukureba uburyo twagira gufashwa kuzana impinduka mu mibereho yacu ya gikirisitu

Nshingiye ku byo nabashije kugenzura, ibidufasha bishobora kuba byinshi ariko siko byose biduhindura cyangwa bituzanira impinduka zo mu mutima.

Umuntu agizwe n’Ibice 3:

1. Umubiri (Body)
2. Ubugingo (Soul)
3. Umwuka (Spirit)

Uyu munsi turibanda ku gice cy’ubugingo

Ubugingo ni igice kigira imbaraga (influence) ku muntu.
Mu bugingo habamo ikindi gice kinini cyitwa “Amarangamutima”.

Reka twifashishe iki gice cy’amarangamutima.

Amarangamutima ni uburyo umuntu yakira ibintu, bimunejeje ; bimurakaje ; bimubangamiye ; n’ibindi. Amarangamutima kandi ni ryo shingiro ry’amahitamo ndetse n’ibyemezo hafi ya byose umuntu akora cyangwa afata mu buzima.

Ibyo ugaburiye amarangamutima yawe kenshi, ni byo bikugira uwo uriwe, kuko bitegeka amahitamo yawe.

Urugero:
Ndi mu bantu bakunda umuziki cyane kuva mu bwana bwanjye. Iyo ugenzuye usanga umuziki (Indirimbo) ari bimwe mu bintu biryohera amarangamutima kurusha ibindi. Ni nayo mpamvu akenshi zidufasha ku kigero kiri hejuru.

Mu mashusho (Video) y’ibitaramo by’icyamamare nyakwigendera Michael Jackson nabashije kureba, wasangaga hateguwe imbangukiragutabara (Ambulance) nyinshi kandi zikagira akazi kenshi cyane ko kujyana abantu batagira uko bangana kwa muganga kubera ihungabana ry’amarangamutima rishingiye ku rukundo bakunda uwo muririmbyi ndetse n’indirimbo ze.

Hari abandi njya numva ko biyahuye kubera ko amakipe bafana yatsinzwe cyangwa atageze ku nsinzi bifuzaga.

Ibyo kimwe n’ibindi byinshi nawe waba uzi, bigaragaza ko ibigaburiwe amarangamutima yacu biciye mu byiyumviro 5 by’umuntu (5 senses of human organs) akenshi ari byo bigena amahitamo ndetse n’ibyemezo dufata mu buzima bwa buri munsi.

1 Abatesaloke 5: 23 Pawulo yagize ati:
"Imana y’amahoro ibeze rwose, kandi mwebwe ubwanyu n’Umwuka wanyu, n’ubugingo n’umubiri byose birarindwe, bitazabaho umugayo ubwo Umwami wacu Yesu Kristo azaza."

Ibyishimo bituruka ku marangamutima yacu, bitandukanye n’umunezero wo mu Mwuka. Iyo ibyishimo bigarukiye mu marangamutima yo mu bugingo gusa, nta mpinduka ku ngeso za kamere zibasha kuba mu buzima bwacu kabone n’ubwo twaba tubwifuza cyane.

Ushobora gufashwa cyane ariko ugakomeza kugira ishyari, ugakomeza kuba umunyamujinya, n’izindi ngeso za kamere wari usanganywe ukazigumana kuko amarangamutima aryoherwa n’ibyo kamere ikunda, umubiri ukaguma mu byaha ntube ukibaye urusengero rw’Umwuka.

Impinduka zigera ku muntu zigatuma yemera kuba igitambo kizima gishimwa n’Imana, ni izarenze amarangamutima yo mu bugingo zikagera mu Mwuka (Spirit).

Niyo mpamvu Yesu yavuze ati: « Imana ni Umwuka, n’abayisenga bakwiriye kuyisengera mu Mwuka no mu kuri. »

Intumwa Pawulo nawe yandikiye Abaroma ati: « Abayoborwa n’Umwuka w’Imana bose ni bo bana b’Imana » (Abaroma 8:14)

Yongeye kwandikira Abagalatiya ati: « Ndavuga nti muyoborwe n’Umwuka, kuko ari bwo mutazakora ibyo kamere irarikira kuko kamere irarikira ibyo Umwuka yanga, kandi Umwuka yifuza ibyo kamere yanga kuko ibyo bihabanye, ni cyo gituma ibyo mushaka gukora atari byo mukora. »

Tuzasoza tureba ku cyo twakora kikadufasha gufashwa kutugeza ku mpinduka ziduha kunesha kamere.

Amahoro y’Imana abane namwe mwese!

BIZIMA Egide
[email protected]