Dore impamvu Yesu adusaba kwera imbuto akongeraho "nyinshi"

Yohana 15:8: Ibyo ni byo byubahisha Data, ni uko mwera imbuto nyinshi, mukaba abigishwa banjye.

Dufashe umurongo umwe wo mu butumwa bwiza bwanditswe na Yohana, ariko iyo usomye icyo gitabo cyose, usangamo indi mirongo Yesu yagiye avuga imbuto akongeraho ngo; "Nyinshi".

Noneho aho dusomye ho yatanze ubusobanuro bufatika, avuga ko ibyubahisha Data ari uko twera imbuto nyinshi. Mu yandi magambo ubwo kwubahisha Data ni ukwera imbuto nyinshi.

Ni gute Imbuto nyinshi zubahisha Data?

Ntabwo twamenya uburyo izo mbuto zubahisha Data wa twese, tutarazimenya ubwazo.

Pawulo yazirondoye mu buryo bwumvikana, igihe nawe yasabaga itorero ry’Abagalatiya kuzera.

Abagalatiya 5: 22-23: Ariko rero imbuto z’Umwuka ni urukundo, ibyishimo n’amahoro, no kwihangana no kugira neza, n’ingeso nziza no gukiranuka no kugwa neza no kwirinda. Ibimeze bityo nta mategeko abihana.

Ngurwo urutonde rw’imbuto Yesu asaba ko twera ariko tukazera ari nyinshi, kuko ari byo byubahisha Data.

Intego nyamukuru yakuye Yesu mu ijuru ni ukugira ngo umwizera wese atarimbuka ahubwo ahabwe ubugingo buhoraho, hanyuma y’ibyo ibindi byose ni inyongera. Yohana 3:16

Rero nk’uko umugambi w’Imana ku mwana w’umuntu ari ugukizwa urubanza rw’ibyaha kugira ngo azajye mu ijuru, nta kindi kintu umuntu yakora ngo gishimishe Imana ku kigero kingana n’uko yishima iyo umuntu yizeye Yesu agakizwa.

Ya mirimo yose dukora dutekereza ko Imana yishimye, burya siko yose ishimisha Imana nk’uko tubitekereza kuko akenshi tuyikorana umutima wanduye, ariko naho utakora byinshi ukaba ukijijwe neza gusa, ibindi birizana.

AGAKIZA NI IMBARAGA ZO GUKORA IMIRIMO

Ntabwo bisaba imbaraga nyinshi mu gusobanurira umuntu ukijijwe impamvu yo gukora imirimo myiza, ari nako kwera imbuto. Kuba akijijwe byonyine ni imbuto yo gukora iba iteye muri we, agakiza ntikamwemerera kwicara adakora.

Dore impamvu nyamukuru y’ibyo: Kuba ari ukugira ngo n’abandi bakizwe, icyo ni cyo cyubahisha Data, ni uko abantu bamuhindukirira, bakanga satani bakizera Yesu.

Kuba abantu b’Imana baheze mu bunyage bwa satani, ntabwo Imana yabirenza amaso ngo yishimire umudiho w’ababyinnyi batababajwe n’abantu bayo bari gupfa rubi, kubyina byakabaye bishingiye ku rukundo dukunda Imana, rukadutera no kubabazwa n’abantu bayo bari gupfa, niba ikitunezeza ari ukwibyinira gusa, ntaho dutaniye n’abandi bose babyina.

Icyakabaye impamvu yacu yo kubyina ni urukundo dukunda Imana, rudutera no gutekereza ku kababaro ifite k’abana bayo satani yaheranye. Twarangiza tukayibwira tuti: "Basi twebwe twaraje, nubwo bariya bataraza ariko turi kuberera imbuto, udufashe tubikomeze bazaza, ariko reka tukubyinire wishime ku bwacu, kuko uri Imana y’icyubahiro kandi ishoboye byose, inakiranuka!" Ibitari ibi sinzi izina ryabyo ariko ntekerezako bidafite icyo byakora ku mutima w’Imana!

Tukiri aha, nakubaza nti: "Ni iyihe mpamvu igutera gukora ibyo ukora byitwa umurimo w’Imana?"

Si ukugira ngo Imana yishime? Ibyishimo by’Imana rero uburyo bibonekamo butagoye, ni ugukiranuka no guhindurira abantu ku gukiranuka. Abo bantu bombi Bibiliya yavuze bimwe mu bihembo byabo. Ngo bazaba baka nk’inyenyeri. Daniel 12:3

Ese iyo abantu bitegereje imibereho yanjye bifuza kugira ingeso nk’izanjye? Cyangwa mbatera kurushaho kuzinukwa kuza aho ndi? Ese ab’ibisi bari kwifuza gusa nawe, cyangwa ahubwo wowe uri kwifuza ndetse ukanagerageza gusa n’ab’isi?

