Ese ujya umenya ko nawe waba umwe mu bahiriwe?

Imwe mu mvugo ikomeye dukunze gukoresha cyane cyane iyo tubonye umuntu wabonye bimwe mu byiza twe tutarageraho cyangwa tugishakisha cyane cyane ibigendanye n’imitungo n’amafaranga , “turavuga ngo nibe nawe warahiriwe”, gusa igitangaza n’uko uwo twita ko yahiriwe nawe hari abo abona akabona ko bahiriwe kumurusha, ndetse we akabona ntacyo arageraho, nyamara mugihe twabonaga uwatugeza ku rwego ariho twaba tunyuzwe, ibi rero bituma umuntu yibaza byinshi ndetse akibaza ati ni inde uhiriwe muri iyi si ?

Iyo dusomye ijambo ry’Imana mu butumwa bwiza uko bwanditswe na matayo 5, niho Yesu yateruye amagambo agira ati “hahirwa abakene ku mitima yabo, kuko ubwami bwo mu ijuru ari ubwayo. Hahirwa abashavura,kuko aribo bazahozwa. Hahirwa abafite inzara n’inyota byo gukiranuka, kuko aribo bazahazwa, hahirwa abanyambabazi,kuko aribo bazazigirirwa. Hahirwa ab’imitima iboneye kuko aribo bazabona Imana. Hahirwa abarenganyirijwe gukiranuka kuko ubwami bwo mu ijuru ari ubwabo.

Mu rwandiko kandi rwanditswe na yakobo 1:12 na none hakagira hati “hahirwa umuntu wihanganira ibimugerageza kuko namara kwemerwa azambikwa ikamba ry’ubugingo. Aya magambo dusomye iyo uyahuje na kwa guhirwa twe tuvuga usanga bisa nk’ibihabanye ariko ku rundi ruhande bikanuzuzanya, akaba ari nayo mpamvu twavuga ko kubona ibyo umutima wawe ushaka ni uguhirwa koko ndetse ni byiza ariko bikaba byiza kurushaho iyo harimo kubaha Imana,no gukiranuka, gutunga nabyo ni ngo mbwa mu buzima bwa buri munsi tubamo ariko iyo hatabonetsemo kubahisha Imana umuntu abyayisha irari rwe, akabinezerwamo akenshi bikana mutera kujya kure y’Imana.

Iby’ubu butunzi kandi byateye impungenge na Yesu ubwe aho yagiraga ati ku ku mutunzi biragoye kwinjira mu bwami bw’Imana ngo icyoroshye ni uko ingamiya yakwinjira mu izuru ry’urushinge “Matayo 19: 24” ibi Yesu yabivuze agira anatwibutse ko gutunga rimwe na rimwe bitwara igice ki nini cy’ubuzima bwacu nyamara bikadushuka cyane ko inyungu zabwo iyo zitabonetsemo gushaka ubwami bw’Imana zirangirira mu isi nyuma bikaba bibi kurutaho, ndetse bigatuma umwanya wose wafataga ujya gushaka icyahembura ubugingo uwumara mukwiruka kuri kuri bwa butunzi bwawe,aha rero umuntu ababa yagaruka inyuma akagira ati “abahiriwe ni benshi ariko guhirwa nyako ni uguherekejwe n’umutima wanze icyaha ugakunda gukiranuka.

Hari umubare munini w’abantu bajya bitiranya guhirwa nyamara bakumva ko bo basa nk’abavumwe mbese nta guhirwa bateze, ariko ibi ntago aribyo, ubuzima bwose tubamo muri iyi si tububayeho kubw’ubuntu bw’Imana niyo iduha kuramuka, itaguhaye umugisha wayo ntacyo wageraho, gukora ni byiza kandi abakora cyane barifuzwa kuko batuma isi igera kuri byinshi, ariko byaba biteye agahinda umuntu anejeje abatuye ku isi byonyine ariko akabura ubugingo buhoraho.

Ikiruta niba ushaka guhirwa by’ukuri uyu munsi fata icyemezo emera ntuyoborwe n’irari ry’ibyiza byo muri iyi si rimwe na rimwe bigushyira kure y’Imana ahubwo ugendere mubitunganye ndetse uyoborwe n’ijambo ry’Imana ryo rigira riti “Hahirwa abamesera ibishura bwabo bakabyejejsha amaraso y’umwana w’intama yesu kuko aribo bazabasha kwegera cya giti cy’ubugingo maze banyure mu marembo binjire muri rwa rurembo( ibyahish 7:14,22:14)