Byari bivuze iki ,Imana yambika Adamu na Eva kandi bacumuye?

“ Uwiteka Imana iremera Adamu n’umugore we imyambaro y’impu ,irayibambika.” (Itang3:21)

Mu gitabo cy’itangiriro 3:21 hakwereka uburyo Imana ari nziza kandi ikagira n’imbabazi. Uyu murongo uratuma tubona umugambi ukomeye w’Imana wo gucungura ikiremwamuntu. Ukaba ari umunsi Imana yerekanye urukundo rwayo.

Mu itangiriro ibice 3, dusomako inzoka yariganije Eva imutera gusuzugura Imana ,arya ku mbuto bari barabujijwe. Dusoma kandi uburyo Eva yahaye izo mbuto umugabo we, adashidikanije cyangwa ngo abyibazeho nawe arazirya. Nyuma yo gucumura kwabo bihishe hagati y’ibiti byo mu ngobyi ya Edeni, kuko bamenye ko bambaye ubusa kandi bakaba baratinye Imana.

Ugusuzugura Imana kwa Adamu, ntitwatumye ihitamo kwica Adamu na Eva, ntiyahisemo kurimbura abo bantu ngo ireme abandi . Ntiyahise ihanisha Adamu na Eva urupfu n’ubwo yari yavuzeko nibarya ku giti cy’ubugingo no gupfa bazapfa.(Itang.2:17) Ariko Imana siko yabigenje , ahubwo yakoze icyo yagombaga gukora igaragaza ineza n’urukundo rwayo.

Imana irera, n’inyakuri kandi ntibera.Kubera iyi mpamvu, ntacyaha kiyigaragara imbere. Ukuri n’ubutabera byayo bigomba guhana ibyaha byose n’ibikorwa bibi byose. Yari ikwiye kwirukana Adamu na Eva imbere yayo kuko iyo baguma mu ngobyi ya Edeni, bari kongera gusoroma ku giti cy’ubugingo,bakakirya bakabaho iteka.

“Uwiteka Imana iravuga iti: “ Dore uyu muntu ahindutse nk’imwe yo muri twe ku byo kumenya icyiza n’ikibi, noneho atarambura ukuboko agasoroma no ku giti cy’ubugingo,akarya akarama iteka ryose.”(Itang.3:22). Ahubwo mu rukundo rwayo rwinshi, yaremeye Adamu na Eva imyambaro y’impu irayibambika.

Niki bitwigisha?
Imana ntishaka ko twambara ubusa

Imana yambitse Adamu na Eva. Mu bisanzwe, ibi biravugako icyifuzo cy’Imana ariko twambara ibikwiriye imibiri yacu, tukayiha Imana.Imana ishaka ko tuyubaha, twubaha n’umuntu yaremye mu ishusho yayo kandi usa na Yo. Satani we ashaka ngo dusuzugure Imana ,imibiri yacu tuyigire ibikoresho.

Imana yashakaga guhisha isoni z’ubwambure bwacu. Ibyaha byacu byagaragaye imbere y’Imana, ariko muri Kristo twese twatwikirijwe amaraso ye, kandi kubwo gutwikirizwa amaraso ye y’igiciro, twarababariwe kandi ibicumuro byacu Imana ntiyabyibuka ukundi.

“Ubwanjye ninjye uhanagura ibicumuro byawe nkakubabarira ku bwanjye, kandi ibyaha byawe sinzabyibuka ukundi.” (Yesaya42:25)

“Nimuze tujye inama, ni ko Uwiteka avuga, Naho ibyaha byanyu byatukura nk’umuhemba birahinduka umweru bise na shelegi, naho byatukura tukutuku birahinduka nk’ubwoya bw’intama bwera.( Yesaya1:18)

Yashatse inzira yatuma umuntu ababarirwa akanacungurwa.

Bibiliya ivugako nta muntu ubasha kwikiza ubwe. Adamu na Eva ntibari gushobora guhindura icyaha n’ingaruka zacyo. Ntibari kugira icyo babikoraho.Twokamwe n’ibyaha kubera ibicumuro byabo.(Abaroma5:12)

Imana ku buntu bwayo,yaduhaye umwana wayo ikunda cyane “umwana w’intama ukuraho ibyaha by’abari mu isi.”(Yohana 1:29), Yesu Kristo,umwana w’Imana wapfiriye ku musaraba kugira ngo ibyaha byacu bishobore kubabarirwa, kandi tubashe kwitwa abana b’Imana.

Imana ishaka ko twambara Kristo

Niba Imana yarabashishe kwambika Adamu na Eva ibashakiye impu zo kwambara,dukwiye natwe kwambara Kristo no kuba mu buzima bw’ibyishimo.

“Tugendane ingeso nziza nk’abagenda mu mucyo, tutagira ibiganiro bibi , tudasinda, tudasambana, tudakora iby’isoni nke, tudatongana kandi tutagira ishyari. Ahubwo mwambare Umwami Yesu Kristo, kandi ntimuhe urwaho imibiri yanyu ngo ibone uko ikora ibyo yifuza.(Abaroma13:13-14)

Imana ni inyembabazi kandi ibabarira abafite umutima wicuza , ko ari bo babasha guhagarara imbere yayo no gukora ibishimwa na Yo.

Imana iduhe kwihana nyako, mu izina rya Yesu.

[email protected]