IMPAMVU NYAMUKURU RERO YO KWERA IMBUTO NYINSHI NI IYI:

Ni ivugabutumwa kugira ngo abantu bakizwe.

Yesu yasabye ko ubutumwa bwiza tuzabujyana bukagera ku mpera y’isi. Kandi ntabwo twese yadusigiye amatike na viza byo kugera aho hose. Ubishoboye aragenda ariko iyo nshingano si iy’abakire gusa. N’abakene bose irabareba, kuko ntiyarobanuye.

Ibyo bisobanuye iki?

Bisobanuye ko ivugabutumwa atari ugukoresha umunwa gusa, ako ni agace gato cyane k’ivugabutumwa. Ivugabutumwa rikuru ni ubuzima bwite bw’umuntu

Niba uri umukene ntuzabasha gutega indege ngo ujye kubwiriza, biragusaba kubwiriza abari hafi yawe.

Abaturanyi n’abo mubana rero ntibakeneye ko ubasomera imirongo yo muri Bibiliya kugira ngo bakizwe. Oya! Bakeneye imbuto zawe nizibaryohera bazifuza kumera nkawe, maze uhereko ubabwire Yesu bizere bakizwe. Nabo bakwigane bahindure abandi gutyo gutyooo isi yose ibone agakiza. Uzaba ukoze ibyo rya jambo rigusaba kandi abazakirizwa muri urwo ruhererekane watangije bose Imana izabaguhembera, n’ubwo abenshi uzaba utanabazi ariko Imana irabazi.

IMPAMVU YO KWERA NYINSHI RERO

Nuko n’abazikeneye ari benshi, kuko niwera nkeya zizaribwa na bakeya, abandi nibaza bakazibura bazajyana inkuru mbi nabamwe wazereye bahereko bazite.

URUGERO: Uzumva umuntu avuga ati: "Ariko rwose runaka arakijijwe, uzi ukuntu yihangana?"

Hakenewe ko wera izo kwihangana nyinshi kugira ngo abaza kugusoromaho kwihangana bose bakubone. Iyo zabaye nkeya rero dore uko bigenda:
Uwakugezeho urwo kwihangana akarubura ahita asubiza ati: "Yayayayayaaa, ntumuzi diii rekera aho, ubwo afite icyo yaragukurikiyeho, ubwo uzi ibyo yankoreye? Ihene yanjye yaramwoneye arantuka umunsi wose nan’ubu ntituvugana, none wowe uravuga!"

Icyo gihe biba birangiye wawundi ahita avuga, ati "Ese burya ni uko ateye? None se ko numva ngo arakijijwe ubwo akijijwe iki ra? Apuuu barutwa nanjye, nzigumira uko ndi!"

Urumva impamvu dukwiye kwera nyinshi? Ni uko n’abazidukeneye ho ari benshi, kandi nibazibona bagahindukirira Imana bizaba biyubahishije kuko tuzaba tuyinyagiye satani abantu bayo. Ibyo rero byubahisha Data cyane bikanamunezeza.

Aha abenshi bavuga ko ntawe unezeza abantu. Dore icyo Bibiliya ivuga, ni uko ingeso zacu nziza n’imitima itaducira urubanza bituma badutuka muri ubwo buryo bamwara, 1Petero 3: 15-16

Si ibyacu rero kubakurikirana wasanga nabo baba bakeneye izindi mbuto ngo bakizwe. Twe tugomba gukomeza tukera nyinshi, n’abaturenganya abakabona izo bakeneye bityo bagakizwa.

Ibi bintu birakomeye cyane, nta muntu ubaho wabishobora, kereka Yesu wenyine. Kugira ngo tubishobore rero, ni ukwemerera Yesu akabishoborera muri twe, kandi ni we utanga izo mbaraga. Filimoni 4:13

Ikindi ni uko n’ugerageza kubikora atari ku bwa Yesu, ameze nk’umukinnyi mwiza ariko ukinira hanze y’ikibuga. Ntagira aho atsinda igitego, ntamenyekana, ntagira n’umushima, kandi nibahamagara abakinnyi azasigara. Iyo mirimo yose igomba gukorwa kubwa Kristo, kandi igakorerwa muri Kristo, nibwo inezeza kandi ikubahisha Data, kuko ituma abantu bakizwa nabo bakaza kuri Kristo!

Nshoje ngusaba kwemerera Yesu akagushoboza kwera imbuto NYINSHI kuko ari byo byubahisha Imana!

Vedaste [email protected]