Dore uko wahangana n’indwara y’imitsi

Indwara y’imitsi ni indwara ikunze kugirwa n’abantu batandukanye ariko cyane cyane abakuze, abahanga bavuga ko ikunze kwibasira imikaya ubundi igafata ingingo ku buryo zibyimba zikarekamo amazi

Ubundi muri rusange umuntu agira imitsi y’ubwoko bubiri ariyo:
Imitsi itembereza amaraso mu mubiri, harimo ivana amaraso mu mutima iyajyana mu bice bitandukanye by’umubiri (Arteries) n’iyagaruramo mu gihe yamaze gukoreshwa (veins).

Imitsi ijyana amakuru mu bwonko ikanayavanayo (Nerves), iyi akaba ari yo ikunze gutera ibibazo abantu batari bacye
Indwara y’imitsi ifata abantu bari mu byiciro byose bitewe n’impamvu zitandukanye, aho usanga nk’abantu bafite uburwayi bukomeye nka diyabete, abantu bafata imiti igabanya ubukana bw’agakoko gatera sida, iy’igituntu bakunze kuribwa imitsi y’amaguru. cyakora hari n’abaribwa imitsi yo mu maso, ibi rero ngo byo biterwa akenshi na za virusi zitandukanye

Iyi ndwara iterwa n’iki?

Abahanga mu by’ubuzima bavuga ko nubwo igitera iyi ndwara kitaramenyekana neza, ngo hari ibishobora gutuma iyi ndwara igufata birimo:
Kuba umuntu ageze mu zabukuru
Kuba hari ingingo z’umubiri ukoresha cyane kurusha izindi
Kuba ukunda kwicara umwanya munini cyangwa kunama cyane
Guhangayika no kwiheba
Kuryama cyane
Kudakora imyitozo ngororangingo

Bimwe mu bimenyetso byayo ni ibi bikurikira

kumva utuntu tukujomba tumeze nk’udushinge,igihe ubabara nk’ufashwe n’amashanyarazi ndetse n’igihe wumva umeze nk’uri kuribwa n’urusenda
kubona imitsi y’amaraso yipfunditse cyane cyane ku bice by’amaguru
kuba igice runaka cy’umubiri cyahinduye ibara cyane cyane cyabaye umukara,birashoboka ko amaraso atageramo neza kubera imitsi.
kubyimba amaguru
Gufatwa n’ibinya cyangwa imbwa nabyo bishobora guterwa n’imitsi irwaye

Dore uko wakwirinda iyi ndwara

Urubuga rutanga inama ku ndwara zitandukanye Mayo clinic.com ruvuga ko kugira ngo umuntu yirinde indwara y’imitsi akwiye
Kwirinda guhagarara no kwicara umwanya munini
Kwirinda umubyibuho ukabije
Gukora imyitozo ngororangingo mu gihe utangiye kumva ufite ibibazo by’imitsi
Kuryama useguye amaguru kuko bifasha amaraso gutembera neza
Kwambara amasogisi yabugenewe niba utangiye kubyimba amaguru

Source: Mayoclinic.com