Ese koko nta muntu wo kwizerwa ubaho nk’uko bikunze kuvugwa?

Abantu benshi bakomeza kwibaza ngo ‘‘ni inde wo kwizerwa mu isi?’’ Iki ni ikibazo cyakagombye kubonerwa igisubizo igihe cyose abera batarazamurwa.

Wakwibaza impamvu hataboneka benshi bo kwizerwa kandi haboneka benshi bemeza ko bakijijwe. Iyo abantu badashaka gusubiza iki kibazo, bakunda kwifashisha uyu umurongo uboneka muri Bibiliya : « Uku ni ko Uwiteka avuga ati : "Havumwe umuntu wiringira undi muntu akishima amaboko ye, mu mutima we akimura Uwiteka." Yeremiya 17 :5 »

Iri jambo ntirisobanura ko nta muntu wo kwizerwa ukwiriye kubaho. Ahubwo rivuze ko nta muntu ukwiriye kwiringirwa, cyangwa ikindi kintu icyo ari cyo cyose ngo gifate umwanya w’Imana mu mutima w’umuntu.

Ndetse ko n’uwagira undi cyangwa ikindi yiringira kitari Imana ari uwo kuvumwa kuko aba yimitse ikigirwamana muri we. Ariko ntabwo bivuze ko nta muntu wo kwizerwa ukwiye kubaho wafasha unaniwe kuruhuka.

Ijambo ry’Imana ridusaba kumarana imibabaro. « Nuko mumaranishe imibabaro kubwirana ayo magambo 1tesalonikiki 4 :18. »

Pawulo yandikiye Filemoni aramubwira ngo: “nkubonemo umumaro, unduhure umutima”.
Ese wamara umuntu umubabaro utazi ko ababaye, cyangwa utamufitiye imbabazi?

Uburyo bwiza bwo kumara umuntu umubabaro ni uko yaba yakugiriye ikizere ndetse akemera kugukingukira akakubwira ibimugoye, nibwo nawe ubona uko umufasha. None uretse no kuganira iby’ubuzima bwite, abantu basigaye batinya no kwatura ibyaha kubera ibyo baturiye mu iteraniro bibatanga kugera muri karitsiye aho batuye.

None umuntu utagira ibanga ku ntege nke za mugenzi we kandi nawe adashoboye byose, yashobora kumugirira ibanga mu gihe yamubwiye intambara ze? Birababaje kubona umuntu ukijijwe ukumva urarushye mu mutima kandi yakabaye akuruhura.

Indamukanyo y’abana b’Imana nikomeze ibe Yesu ashimwe, ariko ntibigarukire aho, bikomeze no mu bindi bice by’ubuzima, uvuge uti : « Mwenedata nkubonye mo umumaro, ndaje ngo unduhure umutima muri Kristo.»( Filemoni 1 :20). Ibi bintu ko byari byiza kuki binanira abantu b’Imana?

Biragoye ko wakwizerwa mu gihe nawe ubwawe utiyizera.

Hari ho abantu nabo ubwabo batiyizera. Uzababwirwa n’uko batagira uwo bizera. Iyo umuntu avuze ngo: “Nta muntu wo kwizerwa uri ho”, bisobanuye ko nawe ubwe atari umwizerwa, kuko n’ubusanzwe abantu bananiwe
kunesha intege nkeya zabo biragoye kwemera ko abandi bazinesha. Umuntu wiba nta muntu yizera yumva bose ari abajura. Umuntu usambana biragoye ko yakwemera ko kubaho udasambana bishoboka.

Niyo mpamvu uzumva umuntu ahamya ashize amanga ko nta muntu uhari wo kwizerwa. Umuntu atera hejuru akavuga ko nta mukobwa w’isugi ukibaho kuko azi umubare w’abo amaze kubwambura, ariko niba itorero rya Kristo ritarazamurwa, Imana iracyafite abantu, kandi urufatiro rw’Imana ruracyahagaze.

Hari ho n’abandi bavuga batyo bitewe n’ibikomere bagiriye muri benedata bo mu nzu y’Imana. Ariko Imana ifite abandi bantu bo kwizerwa, menya ko uwakubabaje muri ubu buryo atariwe Imana yaremye gusa ifite abandi wageraho ukaruhuka.

