Dore ibyatuma uhora ugaragara neza imbere y’Imana no mugihe uri mu bukene


Ubukene ni ikintu gikomeye gituma abantu , ibigo bimwe na bimwe ,insengero bumva basuzuguritse mu bandi. Gusa na none n’ubwo amafaranga agira umumaro mu bintu byinshi ariko nanone ntidukwiye kumva ko afashe ubuzima ngo habeho kwiheba.
Abakristo benshi b’abakene batekerezako abakire babayeho neza, ni byo kandi ni byiza kugira amafaranga bigufasha kubona imyenda,amafunguro ndetse n’aho kuba(inzu) ariko hari ikintu kimwe cy’ingenzi adashobora guhindura . abakire n’abakene bangana imbere y’Imana .

“Umutunzi n’umukene bahurira hamwe,Uwiteka ni we wabaremye bose”. Imigani 22:2
Kuba umukristo ari umukene cyangwa umukire ntacyo bivuze, kuko Imana ibafata kimwe. Dushobora kuba dufite amafaranga make cyangwa umutungo udahagije ugereranyije n’abandi bakristo ariko ibyo byose ntacyo bivuze imbere y’Imana kuko ari umubyeyi ugabira ababa muri Kristo Yesu. Ibi bivuzeko,amafaranga atari ikintu cyonyine dushobora guha Imana, dukwiye kuyiha ubuzima bwacu, niba turi muri Kristo. Nk’uko Pawulo avugako abereyeho Kristo.

“Erega kubwanjye kubaho ni Kristo, kandi gupfa kumbereye inyungu!” (Abafilipi 1:21)
Niba duhisemo kuberaho Kristo, dukwiye gusa na we, tutitaye kuba dufite amafaranga cyangwa tutayafite,dutunze cyangwa tudatunze .
Ubu ni uburyo bushobora gutuma uhora ugaragara neza imbere y’Imana n’ubwo waba ukennye:

Yihe ibyo ufite, si amafaranga ikeneye

Amafaranga si ikintu cyonyine ushobora gutanga cyangwa ikindi cyose kibazwe mu mafaranga , ahubwo ushobora gutanga igihe cyawe, imbaraga zawe, ubumenyi mu bituma abandi bahabwa umugisha kandi izina ry’Imana rigahabwa icyubahiro.

Sa na Kristo imbere ya bagenzi bawe

Hari ibintu byinshi amafaranga adashobora kugura, kimwe muri byo ni ugusa na Kristo . Ineza ntishobora kugurwa muri butike, urukundo narwo ntirushobora kugurwa aho bacururiza.Abantu bakeneyeko ubereka ibikorwa byiza bigaragaza uwamenye Imana.

Ba icyitegererezo ku bandi

Abakristo bakwiye guhora ari icyitegererezo cyiza ku bandi babikuye kuri Kristo n’ubwo baba bafite ubukene .Bakamenyako Imana yakoresheje abakene bo ku isi kugirango isuzuguze abakire, n’ibyoroheje kugirango isuzuguze ibifite imbaraga.
“Ahubwo Imana yatoranije abaswa bo mu isi ngo ikoze isoni abanyabwenge, kandi yatoranije ibinyantege nke byo mu isi ngo ikoze isoni ibikomeye.” (1Abakorinto1:27)
Abakristo bagomba guharanira gukora umurimo w’Ubuntu wo gufasha Abakristo b’abakene: “Bene data,turabamenyesha ubuntu bw’Imana amatorero y’I Makedoniya yahawe.Bakigeragezwa cyane n’amakuba menshi,umunezero wabo uhebuje n’ubukene bwabo bwinshi bwasesekariyemo ubutunzi, ku bw’iby’ubuntu batanze Ndahamya yuko babutanze ku bwende bwabo nk’uko bashoboye, ndetse no kurenza ibyo bashoboye ,batwingingira cyane kugira ngo twakire ubuntu bwabo batanze babone uko bafatanya gukenura abera.”(2 Abakorinto8:1-4)

Amafaranga yagufasha kugera aho ushaka gutembera hose ku isi ariko ntiyakugeza mu ijuru kuko Yesu ariwe nzira y’ukuri n’ubugingo ikindi kandi amafaranga yagura igitanda ariko ntiyagura ibitotsi n’amahoro kuko amahoro Yesu atanga ari nyakuri kandi atagira akagero. Bibiliya itubwira neza ko “ Umukene ugenda ari inyangamugayo aruta ikigenge naho cyaba ari igikire” (Imigani 28:6)

[email protected] Agakiza.org