Ese ni ingenzi kumenya ko Yesu Kristo ari umwana w’Imana?

“Nuko Yesu ajya mu gihugu cy’i Kayisariya ya Filipo abaza abigishwa be ati “Abantu bagira ngo Umwana w’umuntu ndi nde?” Baramusubiza bati “Bamwe bagira ngo uri Yohana Umubatiza, abandi ngo uri Eliya, abandi ngo uri Yeremiya, cyangwa ngo uri umwe wo mu bahanuzi.”
Arababaza ati “Ariko mwebwe ubwanyu mugira ngo ndi nde?” Simoni Petero aramusubiza ati “Uri Kristo, Umwana w’Imana ihoraho.”(Matayo16:13:16)

Iki ni ikiganiro cyabaye hagati ya Yesu n’abigishwa be, ariko muri iki gihe gikwiye kuba urufatiro kuri buri mukristo , akamenya , akizera akanabwira ibiremwa byose byo ku isi ko’Yesu Kristo ari umwana w’Imana nzima’.

Abantu benshi ku isi bumvise kandi bazi Yesu Kristo nk’uko bibiliya ibivuga: Umwana w’Imana ihoraho. Bagendeye ku byanditswe bamenye ko asumbye ibiremwa byose, yavutse ku mwari w’isugi, yabaye mu buzima busanzwe, yarababaye, yavuye amaraso, yarapfuye, arahambwa hanyuma azuka mu bapfuye, ndetse abenshi inkuru ze zabahaye ibyiringiro zituma bahinduka abantu Imana yishimira, bahitamo kugendana na Kristo mu mibereho yabo.

Simoni Petero yasubije ikibazo cya Yesu, ariko igisubizo cye cyavuye mu guhishurirwa Yesu uwo ari we: Ko uretse kuba ari umuntu w’inyama n’amaraso, ahubwo ko yahoze kandi ari Imana, ko uretse kuba yaratanzwe agapfira ku musaraba, ko yahoze kandi akiri Imana.

Tekereza kuri ibi:

Petero n’abandi bigishwa babonaga Yesu umunsi ku munsi,basangira , bagendana, bavugana kandi baseka, babonaga Yesu akiza abarwayi agacyaha n’inyanja igatuza(Matayo8), bari barabonye Yesu ahaza ibihumbi by’abantu(Matayo14:13-21), bari barabonye Yesu agenda hejuru y’inyanja, maze yemerera na Petero kuyigendaho.( Matayo 14:22-33).

Petero n’amaso ye yabonye ibyo uyu muntu wakoraga ibikorwa byiza, maze agira ihishurirwa amenyako ari Mesiya, umwana w’Imana waje kugirango amareho imirimo y’umwijima, kandi akize abantu icyaha bityo bemererwe kugirana ubusabane n’Imana.Bityo Petero arasubiza ati:

“Simoni Petero aramusubiza ati “Uri Kristo, Umwana w’Imana ihoraho.” Yesu aramusubiza ati “Urahirwa Simoni wa Yona, kuko umubiri n’amaraso atari byo byabiguhishuriye, ahubwo ni Data wo mu ijuru.”(Matayo16: 16-17)

Kuki ari ingenzi kubimenya?

Ntitutizera uku kuri ko Kristo ari umwana w’Imana , ntituzaba mubazakizwa:
“Kuko Imana yakunze abari mu isi cyane, byatumye itanga Umwana wayo w’ikinege kugira ngo umwizera wese atarimbuka, ahubwo ahabwe ubugingo buhoraho. Kuko Imana itatumye Umwana wayo mu isi gucira abari mu isi ho iteka, ahubwo yabikoreye kugira ngo abari mu isi bakizwe na we.”(Yohana3:16-17)

Agakiza kacu kakomotse ku mwana w’Imana, Yesu Kristo. Ntituramuka tutamwizeye ntituzakizwa, ntituzareka gukora ibyaha kandi ntituzigera dushyikira ubwiza bw’Imana.

Sophie @Agakiza.org