GASABO: UMUSHUMBA MUSHYA WA ADEPR ITORERO RY’AKARERE KA GASABO YAKOZE URUGENDO RWA MBERE ASURA AMAPARUWASE 19!

Kuri uyu wa gatanu tariki 25/04/2014, Umushumba mushya wa ADEPR Itorero ry’Akarere ka Gasabo Rev Pasteur KABOYI NDATABAYE Hagayo, yatangiye ingendo zo gusura amaparuwase 19 agize iryo torero.

Ifoto y’urwibutso n’abayobozi bose, Umushumba hagati inyuma

Uruzinduko rwa mbere yarukoreye muri Paruwase ya Butare, aherekejwe na bamwe bo mu bayobozi b’Itorero ry’Akarere ka Gasabo.

Igiterane cyo kwakira uwo mukozi w’Imana muri Paruwase Butare , cyabereye ku mudugudu wa Bumbogo, kitabiriwe n’abayobozi, Abakristo ndetse n’amakorari yafatanyije n’umuhanzi MUGABO Venuste basusurukije icyo giterane.

Uwo munsi waranzwe n’ibyishimo n’umunezero ku bari bacyitabiriye kandi n’Umushumba w’Itorero ry’Akarere yanejejwe cyane n’uko akandagije ibirenge bye ahantu umubyeyi we watabarutse, nyakwigendera Rev Pasteur RWIZIBURA Zaburoni yakunze kuza kuvuga ubutumwa.

Umushumba yakomeje yigisha Ijambo ry’Imana, asoma Yosuwa 14:13-17 No mu Abagalatiya 2:20, rifite umutwe witwa “KOMATANA N’UWITEKA”. Yagarutse cyane ku ntwari zo kwizera zaranzwe no komatana n’Uwiteka zikora ibikomeye, uwitwa Henoki we aza no kwimurirwa mu ijuru adapfuye.

Yavuze kuri Kalebu wakoranye bya hafi na Yosuwa mu kurwana intambara igihe Abisiraheri bavaga mu Egiputa bajya i Kanani mu gihugu cy’isezerano, bagera ikanani Yasuwa agatanga imigabane ariko akibagirwa Kalebu, ariko aho abyibukiye amuha umugabane i Heburoni hitwaga Kiriyataruba hari hatuye umunaki ukomemeye witwa Aruba.

Ni cyo cyatumwe haba gakondo ya Kalebu kuko yomatanye n’Uwiteka Imana y’Abisiraheri. Asoza inyigisho asengera umukumbi Imana yamuragije kandi awusabira imbaraga ngo ushobozwe komatana n’Uwiteka.

Mu ijambo rye Umushumba w’Itorero ry’Akarere ka Gasabo yatangarije abantu akomeje gukora ingendo azenguruka asura amaparuwase yose ari kumwe n’umuhanzi MUGABO Venuste, anakangurira Itorero kurangwa n’urukundo hamwe no kuba hafi abacitse ku icumu rya Jenoside yakorewe Abatusi mu 1994.

MUTESA Epimaque