Ese imyambarire hari aho ihurira n’agakiza?

Uko iterambere rikataza, niko hagenda haduka imyambarire itandukanye aho usanga abantu benshi cyane cyane urubyiruko bambara imyenda igaragaza uko bateye, migufi cyane,amapantalo acitse (dechire’) n’indi ushobora gusanga inyuranyije n’umuco cyangwa idahesha Imana icyubahiro.

Bibiliya itubwirako buri kintu cyose dukora tugomba kugikora ku bw’Umwami wacu Yesu Kristo, gusinzira, kubyuka, kurya neza, aho dukorera, mu mibereho ya buri munsi, ibyo dukora byose bikwiye guhesha Imana icyubahiro.

“Kandi icyo muzavuga cyose n’ibyo muzakora, mujye mubikora byose mu izina ry’Umwami Yesu, mushima Imana Data wa twese ku bw’uwo.” Abakolosayi 3:17

Abakristo benshi bazi uko bashobora kwitwararika mu byo bavuga cyangwa bakora bigahesha Imana icyubahiro, ariko ntibamenyako imyambaro bambara ishobora kudahesha Imana icyubahiro. Ubuzima bwo gukizwa no kubahisha Imana ntibugarukira mu kuvuga no gukora imirimo runaka gusa, bigomba kugera no ku mibiri yacu.

Ni gute abakristo bahitamo imyambarire ihesha Imana icyubahiro?

Bamwe mu bakristo batekerezako uruhare bagira muguhitamo icyo bambara ntacyo byangiza ariko bagomba kwirinda cyane bakambara imyenda ibahesha icyubahiro ituma abatizera badashobora kubatandukanya n’abatarakira agakiza kandi bagatekerezako Imana nayo itita ku myambarire yacu.

Ibi birareba abagabo n’abagore bavugako bamenye Imana, ntibikwiyeko bambara imyenda ituma ubareba abibazaho, ikaba yakurura irari ry’umubiri.

1Yohana 2:16: “ kuko ikiri mu isi cyose ari irari ry’umubiri ari n’irari ry’amaso,cyangwa kwibona ku by’ubugingo bidaturuka kuri Data wa twese, ahubwo bituruka mu isi.”
Izi ni zimwe mungero zafasha abakristo guhitamo imyambaro yahesha Imana icyubahiro:

1. Ambara imyenda idakurura abo mudahuje igitsina

Abakristo ntibakwiye kwambara imyenda ikurura abantu ikaba yanabagusha mu cyaha cy’ubusambanyi. Ku bakobwa n’abagore bubaha Imana ntibikwiye kwambara imyenda ibonerana, migufi cyangwa indi yose ituma ubabonye abatekereza nabi.

Abagabo nabo, bambare imyenda ibahesha icyubahiro iterekana igituza, imyenda y’imbere, yacitse, ahubwo imyambaro yanyu ihetse So icyubahiro.

2. Wishukwa n’ibigezweho.

Muri iki gihe hagenda haduka imyenda itandukanye akenshi iba idahesha Imana icyubahiro.abakristo ntibakwiye guha umwanya imyenda y’inzaduka ngo barashakisha ubwiza.birakwiye ko bashiki bacu bakwiye gufata iya mbere bakaba intangarugero kuri bagenzi babo bambara ibibambika ubusa, bakabereka ko ubwiza nyakuri ari ukubaha Imana. Imana ntikeneye kuba wambaye ibigezweho ngo ibone ubwiza bwawe ahubwo ikeneye ko uyubaha.

1Petero 3:3: “Umurimbo wanyu we kuba uw’inyuma, uwo kuboha umusatsi cyangwa uwo kwambara izahabu cyangwa uwo gukanisha imyenda.”

3.Irate Imana gusa

Wikwirata imyambaro wambaye ahubwo wirate Imana n’umwana wayo. Ibyo nubigeraho uzumva neza ko utambaye neza ahubwo ari ukubahisha Imana n’umwana wayo w’ikinege wagucunguye.

Birakwiye ko abakristo bakunda kandi batinya Imana bayihesha icyubahiro binyuze mumyambaro bambara. Ni ngombwa kumenya ko imyambaro bambara igomba kugaragaza uwiza bwa Yesu Kristo.

[email protected]