Byinshi ku bagabo babiri bajyaga Emawusi bagendanye na Yesu bataramumenya

Luka 24 hatubwira inkuru y’ukuntu Umwami Yesu yagendanye n’abantu babiri ariko ntibamumenya. Luka 24:13-34 tuhasanga abantu babiri mubari baramukurikiye bajyaga mu kirorero cyitwa Emawusi. Abo bagabo bagendaga bavuga uburyo Mariya Magadalene, n’abandi bagore bababwiye uburyo basanze imva ya Yesu irangaye.
Muri ako kanya Yesu arabegera atangira kuganira nabo ariko ntibamumenya: “Ariko amaso yabo arabuzwa ngo batamumenya.”(Luka24:16)

Hari igihe mu mibereho yacu tutabasha kumenya Imana nka bariya bagabo babiri twabonye.Amaso yacu akabuzwa n’ibintu byinshi bidafite umumaro bityo bigatuma tutabasha kubona ishusho n’ikiganza cy’Imana kiri ku buzima bwacu.
Yesu Kristo ubwe agendana natwe ariko inshuro nyinshi ntitubyitaho.Birakwiye ko abantu bamumenya nk’uko na we abazi.(Yohana10:27)

Muri Luka 24:17-27 hatubwira uburyo Yesu yababajije ibyabaye, maze umwe muri bo witwaga Kilewopa aramusubiza ati: “Umwe muri bo witwaga Kilewopa aramusubiza ati “Mbese ni wowe wenyine mu bashyitsi b’i Yerusalemu, utazi ibyahabaye muri iyi minsi?”(Luka24:18)

Ni uko Yesu arababaza ati :« Ni ibiki? »Nuko abo babiri bamubwira ibye, ariko bari batarakamenya ko ari Yesu bavugana na we. Maze bamutekerereza ibye n’ukuntu yababaye n’ukuntu abagore bababwiye ko atakiri mu bapfuye ahubwo ari muzima.Kugeza icyo gihe cyose bari bataramumenya.

Abenshi muri twe bameze batyo:Tuzi Imana, tuzi Yesu n’ ibimwerekeyeho byose, tumuvugaho kenshi ariko muby’ukuri ntabwo tumuzi.

Barangiza ikiganiro, dusomako Kristo yabasobanuriye ibyanditswe bimwerekeyeho , kandi akamanyura umugati ari kumwe na bo mbere y’uko abasiga aho bari bari.
Baravugana bati “Yewe, ntiwibuka ukuntu imitima yacu yari ikeye, ubwo yavuganaga natwe turi mu nzira adusobanurira ibyanditswe!” Uwo mwanya barahaguruka basubira i Yerusalemu, basanga abo cumi n’umwe bateranye hamwe n’abandi, bumva bavuga bati “Ni ukuri Umwami Yesu yazutse, ndetse yabonekeye Simoni.” Nuko babandi babiri na bo babatekerereza ibyabereye mu nzira, n’uburyo bamumenyeshejwe n’uko amanyaguye umutsima.”(Luka24:32-35) Nyuma y’ibyo Kristo yavuze n’ibyo yakoze, byarangiye bamumenye, bamenya ko ari muzima.

Hari igihe mu buzima bwacu dusa n’abo babiri. Turamuzi ndetse twaramukurikiye ariko ntituramenya Umwami n’Umukiza wacu byuzuye, kandi yifuza kugumana na twe ibihe byose.
Yesu adusaba kumushakana umwete: “Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire, kuko ushaka kurengera ubugingo bwe azabubura, ariko utita ku bugingo bwe ku bwanjye, azabubona.”(Matayo16:24-25)

Imana idushoboze kuyimenya by’ukuri

[email protected]