Byinshi kuri Maluko waciwe ugutwi na Simoni Petero

Bibiliya igaragaza agahe gato abantu bamwe, ariko bakaba bafite amasomo menshi twakwigiraho muri ubu buzima turimo bw’ubukristo.Umwe muri bo ni umuntu witwa Maluko waciwe ugutwi n’intumwa ya Yesu ,ariko Yesu akamukiza.

Maluko ni muntu ki?

Inkuru ya Maluko tuyisoma mu butumwa bwiza bwa Yesu Kristo uko ari bune . N’ubwo cyane cyane yavuzwe muri Yohana18:10-11, agaragara no muri Mariko14:45-49, Matayo26:50-54, na Luka22:49-53.Yari umugaragu w’umutambyi w’umutambyi mukuru.
Maluko yari umugaragu w’umutambyi mukuru wavuzeko (uwo mutambyi) byaba byiza Kristo apfiriye abantu bose(Yohana18:13-14), kandi ni we wohereje abasirikare na Yuda Isikaryota gufata Yesu (Matayo26:1-4, 14-16, 47-49)
Kubona Yesu kwa Maluko n’ibyo yamukoreye , twavugako yabonye umuntu ufite imyifatire n’imico nk’iyundi muntu wese kukoyamugiriye neza no mugihe yarenganywaga.
Mu butumwa bwiza bwa Yesu uko ari bune butubwira umwe mubari baherekeje Yesu(Petero, nk’uko muri Yohana habivuga) yari afite inkota arayikura ayikubita Maluko umugaragu w’umutambyi, amuca ugutwi.

Mu butumwa bwiza bwa Matayo 26:51-52 hatubwira hati:

“Umwe muri abo bari kumwe na Yesu arambura ukuboko, akura inkota ye, ayikubita umugaragu w’Umutambyi mukuru, amuca ugutwi. Maze Yesu aramubwira ati “Subiza inkota yawe mu rwubati rwayo, kuko abatwara inkota bose bazicwa n’inkota.”(Matayo26:51-52)

Mu butumwa bwa Luka ho hagira hati:

“Abari kumwe na we babonye ibyenda kubaho baramubaza bati “Databuja, tubakubite inkota?” Umwe muri bo ayikubita umugaragu w’Umutambyi mukuru, amuca ugutwi kw’iburyo. Yesu aravuga ati “Rekera aho.” Amukora ku gutwi aragukiza. (Luka 22:49-51)
Maluko ashushanya abatizera, mu bikorwa byabo biba ari ukuza kuri Kristo ku mukwena gusa, bagakomeretswa n’abakristo batazi urukundo rw’Imana. Bamwe mubatizera bashobora gukurikira Imana, ariko abakristo bamwe aho kubagaragariza urukundo bamenye rw’Imana, ahubwo bakabagirira nabi.
Ibyabaye kuri Maluko biratwereka urukundo Kristo akunda abantu bose.Umwami Yesu yaragambaniwe ashyirwa mu nzu y’imbohe arengana ariko ibyo yakoreye uyu mugaragu w’umutambyi mukuru bigaragaza urukundo rw’Imana yamukunze.
Bibiliya ntivuga byinshi ku buzima bwerekeye Maluko nyuma y’ibi ariko ikintu cy’ukuri niko yagiriwe ubuntu akababarirwa n’umwana w’Imana, akabona ubuntu n’ineza ya Yesu.

Abakristo bakeneye gukura bakamenya urukundo rw’Imana rwuzuye, bakigira kuri Yesu wagiriwe nabi ariko we akagaragaza ineza.

[email protected]