Dore icyo bibiliya ivuga ku mpano y’ubuhanuzi

Ubuhanuzi ni imwe mu mpano z’Umwuka Wera nk’uko tubisanga 1Abakorinto12:7-10.

“umuntu wese agahabwa ikimwerekanaho Umwuka kugira ngo bose bafashwe. Umwe aheshwa ijambo ry’ubwenge n’Umwuka, undi agaheshwa n’uwo Mwuka ijambo ryo kumenya, undi agaheshwa n’uwo Mwuka kwizera, undi agaheshwa n’uwo Mwuka impano yo gukiza indwara.
Undi agahabwa gukora ibitangaza, undi agahabwa guhanura, undi agahabwa kurobanura imyuka, undi agahabwa kuvuga indimi nyinshi, undi agahabwa gusobanura indimi.”(Abakorinto12:7-10)

Abakristo benshi bafite imyumvire itandukanye ku mpano y’ubuhanuzi n’ubutumwa bw’ubuhanuzi bitewe n’uko amatorero yabo yabibigishije. Bamwe bavugako ubuhanuzi bwarangiranye na Yohana Umubatiza ariko bakirengagiza ko mu gitabo cy’Ibyakozwe n’Intumwa hagaragaza ko Umwuka agiha imbaraga abahanuzi bakaba bagihanura.

“Muri iyo minsi abahanuzi bava i Yerusalemu, bajya mu Antiyokiya. Nuko umwe muri bo witwaga Agabo, arahaguruka arahanura abwirijwe n’Umwuka ati “Inzara nyinshi izatera mu isi yose.” (Ni yo yateye ku ngoma ya Kilawudiyo.)(Ibyakoz 12:7-10)

“Mu Itorero ryo muri Antiyokiya hariho abahanuzi n’abigisha, ari bo Barinaba na Simoni witwaga Nigeru, na Lukiyosi w’Umunyakurene na Manayeni wareranywe n’Umwami Herode, hariho na Sawuli.”(Ibyakoz13:1)

“Yuda na Sila kuko na bo bari abahanuzi, bahugūza bene Data amagambo menshi barabakomeza.”(Ibyakoz15:32)

“Tugitinzeyo iminsi, haza umuhanuzi witwaga Agabo avuye i Yudaya.(Ibyakoz21:10)

Tugendeye kuri ibi , dukwiye kumenya ko ubuhanuzi bwakomeje kubaho kugeza n’uyu munsi, ko Umwuka uha ubushobozi abahanuzi , ukomeza guha imbaraga abumva ijwi ry’Imana na bugingo n’ubu.

Niki bibiliya ivuga ku mpano y’ubuhanuzi?

Kugeza ubu turumvako impano y’ubuhanuzi igikora n’uyu munsi. Reka turebe icyo bibiliya ibivugaho:

Imana ubwayo yavuzeko izakomeza gutanga Mwuka wayo no mu minsi y’Imperuka

“‘Imana iravuze iti: Uku ni ko bizaba mu minsi y’imperuka, Nzasuka ku Mwuka wanjye ku bantu bose, Kandi abahungu n’abakobwa banyu bazahanura, N’abasore banyu bazerekwa, N’abakambwe babarimo bazarota. Ndetse n’abagaragu banjye n’abaja banjye muri iyo minsi, Nzabasukira ku Mwuka wanjye bazahanura.”(Ibyakoz2:17-18)

Ubuhanuzi bwose buva ku Mana

“Ariko mubanze kumenya yuko ari nta buhanuzi bwo mu byanditswe bubasha gusobanurwa uko umuntu wese yishakiye, kuko ari nta buhanuzi bwazanywe n’ubushake bw’umuntu, ahubwo abantu b’Imana bavugaga ibyavaga ku Mana bashorewe n’Umwuka Wera.”(2Petero 1:20-21)

Ubuhanuzi ntibusimbura ijambo ry’Imana

“Nihagira umuntu wibwira ko ari umuhanuzi cyangwa ko afite Umwuka, amenye ibyo mbandikiye yuko ari itegeko ry’Umwami wacu.”(1Abakorinto14:37)

Abakristo bose ntibahamagariwe kuba abahanuzi

“Mbese bose ni intumwa? Bose ni abahanuzi? Bose ni abigisha? Bose bakora ibitangaza?(1Abakorinto12 :29)

Ubuhanuzi burahugura bityo bugahindura abantu

“Ariko uhanura we abwira abantu ibyo kubungura n’ibyo kubahugura, n’ibyo kubahumuriza.”(Abakorinto14:3)

Ni impamo ikwiye kwifuzwa

“Nuko bene Data, mwifuze guhanura kandi ntimubuze abandi kuvuga indimi zitamenyekana.”(1Abakorinto14:39)

Umwuka w’ubuhanuzi ntukwiye guhinyurwa

“Ntimukazimye Umwuka w’Imana kandi ntimugahinyure ibihanurwa, ahubwo mugerageze byose mugundire ibyiza, mwirinde igisa n’ikibi cyose.”(Abatesalonike5:19-22)

Umwuka w’ubuhanuzi usobanura ibizaba

“Uwo Mwuka w’ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho.”(Yohana16:13, Ibyakoz11:27-28, 21:10-11)

Ni umwuka wubahiriza Kristo

“Uwo azanyubahiriza, kuko azenda ku byanjye akabibabwira.”(Yohana16:14)

Abakristo bakwiye kumenya ko abegera Imana by’ukuri ari bo iha kumenya no gusobanukirwa iby’igihe kizaza n’ibizaba, kandi bakaba abana b’Imana bakundwa.

Sophie @Agakiza.org