Ese umutunzi nyakuri ni inde?

Muri iki gihe,usanga abantu benshi bahuze cyane, ugasanga ntibakibona umwanya wo kwita ku imiryango yabo, gusenga, gusabana n’inshuti n’abavandimwe ndetse na bo ubwabo bakiburira n’umwanya wo kuruhuka ugasanga bamwe bahuye n’uburwayi ,umunaniro ukabije(stress) bishobora no gutuma bahatakariza ubuzima.

Muri iyi minsi turimo, usanga kugira ubutunzi bwinshi (amamodoka, inzu, amafaranga menshi muria banki, ubucuruzi bwambukiranyije imipaka)n’ibindi bituma banyiri kubitunga bamamara, bavuga rikijyana ndetse bakubahwa na buri wese ariko ugasanga birase ubwo butunzi bakibagirwa uwabubagabiye ari we nyir’ubutunzi budashira.
Gukora rwose ni byiza (gucuruza ni byiza, abantu bakabona ibyo bakeneye, guhinga na byo ni byiza abantu bakabona ibibatunga ndetse n’indi mirimo inyuranye ikorwa igafasha abantu kubona ibyo bakeneye kandi igatunga abayikora n’imiryango yabo. Imana iduhera umugisha mu byo dukora, ikigeretseho na Bibiliya ibivuga neza ngo “Udakora Ntakarye”.

Mu bihe tugezemo ,birakwiye ko abantu bakora ariko bakeneye kumenya gukora kwiza n’aho kubika kugira ngo ubutunzi bwabo butazangirika.

Ese Bibiliya ivuga iki ku hakwiriye kubikwa ubutunzi bwacu?

Imana idusaba no kutarushywa no gushaka ubutunzi ahubwo ikadusaba kuyihanga amaso, kuyishakana umutima ukunze kuko ibindi byose ari ubusa,biyoyoka nk’umuyaga. Mu gitabo cy’Imigani 23:4-5 hagira hati:” Ntukarushywe no gushaka ubutunzi, ihebere bwa bwenge bwawe. Mbese wahanga amaso ku bitariho? Kuko ubutunzi butabura kwitera amababa, bukaguruka nk’uko igisiga kirenga mu bushwi”.Imigani 23:4-5.

Imana itubwira ko tugomba gushaka ubwami bwayo no gukiranuka kwayo kuko ibindi byose tuzabyongererwa (Matayo 6:33).
Nk’abakristo bamenye Imana ,iduhishurira neza ko umutunzi nyakuri ari ubika ubutunzi bwe mu ijuru aho inyenzi n’ingese bitagera kandi ikadusezeranya ubugingo buhoraho.( Matayo:6:19-20).
Imana idushoboze gushaka ubutunzi butabora mu izina rya Yesu Kirisitu.

Sophie @Agakiza.org