Ese imicungire mibi y’amaturo yakabaye imbogamizi yo gukorere Imana?

Intambara n’amakimbirane akaze ntibisiba kumvikana hirya no hiryo mu madini ya gikirisito. Ukwigomeka bw’abakirisito bamwe na bamwe ku b’abayobora, ibifungo bya hato na hato ku bayobozi b’amadini, ibi birushaho gufata indi ntera. Abatari bake bemeza ko ikihishe inyuma y’umwiryane uboneka muri amwe mu madini ya gikirisito mu Rwanda nta kindi kitari imitungo, aho usanga buri wese ugize inshingano ahabwa ashaka gukurura yishyira. Ibi bituma hari n’amakimbirane avuka biturutse mu kurwanira ubuyobozi.

Ikintu cyose utanze mu nzu y’Imana cyitwa ituro n’ubwo yaba atari amafaranga ariko hano turavuga amafaranga kuko ni ryo turo ritangwa cyane n’abantu benshi rigakoreshwa muri byinshi.

Ni iki Bibiliya ivuga ku mafaranga ?

Nta muntu wanga amafaranga, kuko adufasha mu mibereho ya hano ku isi ariko tujye tuzirakanako hari inzira za ngombwa Imana yasize zo kubona amafaranga kandi buhoro buhoro bitewe nuko wubahishije Imana izo nzira igenda izikwaguriramo. Gushaka amafaranga binyuze mu nzira mbi ntaho bitaniye no kwiturikirizaho igisasu uzi neza ko cya kwica cyangwa kikagusigira ubumuga.

“Kuko gukunda impiya ari umuzi w’ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi. Ariko wowe ho muntu w’Imana ujye uhunga ibyo, ahubwo ukurikize gukiranuka, kubaha Imana, kwizera, urukundo, kwihangana n’ubugwaneza. Ujye urwana intambara nziza yo kwizera usingire ubugingo buhoraho, ubwo wahamagariwe ukabwaturira kwatura kwiza imbere y’abahamya benshi” (1Timoteyo 6:10-12)

Izi ni zimwe mu mpungenge abantu bafite:
• "Insengero za none zita gusa ku mafaranga."
• "Amafaranga atangwa mu rusengero akoreshawa nabi, nyatangira iki ?"
• " Ubundi amafaranga akoreshwa mu bintu bikwiye ?

Ni iki bibiliya ivuga ku amaturo ?

Imana ishaka ko dutanga kuko byerekanako dukunze Uwiteka mu buzima bwacu
Buri kintu cyiza cyose kiva mu ijuru ku Mana idahinduka, bur kintu cyose dufite ni impano yavuye ku Uwiteka, niyo mpamvu iyo dutanze tuba dusubije Imana akantu gato cyane muri byinshi twahawe. Gutanga bituruka ku mutima uhimbaza Imana.

“Gutanga kose kwiza n’impano yose itunganye rwose ni byo biva mu ijuru, bimanuka bituruka kuri Se w’imicyo udahinduka, cyangwa ngo agire n’igicucu cyo guhinduka.” (Yakobo 1:17)

Gutanga biruta guhabwa

“Nababereye icyitegererezo muri byose, yuko ari ko namwe mukwiriye gukora imirimo ngo mubone uko mufasha abadakomeye, no kwibuka amagambo Umwami Yesu yavuze ati ‘Gutanga guhesha umugisha kuruta guhabwa. ” ( Ibyakozw 20:35)
Imana ishakako dutanga kuberako izi ko biduhesha umugisha mu gihe tubikoranye umutima ukunze.

Icyo umuntu atanze nicyo kimugarukira

“Mutange namwe muzahabwa. Urugero rwiza rutsindagiye, rucugushije, rusesekaye ni rwo muzagererwa, kuko urugero mugeramo ari rwo muzagererwamo namwe.”. (Luka 6:38)
“ Hari umuntu utanga akwiragiza, yyamara akarushaho kunguka. Kandi hari uwimana birenza urugero, Ariko we bizamutera ubukene gusa. Umunyabuntu azabyibuha, Kandi uvomera abandi na we azavomerwa.. (Imigani 11:24-25)
Iyo umuntu agize umutima w’ubugugu aba yibuza imigisha.

Agaciro ka maturo dutanga ntigashingira ku bwinshi bwayo.

Yesu yicara yerekeye isanduku y’amaturo, areba abantu batura amakuta bayashyiramo, Abatunzi benshi bashyiramo menshi. Umupfakazi wari umukene araza atura amasenga abiri, ari yo kuta. Ahamagara abigishwa be arababwira ati “Ndababwira ukuri, y’uko uriya mupfakazi atuye byinshi kuruta ibyo abandi bose batuye, kuko bose batuye ibibasagutse, ariko we mu bukene bwe atuye icyo yari asigaranye, ari cyo yari atezeho amakiriro.”(Mariko 11:41-44)

Uyu mupfakazi Tumwigiraho ibintu 3 by’ingenzi:

1. Imana iha agaciro ituro ryawe ititaye uko abantu bakubona

Mu maso h’Imana, ubwinshi bw’amaturo utanga si byo biguhesha umugisha . Bibiliya yavuzeko hari abatunzi batanze byinshi ariko Yesu ashima ituro rito ry’umupfakazi kuko yatanze ibyo afite byonyine.

2. Impamvu iteye umuntu gutanga niyo ifite agaciro ku Mana

Yesu yitegereje abantu batura, kimwe na none Imana ituma dutura. Iyo utanze kugirango abantu bakubone , ituro ryawe rita agaciro ryakagize kuko Imana yibanda cyane ku buryo ituro ritanzwemo kurusha icyo utanze. Inkuru ya Kayini na Abeli nayo irabigaragaza neza (Itangiriro4:3-7)

3. Imana ntishakako wita ku cyo amaturo utanga akoreshwa

Umuntu yiba Imana iyo adatanze ituro.Imana yabwiye Abisirayeli kuzana ibyo kurya mu nzu yayo, kuko bari barinangiye umutima bakanga gutanga kimwe mu icumi. Hano wakibaza ngo ese Imana irarya ? Imana irya binyuze mu bantu bayo kandi ibyo utanze n’ishimwe ry’Imana kuko ibyo kurya by’Imana ni amashimwe y’abantu.

Nimuzane imigabane ya kimwe mu icumi ishyitse mubishyire mu bubiko, inzu yanjye ibemo ibyokurya. Ngaho nimubingeragereshe, ni ko Uwiteka Nyiringabo avuga, murebe ko ntazabagomororera imigomero yo mu ijuru, nkabasukaho umugisha mukabura aho muwukwiza (Malaki 3:8-10)

Amaturo ahabwa Imana, iyo utekereje ku mafaranga utanze n’icyo azakora bishobora kukugusha kugera ku rwego ucumura ntubone umugisha uturutse ku Mana. Ntabwo ari inshingano zawe kugena icyo amaturo atangwa mu rusengero agomba kumara kuko hari ababitorewe bitwa abatambyi kandi nibabikoresha nabi Imana izabibaryoza, kuko bizabazanira umuvumo.
Uyu mutego wo kugenzura amaturo umuntu atabishinzwe, satani ajya awutega abantu benshi bakibuza imigisha, bakabona imivumo, bagahorana inyatsi idashira.

Nubwo amaturo atangwa mu runsengero ariko ntabwo aba ahawe Pasiteri ahubwo uba uyahaye Imana. Gucunga nabi umutungo w’amaturo yatanzwe ntabwo byakabaye imbogamizi ku muntu uzi icyo gukora, ukore ukorera Imana mu mwanya wo gukorera abantu.

[email protected]