Byinshi kuri Marita utaragize umuhate wo kumva ijambo rya Yesu nka mwene se Mariya

Luka10:38-42, tuhasoma inkuru izwi cyane muri bibiliya ya Marita n’umuvandimwe we Mariya igihe bakiraga Yesu mu rugo iwabo .

“Uwo yari afite mwene se witwaga Mariya, yari yicaye hafi y’ibirenge by’Umwami Yesu yumva ijambo rye. Ariko Marita yari yahagaritswe umutima n’imirimo myinshi yo kuzimāna. Aho bigeze aramwegera aramubaza ati “Databuja, ntibikubabaje yuko mwene data yampariye imirimo? Wamubwiye akamfasha?”(Luka10:39-40)
N’ubwo Marita ari we wari wakiriye Yesu iwe(Luka10:38), Mariya niwe wicaye ku birenge bye yumva ijambo rye. Ku rundi ruhande Marita yari yahagaritswe umutima n’imirimo myinshi yo kuzimānira Yesu n’intumwa ze.

Nshuti ,ni byiza gutumira Kristo mu buzima bwacu, no mu rugo iwacu ariko tugomba kwibuka ko tutagomba kujya kure ye cyangwa ngo duhugire mu bindi bintu bidafite inyungu, dukwiye kumwumva hanyuma tukitondera ibyo avuze. “Nimunkunda muzitondera amategeko yanjye.”(Yohana14:15)

Yesu yacyashye Marita , maze amwereka guhitamo kwiza: Igihe Imana idukosoye, uko gucyahwa gushobora kutadushimisha ariko igihe kiragera kukagira imbuto kandi tukarushaho gusa na Kristo.
“Nimwihanganira ibihano, muba mugaragaje ko muri abana b’Imana. Mbese ni mwana ki udahanwa na se? Ariko niba mudahanwa nk’abandi bose, noneho muba muri ibibyarwa mutari abana nyakuri. Ko dufite ba data batubyaye ku mubiri, bakaduhana natwe tukabubaha, ntidukwiriye kurushaho cyane kugandukira Se w’imyuka tugahoraho? Kuko ba bandi baduhanaga iminsi mike nk’uko byari bibabereye byiza, naho uwo aduhanira kugira ngo bitubere byiza dusangire kwera kwe. Nta gihano kinezeza ukigihanwa ahubwo kimutera umubabaro, ariko rero hanyuma cyera imbuto zo gukiranuka zihesha amahoro abamenyerejwe na cyo. »(Abaheburayo12 :7-11)

« Abo nkunda bose ndabacyaha, nkabahana ibihano. Nuko rero gira umwete wihane.” (Ibyahishuwe3:19)

Marita yaracyashywe, maze Yesu amubwira umugabane mwiza ko ari uwo kumva ijambo rye: “Umwami Yesu aramusubiza ati “Marita, Marita, uriganyira wirushya muri byinshi ariko ngombwa ni kimwe, kandi Mariya ahisemo umugabane mwiza atazakwa.”(Luka10:41-42)

Kristo ashaka ko tugomba kubanza gushaka ubwami bw’Imana no gukiranuka kwayo, kuko ari bwo byose tuzabyongerwa”(Matayo 6:33). Igihe Imana iducyashye cyangwa iducyebuye , ntidukwiye kuyirakarira , ahubwo ibi byose bituma turushaho gusa na Kristo ndetse tukanabohoka.

Umugore wamenye umwana w’Imana

Marita ni umwe wagize amahirwe abonana n’umukiza w’isi. Yohana 11:1-44 haduha ishusho y’ukuntu Kristo yazuye Lazaro musaza wa Marita wari umaze iminsi mu mva.Bibiliya itubwirako “Yesu yakundaga Marita na mwene se na Lazaro”(Yohana11:5). Muri iki gice n’ubwo batubwirako Mariya yari yicaye hafi y’ibirenge bya Yesu mu gihe Marita yari ahuze cyane ashaka kuzimana, “Marita yumvise ko Yesu aje ajya kumusanganira, ariko Mariya asigara yicaye mu nzu.”(Yohana11:20) Muri iki gice hatubwirako Yesu yabwiye Marita ko ari we buzima:
“Yesu aramubwira ati “Ni jye kuzuka n’ubugingo, unyizera naho yaba yarapfuye azabaho, kandi umuntu wese ukiriho unyizera ntazapfa iteka ryose. Mbese wizeye ibyo?”Aramusubiza ati “Yee, Databuja, nizeye yuko uri Kristo Umwana w’Imana ukwiriye kuza mu isi.”(Yohana11:25-27)

Iki gice kitubwirako na none Yesu yamucyashye, amubwirako akwiye kongera ukwizera :

“Yesu arababwira ati “Nimukureho igitare.” Marita mushiki w’uwapfuye aramubwira ati ‘Databuja, none aranuka kuko amaze iminsi ine.’ Yesu aramubwira ati ‘Sinakubwiye nti ‘Niwizera uri bubone ubwiza bw’Imana’?”(Yohana11:39-40)

Bibiliya itubwirako dukwiye kugira Yesu nk’umwigisha wacu kuko ari we uzatuyobora mu kuri kose:

“Uwo Mwuka w’ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho. Uwo azanyubahiriza, kuko azenda ku byanjye akabibabwira. Ibyo Data afite byose ni ibyanjye, ni cyo gitumye mvuga nti ‘Azenda ku byanjye abibabwire.’”(Yohana 16:13-15)
Tuzi Marita nk’umuvandimwe wa Mariya, umwe wahugiye mu gushyashyana ashaka kuzimanira Yesu n’abigishwa be, aho kuza kumva ijambo avuga . Dushobora kuba tumuzi muri ubu buryo, ariko nanone dukwiye kumumenya nk’umuntu Imana yakunze cyane, yacyashye, akigishwa imyizerere iboneye no kugira ukwizera.

Abakristo bakwiye kumenyako bakwiye gutumira Yesu ariko bakaza hafi y’ibirenge bye kuko muri we harimo ijambo ridasaza kandi ritunga abaryumva bakarikomeza.

Sophie @Agakiza.org