Byinshi kuri Moridekayi wagize uruhare mu gutabarwa kw’Abayuda bari kwicwa

Moridekayi yari nka se w’umwamikazi Esiteri. Ni umugabo dushobora kuba tuzi kandi twakwigiraho byinshi n’uburyo twagendana n’umugambi w’Imana mu buzima bwacu bwa buri munsi.

Moridekayi agaragara mu gitabo cya Esiteri 2:5 nk’umuhungu wa Yayiri wo mu babenyamini. Akaba ari we wareze Hadasa ari we Esiteri umukobwa wa se wabo kuko yari imfubyi, ababyeyi be bari barapfuye.(Esiteri 2:7)

Moridekayi yafashe inshingano zo kurera Hadasa. Yamuhaye inama zuzuye ubwenge zo kutavuga ko ari Umuyuda kandi yahoraga amukurikiranira hafi no mu gihe bashakaga uzaba umwamikazi. Hadasa yaje kuba umwamikazi Esiteri, bityo aba umugore w’umwami Ahasuwerusi.

Mu gitabo cya Esiteri 2:19, hatubwirako Moridekayi yakoraga ku irembo ibwami.Yafashije umwami avuga imigambi mibi yose bashakaga kugirira umwami, abibwira umwamikazi Esiteri, maze nawe abimubwirira umwami.(Esiteri2:21-23)
N’ubwo iki gikorwa cyo gutabara ubuzima bw’ umwami cyanditswe, Moridekayi ntiyagihembewe, ntiyigeze ahabwa icyubahiro kubwo kuvuga umugambi mubisha bashakaga kugirira uwo mwami, aho kujya kubiburana cyangwa kubyibutsa, yakomeje gushimishwa no gukora akazi ke ko ku irembo ry’ibwami .

Indangagaciro za Moridekayi zarizigamije guhesha Imana icyubahiro

Umuyuda utararamije(kuramya) abanzi b’abantu b’Imana

Hari umugabo Ahasuwerusi yazamuye mu cyubahiro ku buryo abatware bose n’abantu bose bamwubahaga bakamuramya,ari we Hamani mwene Hamedata, Umwagagi ni ukuvugako yari Umumaleki .Mu gihe abantu bose bamupfukamiraga bakamuramya iyo yabaga anyuze ku irembo, Moridekayi we ntiyigeze amupfukamira, kandi Abamaleki bari abanzi b’Abayuda.
“Uwiteka yarahiriye ko azajya arwanya Abamaleki ibihe byose.” (Kuva: 17:16)

Moridekayi ntiyigeze apfukamira abanzi b’Imana.

Umugabo watinyaga Imana yasabye Esiteri guhaguruka agakoresha umwanya arimo kugirango yuzuze umugambi w’Imana.
Moridekayi yahagaritswe umutima no kumva umugambi mubisha wa Hamani wo kurimbura Abayuda ariko aho kubabara cyangwa ngo atakaze ibyiringiro, yakoze icyo yagombaga gukora ahamagara Esiteri ngo arengere abantu be aribo Bayuda.

Moridekayi yarazi ko Esiteri atapfuye kuba umwami, yarazi ko Imana ari yo yabyemeye kugirango abantu b’Imana bazarokoke abanzi babo nk’uko yabisezeranije, niko kubwira Esiteri amagambo akurikira:
“We kwibwira yuko ari wowe wenyine uzakira mu Bayuda bose kuko uri mu nzu y’umwami, kuko niwicecekera rwose muri iki gihe, nta kizabuza Abayuda gutabarwa bakoroherwa biturutse ku bandi, ariko wowe n’ab’inzu ya so bazarimbuka. Ahari aho icyakwimitse ngo ube umwamikazi, ni ukugira ngo ugire akamaro mu gihe gisa n’iki.”(Esiteri4:13-14)

Iby’ingenzi twamwigiraho:

1. Dukwiye kwita ku miryango yacu

Moridekayi yareze Esiteri nyuma yo kuba imfubyi.Yabaye se, umurinzi we n’umujyanama w’umwamikazi Esiteri, ariko ntiyigeze amusaba inyiturano y’ibyo yamukoreye igihe yamureraga.

2. Dukwiye guha icyubahiro Imana aho kubaha abantu

Moridekayi yashyize ubuzima bwe mu kaga ubwo yangaga gupfukamira umuntu, cyane cyane umuntu wafatwaga nk’umwanzi w’Imana.
Igihe duhuye n’ikibazo cy’uwo dukwiye kubaha hagati y’umuntu n’Imana, dukwiye guha icyubahiro Imana.Tuzahura n’abaturwanya, ariko Imana niyo muyobozi w’ikirenga kandi niyo igenzura buri kintu cyose, ntizigera ireka gutabara abayubashye. Dukwiye rero kuyikurikira kuko niyo irwana intambara iyo ari yo yose.

3. Dukwiye gukora ibyo Imana ishaka ko dukora

Urebye ubuzima bwe, Moridekayi yakoze ibyo umuntu wese utinya Imana akwiye gukora:

•Yafashe inshingano yita ku muryango we.
•Yakomeje gukora akazi ke neza cyane, n’ubwo atahembwe(n’ubwo nyuma yaje guhembwa).
•Yabwiye Esiteri gukora icyo Imana yamushyiriye mu mwanya yari arimo.

Dukwiye kuba abantu bashoboye gukora icyo Imana ishaka, maze na yo ikadutabara mu ngorane zose duhura nazo mu buzima. Tubereyeho gusohoza umugambi w’Imana.

Sophie agakiza.org