CEP KIST-KHI yasoje igiterane cy’icyumweru

Igiterane cyari kimaze icyumweru muri CEP KIST-KHI cyari gifite intego igira iti “Nibutse iminsi ya kera, nibwira ibyo wakoze byose, ntekereza umurimo w’ intoki zawe nkuramburira amaboko” Zaburi 143:5.

Abashyitsi bari muri iki giterane ni Pasteur Desire Habyarimana, Umuririmbyi Alexis Dusabe, Chorale Siloam ya ADEPR Kumukenke hamwe n’abarangije muri KIST bari mu buzima busanzwe.

Nyuma yo kumva indirimbo zanogeye amatwi zaririmbwe na Sloam n’umuhanzi Alexis Dusabe, hakurikiyeho ijambo ry’ Imana ryigishijwe na Pastor Desire aho yagarutse ku ntego y’ igiterane ivuga ku kwibuka imirimo y’ Imana (Zaburi 143:5). Yakomeje avuga ko Dawidi yagize iminsi mibi, ariko azira umuhamagaro we kuko Sawuli yari yibwiye ko azaba Umwami akamusimbura ku ntebe ibyo bituma amuhiga cyane. Yagize ati “Iyo ukijijwe uhinduka icyaremwe gishya. Icyo gihe Satani atangira kukurwanya kugira ngo akubuze kwinjira mu masezerano, ariko Imana ikagenda igucira akanzu.”

Yakomeje agira ati “Dukwiriye kwibuka ibyo Imana yakoze mu buzima bwacu, intambara Imana yaturwaniye naho itugejeje bikadutera kuyishimira ibyo na none bigatuma tudaheranwa n’ imibabaro itandukanye. Kandi gushima Imana kwacu nta bwo gukwiye kuba mu magambo ahubwo dukwiye no gukora ibikorwa bigaragaza ko twabanye n’ Imana koko dufasha abatishoboye.”

Nyuma y’ inyigisho abatari bake bakiriye Kristo nk’ Umwami n’ Umukiza, abari baracitse intege bagaruka mu nzira y’ Imana. Aha twabibutsa na none ko muri iki cyumweru abanyamuryango ba CEP KIST-KHI bakoze imirimo itandukanye ijyanye no kwita ku bababaye kuruta abandi, harimo abarwayi bari mu bitaro bya CHUK kwishurira abanyeshuri batishoboye amakarita yo gufatiraho amafunguro.

Mu gusoza, Korali yakomeje ihimbaza Imana aho wabonaga abanyeshuri batifuza kuva mu kibuga ahakorewe igiterane.

Chorale Siloam

Alexis Dusabe aririmba

Abitabiriye igiterane

Pst Desire yigisha ijambo ry’ Imana



Abakiriye Yesu bemera gusengerwa