Igituma bikomeza kuvugwa ko nta muntu wo kwizerwa mu itorero ni uko abenshi mu bigisha ibyo gukiranuka babihakanisha imirimo yabo.

Amagambo abantu babwiriza mu nsengero n’ahandi ameze nk’amababi y’ibiti, imyitwarire yabo mu buzima busanzwe ni zo mbuto zacyo. Ni gacyeya uzabona igihingwa gikundirwa amababi gusa, ahubwo kigira umumaro kuri nyiracyo na rubanda kubera imbuto cyera.

Ufite ibyiringiro by’ijuru wese akwiye kuba umwizerwa muri byose, kugira ngo agirire umumaro abandi bamugane ngo abafashe kuruhuka.

Kutaba umwizerwa byangije iki mu mwuka no mu mubiri?

Mugice cy’umwuka: Bibiliya idusaba kwaturirana ibyaha byacu ndetse no gusabirana kugira ngo dukizwe. Yakobo5:16. Biragoye kwaturira umuntu utamufitiye icyizere ko ari uwo kwizerwa, kandi iyi ni yo ntambwe ya mbere yo gukizwa. Ngo “kandi dusabirane”. Ibi byose byakorwa neza igihe biri gukorwa n’abantu bakundanye bizeranye, Imana nayo irabanezererwa ikabasukira umwuka wera.

Ni byo byabaye ku munsi wa Pentekote intumwa zari hamwe ariko zihuje umutima, Nta wishisha mugenzi we maze umuriri ubatungura uva mu ijuru bose buzura umwuka wera. Ibyakozwenintumwa 2:1-4

Mu gice cy’umubiri, ubusanzwe ikintu cyose kigira uburemere bw’ibyo kigomba gutwara, ni nako n’ubwonko bw’umuntu bugira ibyo bushoboye kwihanganira no kubika. Iyo umuntu aganiriza undi iby’imibabaro ye aba yumva ari kuruhuka buhoro buhoro, kandi biba akarusho iyo ingaruka zo kuba yabimubwiye abonye zibaye nziza.

Umuntu ufite ibibazo byinshi akabura uwo abwira aba afite akaga gakomeye, bamwe bibatera kurwara indwara zikomeye nk’umutwe, umuvuduko w’amaraso, guhungabana n’ihahamuka, agahinda gakabije, n’izindi nyinshi, kandi abenshi bapfa mu buryo butunguranye butanasobanutse kubera iyo mpamvu.

Biteye agahinda kumva ko umuntu uba mu itorero yarwaye imwe muri izo ndwara ziterwa no kubura uwo ubwira kandi abana n’abantu bitwa benese.

Ese nawe wumva bikwiye kugira abantu bo kwizerwa?

Ntibitangaje kubona umuntu wo kwizerwa mu itorero ahubwo kuba bataboneka ni byo bitangaje. Bibiliya itwereka ingero z’abantu bo kwizerwa, bivuga ko abo kwizerwa bahari.

Hari abantu bo kwizerwa, Nehemiya7:2; Abakolosayi 1:2; 4:9;…

Dore inama ngufitiye.

Niba ukeneye umuntu wo kwizerwa, gerageza wowe ube umuntu wo kwizerwa. Kuko uzi umumaro w’umwizerwa, fata iyambere usenge usaba Imana igushoboze kurwana n’ibintu byose byatuma utekerezwa nk’utari umwizerwa kandi birashoboka, bityo Imana nibona ko uri uwo kwizerwa izaguha abakwizera kandi nawe izakwereka abandi bo kwizerwa kuko ibyo ugirira abandi ari byo bikugarukira. Bityo haboneke umubare munini w’abahimbaza Imana.

Nyuma yo kubona ko hari ikibazo gerageza kuba igisubizo ntuzigera wicuza, kuko yesu azaguhemba, kandi nutabikora nabwo azabikubaza.

NKWIFURIJE UMUGISHA W’IMANA!

NIYONDORA Vedaste [email protected]